Ukrayna Prezidenti Volodimir Zelenski ABŞ-ın rəhbərlik etdiyi sülh danışıqları ilə bağlı ehtiyatlı nikbinlik ifadə edib.
Zelenski Kiyevin tələblərinin "təxminən 90%-nin" saziş layihəsinə daxil edildiyini və "prinsip etibarilə bütün sənədlər üçün əsas çərçivənin tamamlandığını" bildirib. Layihə planına 20 bənd daxildir.
Kiyevdə jurnalistlərə açıqlamasında Zelenski sülh müqaviləsini "bu mərhələdə kifayət qədər güclü" adlandırıb, lakin kompromislərin hələ də zəruri olacağını etiraf edb: “Hazır olmadığımız şeylər var və əminəm ki, rusların hazır olmadığı şeylər var”.
Zelenski həmçinin Avropa Birliyi, ABŞ və Ukrayna arasında təhlükəsizlik zəmanətləri ilə bağlı çərçivə sənədinin, eləcə də Kiyevlə Vaşinqton arasında eyni məsələ ilə bağlı ayrıca ikitərəfli müqavilənin hazırlandığını da açıqlayıb. Sonuncu halda, bəzi müddəalar məxfiləşdiriləcək - ABŞ Konqresi onu "qapalı əlavələrlə" nəzərdən keçirəcək.
Vaşinqton Ukraynada təxminən dörd illik müharibəyə son qoymaq üçün Kiyev və Moskva ilə danışıqlar aparır.
Keçən həftənin bazar günü ABŞ-ın xüsusi elçisi Stiv Uitkoff Kiyev və Avropa Birliyinin nümayəndələri ilə danışıqları, eləcə də Rusiya diplomatları ilə ayrı-ayrı görüşləri "məhsuldar və konstruktiv" adlandırıb.
Zelenski ABŞ ilə hazırlanmış təhlükəsizlik zəmanətləri paketində məxfi bəndlərin olduğunu da açıqlayıb.
Diplomatlarla görüşdə çıxış edən Ukrayna lideri Vaşinqton və Kiyev arasında ikitərəfli təhlükəsizlik müqaviləsinin Konqresə təqdim ediləcəyini bildirib. Zelenski sənədə bəzi əlavələrin dərc olunmayacağını, çünki bunun həm ABŞ, həm də Ukrayna hərbi qruplarının birgə işinin nəticəsi olduğunu söyləyib.
Zelenski ABŞ Konqresi tərəfindən təsdiqlənməsinin müqaviləni Budapeşt Memorandumundan və ya Minsk razılaşmalarından fərqli bir çərçivəyə salacağını bildirdi. Müzakirə olunan mövzular zəmanət müddətinin uzunluğu və eyni formatda uzadılması ehtimalını əhatə edir.
Ukraynanın tələb etdiyi təhlükəsizlik elementlərini sadalayan Zelenski, 800.000 nəfərlik ordunun davamlı maliyyələşdirilməsi üçün müttəfiq dəstəyinə ehtiyac olduğunu və müdafiə qabiliyyətlərini gücləndirmək üçün çəkindirmə paketinin də gündəmdə olduğunu bildirib.
Ölkəsinin AB üzvlüyünü iqtisadi təhlükəsizliyin fundamental elementi kimi gördüyünü bildirən Zelenski, 30 dövləti əhatə edə biləcək "könüllü ölkələrin koalisiyası" planından bəhs edib. Bu struktur daxilində bəzi dövlətlər hava, quru və dəniz təhlükəsizliyinə birbaşa töhfə verəcək, digərləri isə enerji, maliyyə və logistika dəstəyi verəcək.
Zelenski bildirib ki, ABŞ-la danışıqlardan qayıdan Ukrayna nümayəndə heyəti hesabat təqdim edəcək və bəzi müddəaların Kiyev üçün qəbuledilməz, digərlərinin isə Rusiya tərəfindən rədd ediləcəyini proqnozlaşdıracaq. Bu arada, Moskva Mayamidə ABŞ-la görüşən Rusiya Birbaşa İnvestisiya Fondunun rəhbəri Kirill Dmitriyevin Putin qayıtdıqdan sonra ona məlumat verəcəyini açıqlayıb. Kreml təqdim olunan təkliflərin bir çoxunun Rusiya üçün uyğun olmaya biləcəyini bildirib.
İradə SARIYEVA
