Gürcüstan Daxili İşlər Nazirliyi sabiq Baş prokuror Otar Romanov-Partsxaladze barəsində cinayət işi açıb və o saxlanılıb. Nazirlik biznesmen Levan Canqveladzenin qətlinin təşkilatçısı kimi Partsxaladzeni göstərib.
Daxili işlər nazirinin müavini Aleksandre Daraxvelidze Canqveladzenin qətl işinin tam açıldığını bildirib.
"Daxili İşlər Nazirliyinin əməkdaşları tərəfindən keçirilən yüzlərlə istintaq hərəkəti nəticəsində əldə edilən dəlillərlə Levan Canqveladzenin qətlini sifarişlə törədən mütəşəkkil dəstəyə kimin rəhbərlik etdiyi müəyyən edilib.
Aparılan istintaqla müəyyən edilib ki, zaman ərzində cinayətkar dəstə olaraq formalaşmış şəxslər dairəsi və bu dəstənin liderləri Otar Romanov Partsxaladze və onun etibar etdiyi şəxslər – qardaşlar Davit və Qiorqi Mikadzelər biznes fəaliyyəti ilə əlaqədar Levan Canqveladze ilə müəyyən ixtilaf və qarşıdurma yaşayıblar və Levan Canqveladze ilə uzun müddət münaqişə yaşayan digər şəxslərin sifarişi ilə Levan Canqveladzenin qətlini təşkil ediblər.
Levan Canqveladzenin qəsdən öldürülməsinə, yaradılmış cinayətkar dəstənin qeyd-şərtsiz lideri – Otar Romanov Partsxaladze rəhbərlik edib. Onun göstərişi və tapşırığı ilə qardaşlar Davit və Qiorqi Mikadzelər öz növbəsində dostları və etibar etdikləri Qiorqi Coxadze ilə əlaqə saxlayıblar və qətl planını açıqlayıblar.
Cinayətkar niyyətin həyata keçirilməsi, planlaşdırılan sifarişli qətlin törədilməsi üçün onlar Qiorqi Coxadzenin mühafizəsinin sabiq əməkdaşı Qela Udzilaurini tapıblar.
Cinayətkar dəstə tərəfindən həmçinin Levan Canqveladzenin Gürcüstana gəlişinin dəqiq vaxtı və hərəkət marşrutu barədə məlumat əldə edilib, bundan sonra da Qela Udzilauri 2025-ci ilin martın 14-də Tbilisidə, Cavcavadze prospektində sifarişlə Levan Canqveladzeni qətlə yetirib, onu müşaiyət edən şəxsə isə eyni odlu silahdan bədən xəsarəti yetirib.
Qela Udzilauri qətldən sonra qısa müddətdə saxlanılıb. Onun barəsində cari ilin oktyabrın 24-də məhkəmə məhkumedici hökm çıxarıb və Udzilaurini ömürlük həbs cəzasına məhkum edib.
Həmçinin, Qiorqi Mikadze, Mamuka Bağdavadze, Qiorqi Kackacaşvili iş üzrə saxlanılıb, Davit Mikadze və Qiorqi Coxadze isə axtarışa verilib. Həmçinin, onların keçmiş dostu, Levan Canqveladzeni öldürmək üçün istifadə edilən silahın əvvəllər adına qeydiyyatda olan Sandro Tsivtsivadze saxlanılıb"- deyə DİN müavini bildirib.
ZÜMRÜD
