İranda son üç ilin ən böyük etirazları milli valyutanın ABŞ dolları qarşısında kəskin dəyərdən düşməsi və Mərkəzi Bankın sədri Məhəmməd Rza Fərzinin istefasından sonra başlayıb. Satıcılar və mağaza sahibləri Tehranın mərkəzində, xüsusilə Böyük Bazarın yaxınlığındakı Şuş bölgəsində mitinqlər keçiriblər.
Məlumata görə, etirazlar digər böyük şəhərlər – İsfahan, Şiraz və Məşhəd – daxil olmaqla ölkənin müxtəlif bölgələrində də baş verib.
Bu barədə Azad İran Telegram kanalı məlumat yayıb.
Tehranın bəzi ərazilərində polis nümayişçiləri dağıtmaq üçün gözyaşardıcı qazdan istifadə edib.
Mütəxəssislər bildirirlər ki, bu 2022-ci ildən bəri ən böyük etiraz aksiyasıdır.
O zaman 22 yaşlı Məhsa Əmininin polis nəzarətində ölümü ölkə miqyasında geniş nümayişlərə səbəb olmuşdu.
İranda etirazların genişlənməsindən sonra milli fəallara da basqılar artıb.
Son günlər milli fəallara qarşı təhdid və təzyiqlərin artdığı bildirilib. Bununla bağlı, insan haqları təşkilatları məlumat yayıb.
Bildirilib ki, SEPAH-ın Kəşfiyyat Təşkilatı xüsusilə Təbrizdə yaşayan bir neçə fəala zəng edib və onlara mesajlar göndərərək hər hansı aksiyaya qoşulmaları barədə xəbərdarlıq edib.
Bu təhdidlərin səbəbinin hökumətin Tehranda başlayan etiraz aksiyalarının digər şəhərlərə yayılmasından ehtiyat etməsi olduğu açıqlanıb.
İranda davam edən etiraz aksiyalarının üçüncü günündə Tehranın Şuş bölgəsində etirazçılarla polis qüvvələri arasında qarşıdurma yaşanıb.
Məlumata görə, etirazçılar və təhlükəsizlik qüvvələri üz-üzə gəlib, ərazidə gərginlik yaranıb.
Hadisə zamanı saxlanılanlar və ya xəsarət alanlar barədə hələlik rəsmi məlumat verilməyib. Rəsmi qurumlar da baş verən toqquşma ilə bağlı açıqlama yaymayıblar.
Bu arada SEPAH hökuməti etirazalara reaksiya verməyə çağırıb.
SEPAH-a bağlı “Qüds qanadı” adlı Teleqram kanalı Tehranda mağaza satıcılarının dinc tətili və bazarda yaranan xaosla bağlı narahatlıq ifadə edib.
Kanal iqtisadi böhranın dərinləşdiyini vurğulayaraq, vəziyyətə lazımi reaksiyanın verilməməsinin təhlükəli nəticələr doğura biləcəyini bildirib.
Paylaşımda qeyd olunub ki, rəsmi qurumlar xalqın etirazlarına adekvat cavab verməlidir. Əks halda, mövcud gərginliyin İsraillə yeni bir müharibə üçün zəmin yarada biləcəyi xəbərdarlığı edilib.
Qeyd edək ki, Tehranda satıcılar bazarda yaranmış xaosa və iqtisadi vəziyyətə etiraz olaraq bazar günü tətilə başlayıblar.
İradə SARIYEVA
