ABŞ mediası iddia edir ki, devrilmiş lider Bəşər Əsədin bəzi yüksək vəzifəli məmurları Suriyada üsyan hazırlayır. Bildirilir ki, Suriya sahili boyunca müxtəlif kəndlərdən 160 mindən çox insana planlaşdırılan üsyan üçün pul və silah paylanıb.
“The New York Times” qəzeti iddia edir ki, devrilmiş rejimin bəzi generalları Suriyada üsyan hazırlayır və yeni hökuməti devirmək istəyirlər. Bildirilir ki, silahlı üsyan başlatmağı planlaşdıran keçmiş yüksək vəzifəli məmurlar bu yolla Suriya sahillərinə nəzarəti ələ keçirməyi hədəfləyirlər.
İddialara görə, Suriyanın Dördüncü Diviziyasının keçmiş yüksək vəzifəli komandiri, 54 yaşlı Qiat Dallanın Livanda apardığı və ələ keçirilən telefon danışığında "Tam silahlanana qədər başlamayacağıq" deyib. Bu dəstədə yer alan iki əsas fiqurun Əsədin xüsusi təyinatlı qüvvələrinin keçmiş komandiri Süleyman Həsən və diktatorun keçmiş hərbi kəşfiyyat rəhbəri Kamal Həsən olduğu bildirilir. Bu şəxslərə müharibə cinayətləri törətdiklərinə görə, beynəlxalq sanksiyalar tətbiq edilib.
Sözügedən şəxslərin yazışmalarını araşdıran qəzet, onların Suriya sahili boyunca müxtəlif kəndlərdən olan insanları döyüşmək üçün maliyyə və silahla təmin etdiklərini bildirib. 160 mindən çox döyüşçünün toplandığı, onlardan 20 mininin pulemyot, 331-nin zenit silahı və 150-nin tank əleyhinə qumbara daşıdığı iddia edilir. Həmçinin onların arasında 35 snayperin olduğu da iddia edilir.
Üsyançıların məqsədinin Suriyada məzhəb münaqişəsini yenidən alovlandırmaq olduğu və buna görə potensial əsgərlərə müntəzəm ödənişlər etdiyi bildirilir. Keçmiş generallarla əməkdaşlıq edən Əsədin iki adamı “The Times” qəzetinə bildirib ki, həm qorxu içində olan, həm də bir çox keçmiş hərbçinin yaşadığı Ələvi icmasından əsgər toplamaq üçün yaxşı mövqedədirlər.
TAHİR
