Suriyanın devrilmiş lideri Bəşər Əsədin Moskvada dəbdəbəli sürgün həyatı ilə bağlı yeni təfərrüatlar ortaya çıxıb. ABŞ mətbuatı bu yaxınlarda bir vaxtlar Əsədə yaxın olan və yüksək vəzifələrə təyin olunmuş şəxslərin indi nə ilə məşğul olduğunu da araşdırıb. Onların yaşadığı ölkələr arasında Əsəd və ailəsinin də dəbdəbəli sürgün həyatı yaşadığı Rusiya da var.
"New York Times" qəzetinin məlumatına görə, Bəşər Əsədin ən yaxın təhlükəsizlik müşavirlərindən biri olan Əli Məmlük Moskvada yaşayır və bütün xərcləri Rusiya tərəfindən ödənilir. Məmlük nadir hallarda insanlarla görüşür və çox az sayda ziyarətçi qəbul edir.
Əsəd rejimi dövründə qurulmuş "narkotik imperiyası"nın əsas fiquru olan Qassan Bilal da Moskvada yaşayır və ailəsinin İspaniyadan Dubaya qədər uzanan "rahat həyat tərzini" maliyyələşdirir.
Suriyada silahsız etirazçılara atəş açmağı əmr etdiyi iddia edilən Camal Yunis də Moskvada skuter sürərkən görüntülənib. Keçmiş müdafiə naziri Əli Abbas və keçmiş Baş Qərargah rəisi Əbdülkərim İbrahim də Moskvadakı dəbdəbəli ticarət mərkəzində gəzərkən fotoları çəkilib. Keçmiş general-mayor Avs Aslan isə Moskvanın şərqindəki Kazana göndərilib. Lakin Aslan aylar sonra Moskvada peyda olub.
Suriyadan yük təyyarələri ilə qaçmağa məcbur qalan və Rusiyada hərbi evlərdə yerləşdirilən bəzi məmurlar isə daha çətin şəraitdə yaşayırlar. Sistematik işgəncə və edamlarda ittiham olunan Hərbi Hava Qüvvələri Kəşfiyyatının direktoru Cəmil Həsən də bu şəxslər arasındadır. Keçmiş daxili işlər naziri Məhəmməd əl-Rəhmunun isə Körfəz ölkələrində yaşadığı iddia edilir.
Devrilmiş rejimin bəzi məmurlarının Birləşmiş Ərəb Əmirliklərində və Livanda yaşadığı bildirilir. Bir vaxtlar suriyalılar arasında sistematik işgəncələr və insanları oğurlaması ilə tanınan "Fələstin şöbəsi"nə rəhbərlik etmiş və rejim devrilməzdən əvvəl təqaüdə çıxmış keçmiş general Yasin Dahinin Dubayda yaşadığı və maliyyə problemləri ilə üzləşdiyi bildirilir. Qeyd edilir ki, rejimin bəziləri hələ də Suriyada yaşayır və gizlənirlər.
Əsəd və ailəsi ilə bağlı isə bildirilir ki, onların dəbdəbəli həyat tərzi Suriyanı tərk etdikdən sonra başlayıb. Ailə Rusiyaya şəxsi təyyarələr və avtomobil karvanları ilə gedib. İlk bir neçə həftə ərzində onlar 13 min dollara qədər dəyəri olan dəbdəbəli “Four Seasons” kompleksində qalıblar. Daha sonra onlar Moskvada “Federation Tower”də iki mərtəbəli penthausa köçüblər. Sonradan isə Rusiya elitasının yaşadığı Rublyovka ətrafındakı bir villada məskunlaşıblar. Əsəd ailəsi bu müddət ərzində Rusiya təhlükəsizlik xidmətləri tərəfindən mühavizə edilib. Onlara hər hansı bir açıqlama vermək də qadağan edilib.
Bildirilib ki, Əsədin qardaşı, rejimin ən güclü hərbi fiqurlarından biri olan Mahir Əsəd də Moskvadakı biznes mərkəzlərində tez-tez görünür. Həmçinin Əsəd ailəsinin gənc üzvlərinin sosial media vasitəsilə dəbdəbəli həyat tərzinin izləri aşkar edilib. Bildirilib ki, Mahir Əsədin qızı Şam Əsəd və Bəşər Əsədin qızı Zeyn Dubayda dəbdəbəli restoranlarda və şəxsi yaxtalarda keçirilən ad günləri ilə xəbər başlıqlarına çıxıblar. “Times” qəzetinə danışan mənbələrə görə, Əsəd ailəsi Birləşmiş Ərəb Əmirliklərinin rəsmiləri ilə uşaqlarının ölkədə qalmasına icazə verən xüsusi bir razılaşma əldə edib.
TAHİR
