ABŞ ordusu Oman körfəzində ABŞ təyyarədaşıyan gəmisinə yaxınlaşan İran pilotsuz təyyarəsini vurub.
Bu hadisədən əvvəl İran Hörmüz boğazında ağır pulemyotlarla təchiz olunmuş altı hücum qayığı ilə ABŞ neft tankerinə yaxınlaşıb. ABŞ mediası İran qayıqlarının tankerə yaxınlaşaraq mühərriklərini söndürdüyü və İnqilab Keşikçilərinin tankerdə axtarış əmri verdiyini, lakin tankerin sürətlə onlardan uzaqlaşaraq ABŞ hərbi gəmisinin müşayiəti ilə yoluna davam etdiyini bildirib. Tankerin Bəhreyndəki ABŞ dəniz bazasına getdiyi bildirilir.
Məhz bundan sonra ABŞ Oman körfəzində Amerika təyyarədaşıyan gəmisinə yaxınlaşan İran pilotsuz təyyarəsini vurub. “Reuters” agentliyinin məlumatına görə, Oman körfəzində USS Abraham Lincoln təyyarədaşıyan gəmisinə yaxınlaşan Şahid-139 pilotsuz təyyarəsi ABŞ-ın F-35 qırıcı təyyarəsi tərəfindən vurulub.
Hadisə İran İnqilab Keşikçilərinin Hörmüz boğazı ətrafında hərbi təlimləri və bölgədə təyyarədaşıyan gəmilərin olması ilə bağlı qarşılıqlı təhdidlərin edildiyi bir vaxtda baş verməsi ilə diqqət çəkir.
Digər tərəfdən, toqquşmanın baş verdiyi koordinatların İranın strateji təhlükəsizlik zonasına yaxınlığı bölgədəki hərbi gərginliyi ən yüksək səviyyəyə qaldırıb.
ABŞ Mərkəzi Komandanlığının (CENTCOM) sözçüsü Tim Hokins bildirib ki, Abraham Linkolndan buraxılan F-35C qırıcı təyyarəsi təyyarədaşıyan gəmini və onun heyətini qorumaq üçün özünümüdafiə məqsədilə İran pilotsuz təyyarəsini vurub. İran hələlik hadisə ilə bağlı şərh verməyib.
Olayı təsdiqləyən Ağ Evin sözçüsü Karolin Livit isə bildirib ki, prezident Tramp diplomatiyanı davam etdirməyə sadiqdir, lakin təbii ki, qarşılıqlı xoşməramlılıq tələb olunur.
TAHİR
