ABŞ və Ukrayna rəsmiləri müharibəyə son qoymaq üçün mümkün razılaşmanın mart ayında yekunlaşdırılmasını müzakirə edirlər.
“Reuters” mənbələrə istinadən bildirir ki, Vaşinqton və Kiyev bu müddətin çox iddialı olduğunun və uğursuz ola biləcəyinin də fərqindədirlər. Beş mənbəyə görə, əldə edilən hər hansı bir sülh razılaşmasının Ukraynada referenduma çıxarılması planlaşdırılır və bu referendumun hazırda müharibə vəziyyəti səbəbindən təxirə salınan prezident seçkilərlə eyni vaxtda keçirilməsi gündəmdədir.
ABŞ danışıqçıları Uitkoff və Kuşner Mayami və Əbu-Dabidə keçirilən görüşlərdə Trampın tezliklə diqqətini daxili siyasətə və noyabrda keçiriləcək seçkilərə yönəldəcəyini vurğulayaraq, seçkilərin və referendumun mümkün qədər tez keçirilməsində təkid edirlər. Bəzi mənbələr səsvermənin may ayında keçirilə biləcəyini irəli sürsə də, “Reuters” agentliyinə danışan digər mənbələr bunun mümkün olmadığını və Ukraynada ədalətli səsvermə üçün ən azı altı ay hazırlıq tələb olunduğunu bildiriblər.
Ən vacib məsələlərdə ciddi fikir ayrılıqlarının qaldığı da bildirilir. Ərazi məsələsində Moskva bütün Donetsk və Luqansk bölgələrinin onların nəzarətinə verilməsində israr edir, Kiyev isə nəzarəti altındakı əraziləri geri qaytarmaqdan imtina edir. Ukrayna tərəfi əvvəlcə silahsızlaşdırılmış zona kimi "yaradıcı" formullara açıq olduğuna bildirir.
Zaporojye Atom Elektrik Stansiyası ilə bağlı da heç bir razılaşma yoxdur. “Reuters”in məlumatına görə, ABŞ-ın stansiyanı Vaşinqtonun nəzarətinə vermək təklifi Moskva tərəfindən rədd edilib.
Bu arada Kiyev seçkilər və referendum üçün ilkin şərt kimi həqiqətən real atəşkəs rejimi və ABŞ və Qərb tərəfdaşlarından aydın təhlükəsizlik zəmanətləri tələb edir.
TAHİR
