Rusiya ABŞ-ın Ukrayna münaqişəsi ilə bağlı hazırladığı son sülh planı layihəsinə ciddi düzəlişlər tələb edəcək. Kremlə yaxın mənbə “Reuters” agentliyinə bildirib ki, Rusiya üçün həyati əhəmiyyət bəzi məqamlar var ki, bunlar hazırkı ABŞ təklifində yer almayıb.
Rusiya tərəfinin əsas etirazları və tələbləri bunlardır:
NATO-nun Şərqə doğru daha da genişlənməsinin rədd edilməsi - Planda NATO-nun Şərqə doğru daha da genişlənməyəcəyinə dair məcburi və açıq zəmanət yoxdur. Bu, Rusiyanın uzun müddətdir qaldırdığı əsas təhlükəsizlik narahatlıqlarından biridir.
Ukraynanın neytrallıq statusu ilə bağlı qeyri-müəyyənlik - Ukraynanın Avropa Birliyinə qoşulma prosesinə başlayacağı halda neytrallıq statusunu necə qoruyacağı məsələsi hələ də qeyri-müəyyəndir. Rusiya AB üzvlüyünün onu NATO ilə effektiv şəkildə uyğunlaşdıracağından narahatdır.
Ukrayna Silahlı Qüvvələrinə məhdudiyyətlər - Ukrayna Silahlı Qüvvələrinin sayını (təxminən 800.000 nəfər) və müəyyən hücum silah sistemlərinin (məsələn, uzun mənzilli raketlər) istifadəsi ilə bağlı Rusiyanın tələbləri kifayət qədər nəzərə alınmır.
Rus dilinin statusu - Ukraynada rus dilinin rəsmi statusunun qorunması ilə bağlı heç bir müddəa yoxdur.
Sanksiyalar və dondurulmuş aktivlər - Plan Rusiyaya qarşı sanksiyaların qaldırılması və Qərbdə dondurulmuş Rusiya dövlət aktivlərinin geri qaytarılması üçün konkret və hərtərəfli mexanizm nəzərdə tutmur.
Xəbərlərə münasibət bildirən Kremlin sözçüsü Dmitri Peskov isə Rusiyanın mövqeyinin dəyişməz qaldığını bildirib. Danışıqların ictimai müzakirəsinə qarşı olduqlarını vurğulayan Peskov, heç bir şərh verilməyəcəyini bildirib: “Biz hələ də inanırıq ki, hər şey qapalı qapılar arxasında aparılmalıdır".
Kreml əvvəllər də Ukrayna üçün hazırlanmış sülh layihələrinin "meqafon diplomatiyası" vasitəsilə həll olunmayacağını bildirmişdi.
TAHİR
