Rusiya xarici işlər naziri Sergey Lavrov Ukraynanın Putinin Novqorod vilayətindəki rəsmi iqamətgahına pilotsuz uçuş aparatları (PUA) ilə hücuma cəhd etdiyini iddia edib.
Lavrov Ukrayna iki gün əvvəl gecə boyunca Putinin Novqorod bölgəsindəki iqamətgahına PUA ilə hücumlar təşkil etdiyini deyib və hücumda istifadə edilən 91 pilotsuz təyyarənin hamısının vurulduğunu bildirib.
Hücumu "ehtiyatsız addım" adlandıran Lavrov Rusiyanın bu hərəkəti cavabsız qoymayacağını deyib: "Biz bu terrorizmə cavab verəcəyik. Rusiya Silahlı Qüvvələri tərəfindən həyata keçiriləcək cavab əməliyyatlarının hədəfləri və vaxtı artıq müəyyən edilib".
Lavrov hücum səbəbindən Rusiyanın Ukrayna ilə bağlı danışıqlardan çəkilməyəcəyini bildirib: "Rusiyanın danışıqlardakı mövqeyi, Kiyev rejiminin dövlət terrorizmi siyasətinə qəti keçidi nəzərə alınınaraq yenidən nəzərdən keçiriləcək".
Kreml xarici siyasət müşaviri Yuri Uşakov isə bildirib ki, Putin ABŞ prezidenti Trampı Ukraynanın Rusiya prezidentinin iqamətgahına hücum cəhdi barədə məlumatlandırıb.
Rusiya Xarici İşlər Nazirliyinin sözçüsü Zaxarova isə Kiyevə xəbərdarlıq edərək Ukraynanın Putinin iqamətgahına hücum cəhdinə cavabın "diplomatik olmayacağını" deyib: "Cavab diplomatik olmayacaq, buna ümid etməsinlər".
Moskvanın açıqlamalarına reaksiya verən Ukrayna Prezidenti Zelenski isə iddiaları qəti təkzib edib. Zelenski bildirib ki, Rusiya paytaxt Kiyevdəki binalara zərbə endirmək üçün zəmin hazırlayır: "Bu sözdə "iqamətgah hücumu" hekayəsi Kiyev də daxil olmaqla Ukraynaya qarşı gələcək hücumları və Rusiyanın müharibəni dayandırmaq üçün lazımi addımları atmaqdan imtina etməsini qanuniləşdirmək üçün uydurulmuş bir yalandır".
O, əlavə edib ki, Rusiya növbəti dəfə təhlükəli açıqlamalarla Trampın komandası ilə birgə diplomatik səyləri pozmağa çalışır.
Zelenski ABŞ-dan Rusiyanın təhdidlərinə uyğun şəkildə cavab verməyə çağırıb. Zelenski Avropa liderləri ilə əlaqə saxlayaraq onları da Rusiyanın iddiaları ilə bağlı məlumatlandırıb.
Ukraynanın xarici işlər naziri Andrey Sibiqa isə bildirib ki, Rusiyanın guya "Putinin iqamətgahına hücum cəhdi" ilə bağlı manipulyasiyaları tək bir məqsəd üçün uydurulub: Rusiyanın Ukraynaya yeni hücumları üçün bəhanə və yalançı əsaslandırma yaratmaq, eləcə də sülh prosesini pozmaq və əngəlləmək...
ABŞ prezidenti Tramp da Ukraynanın Putinin iqamətgahına hücum cəhdi ilə bağlı iddialara münasibət bildirib. O, deyib ki, əgər belə bir hərəkət baş veribsə, bu, "çox pis" olacaq.
"Bu xoşuma gəlmədi. Bu, yaxşı bir şey deyil. Bu barədə səhər eşitdim. Bilirsiz, bunu mənə kim deyib? Prezident Putin dedi. Səhər tezdən o, mənə ona qarşı hücum edildiyini dedi. Bu, qəbuledilməzdir. Qətiyyən qəbuledilməzdir. Xatırladım ki, Ukraynaya “Tomahawk” raketlərinin çatdırılmasını mən dayandırmışdı. Hücum mövqeyində olmaq bir şeydir... amma başqasının evinə hücum etmək tamamilə başqa bir şeydir. İndi bunların heç birinin vaxtı deyil" - deyə Tramp bildirib.
Tahir TAĞIYEV
