ABŞ Prezidenti Donald Tramp, keçmiş prezident Barak Obama və həyat yoldaşı Mişel Obama ilə bağlı “Truth Social” platformasındakı paylaşımlarına görə sərt tənqidlərlə üzləşib.
2020-ci il prezident seçkilərinin səsvermə maşınları vasitəsilə saxtalaşdırıldığı iddialarını özündə əks etdirən videonun sonunda Obama cütlüyü meymuna bənzədilib. 62 saniyəlik videoda ingilis dilində "The Lion Sleeps Tonight" mahnısının fonunda təsvir edilən Obama ailəsi yer alıb.
Trampın meymun müqayisəsi ABŞ-da sərt təpkilərə səbəb olub. Kaliforniya qubernatoru Qevin Nyusomun media ofisi tərəfindən X sosial media platformasındakı paylaşımda "Prezidentin (Trampın) iyrənc davranışı. Hər bir respublikaçı bunu dərhal pisləməlidir" deyə bildirilib.
Ağ Evin sözçüsü Karolin Livitt ABŞ mediasına verdiyi açıqlamada Tramp paylaşımını müdafiə edib: "Bu, Prezident Trampı Cəngəllik Kralı, Demokratları isə "Aslan Kral" filminin personajları kimi təsvir edən internet satirik videosundan götürülüb".
Livitt paylaşıma reaksiyaları isə "saxta qəzəb" adlandırıb.
Trampın “Truth Social” hesabında yerləşdirilən və Obama cütlüyünü cəngəllikdə yaşayan meymunlar kimi təsvir edən "irqçi video" sərt təpkilərdən sonra silinib.
Ağ Evdə işləyən bir mənbə “Axios”a respublikaçı həmkarlarından paylaşımın silinməsini tələb edən "çoxsaylı" telefon zəngləri aldığını bildirib. ABŞ mediasında yayılan məlumatlara görə, Ağ Ev rəsmisi paylaşımın təsadüfən bir işçi tərəfindən paylaşıldığını iddia edib.
Keçən il Tramp həmçinin Obamanın Oval Ofisdə həbs olunduğunu göstərən süni intellekt videosu paylaşmışdı.
TAHİR
