Rusiya Müdafiə Nazirliyinin Hərbi Kəşfiyyat Xidmətinin (QRU) birinci müavini general-leytenant Vladimir Alekseyevə qarşı sui-qəsd cəhdi olub.
Alekseyev səhər saatlarında Moskvadakı Volokolamskoye şossesindəki mənzilindən çıxarkən hücuma məruz qalıb. Özünü kuryer kimi təqdim edən silahlı Alekseyevlə onun mənzilinin olduğu mərtəbədə qarşılaşıb. Təcavüzkar əvvəlcə generalın qolundan və ayağından atəş açıb, Alekseyev silahı ondan almağa çalışanda isə güllə sinəsindən dəyib. Üçüncü güllə ilə ağır yaralanmasına baxmayaraq, Alekseyev müqavimət göstərib və hücumçunu hadisə yerindən qaçmağa məcbur olub. Generalın ağır olduğu və reanimasiya şöbəsində müalicə aldığı bildirilir.
“Baza və “Mash” Telegram kanalları xəbər verir ki, silah səsləri və kömək çağırışları eşidən sakinlər Alekseyevi qanlar içində görüblər və təcili yardım çağırıblar. Şahidlər bildiriblər ki, bütün mərtəbə və lift şaxtası qan içində olub və silahlı şəxs generalı kürəyindən vurduqdan sonra hadisə yerindən qaçıb. Rusiya İstintaq Komitəsi isə bildirilib ki, naməlum şəxs yaşayış binasının yaxınlığında generala pusqu quraraq bir neçə dəfə atəş açıb və onu kürəyindən yaralayıb.
Silahlı şəxsin tutulması üçün genişmiqyaslı axtarışlar başlayıb.
64 yaşlı Alekseyev 2017-ci ildə Rusiya Federasiyası Qəhrəmanı adına layiq görülüb. Rus general həmçinin, 2023-cü ildə “Vaqner” Qrupunun qurucusu Yevgeni Priqojin tərəfindən başladılan üsyan cəhdinin yatırılmasında rolu ilə də diqqət çəkmişdi. Həmin vaxt Alekseyevə üsyana son qoymaq üçün Priqojinlə danışıqlar aparmaq tapşırılmışdı.
QRU Rusiya Silahlı Qüvvələri Baş Qərargahının Baş Kəşfiyyat İdarəsinin qısaltmasıdır. Rusca adı "Qlavnoye Razvedyvatelnoye Upravleniye" olan QRU hərbi kəşfiyyat məlumatlarını toplamaqdan məsul olan ən vacib qurumlardan biridir. Baş Qərargaha birbaşa tabe olduğu üçün QRU mülki kəşfiyyat xidməti FSB-dən fərqli bir mövqeyə sahibdir.
TAHİR
