Səudiyyə Ərəbistanının müdafiə naziri şahzadə Xalid bin Salman Vaşinqtonda keçirilən brifinqdə ABŞ prezidenti Donald Trampa xəbərdarlıq mesajı göndərib.
Qapalı görüşdə iştirak edən mənbələrin verdiyi məlumata görə, Tramp İrana qarşı təhdidlərini yerinə yetirməsə, Tehran rejiminin daha da güclənəcəyi bildirilib.
“Axios”un məlumatına görə, Salman Ağ Evdə ABŞ dövlət katibi Marko Rubio, müdafiə naziri Pit Heqset, Ağ Evin nümayəndəsi Stiv Uitkoff və Birləşmiş Qərargah Rəisləri Komitəsinin sədri general Den Keynlə uzun bir görüş keçirib. Müzakirələr ABŞ-ın İrana qarşı hərbi variantlarına yönəlib.
ABŞ administrasiyası mümkün İran əməliyyatı ilə bağlı Körfəzə hərbi qüvvə yığır. Lakin Ağ Ev Trampın hələ yekun qərar vermədiyini və diplomatiya qapısının tamamilə bağlı olmadığını iddia edir.
Səudiyyə Ərəbistanının, ictimaiyyət üçün verilən açıqlamalardan məsələyə çox ehtiyatla yanaşdığı görünür. Vəliəhd şahzadə Məhəmməd bin Salman İran prezidenti ilə telefon danışığında krallığın ABŞ-ın İrana qarşı hücumlar üçün hava məkanından istifadə etməsinə icazə verməyəcəyini bildirib. Ər-Riyad İranın suverenliyinə hörməti vurğulayıb və diplomatik həll yoluna işarə edib.
Lakin yayılan məlumatlardan aydın olur ki, Səudiyyə qapalı görüşlərdə tam fərqli mövqe tutur. Səudiyyə Ərəbistanı müdafiə nazirinin Vaşinqtonda keçirilən şəxsi brifinqdə İrana qarşı daha sərt dildən istifadə etdiyi bildirilir. Nazir Yaxın Şərq mütəxəssislərinin, beyin mərkəzlərinin nümayəndələrinin və bəzi yəhudi təşkilatlarının qatıldığı görüşdə həftələrlə davam edən təhdidlərdən sonra Trampın hərbi əməliyyatlara məcbur qala biləcəyini deyib. Eyni görüşdə regional gərginliyin nəzarətsiz şəkildə artması riski də vurğulanıb.
Görüşdə iştirak edən mənbələrə görə, Salman "Bu mərhələdə hücum olmazsa, bu, yalnız bu rejimi cəsarətləndirəcək" deyib.
Başqa bir Körfəz rəsmisi isə bölgənin iki ən pis ssenari arasında qaldığını bildirib. Rəsmiyə görə, ABŞ-ın İrana hücumu ciddi nəticələrə səbəb ola bilər, hücumun olmaması isə İranın bölgədən daha güclü çıxmasına səbəb ola bilər.
ABŞ rəsmiləri, cəmi üç həftə əvvəl Səudiyyə Ərəbistanının ABŞ-a İrana hücumdan çəkinmək üçün güclü təzyiq göstərirdiyini xatırladıblar. Həmin vaxt Ər-Riyad administrasiyası regional müharibə risqinə diqqət çəkirdi. Lakin, Vaşinqtonda keçirilən son görüşlərdə Səudiyyə tərəfinin daha sərt mövqeyi ortaya qoyduğu müşahidə edilib. Mənbələrə görə, bu dəyişikliyin səbəblərindən biri Trampın hücum etmək qərarına gəlməsi ilə bağlı fikirlər ola bilər.
Görüşdə iştirak edən mənbələrə görə, Salman Səudiyyə Ərəbistanının İsrailə yaxınlaşmadığını və regional mövqeyində heç bir fundamental dəyişiklik olmadığını iddia edib. O, həmçinin Səudiyyə mətbuatında və sosial mediada artan İsrail əleyhinə ritorika ilə bağlı iddiaları da təkzib edib.
TAHİR
