Qərb mediasının yaydığı məlumata görə, Mayamidə Rusiya və ABŞ Ukrayna ilə bağlı məxfi görüş keçirməyə hazırlaşır.
Belə ki, Rusiya prezidentinin Xarici Ölkələrlə İnvestisiya və İqtisadi əməkdaşlıq üzrə xüsusi nümayəndəsi Kirill Dmitriyev bu həftə Ukrayna münaqişəsinin həlli ilə bağlı danışıqlar aparmaq üçün ABŞ-a gedəcək.
Qazeta.ru-nun məlumatına görə, Kremldən isə bildirilib ki, Moskva Ukrayna ilə Avropa ölkələri arasında danışıqların nəticələrini öyrənmək üçün Vaşinqtonla müəyyən əlaqələrə hazırlaşır.
Vladimir Putin xəbərdarlıq edib ki, əgər Kiyev "maddi müzakirələrdən" imtina edərsə, Moskva tarixi torpaqlarını hərbi yolla geri alacaq. Volodimir Zelenski Rusiya liderinin "siqnalını" eşitdiyini iddia edib.
Rusiya prezidentinin mətbuat katibi Dmitri Peskov bildirib ki, Rusiya Ukrayna və Avropa ölkələri nümayəndələri arasında aparılan danışıqların nəticələrini öyrənmək üçün ABŞ ilə təmaslara hazırlaşır.
Kremlin sözçüsü brifinqdə qeyd edib ki, "Amerikalıların avropalılar və ukraynalılarla gördüyü işlərin nəticələri barədə məlumat əldə etmək üçün amerikalı həmkarlarımızla müəyyən əlaqələr hazırlayırıq".
"Axios" xəbər portalı Rusiya prezidentinin Xarici Ölkələrlə İnvestisiya və İqtisadi Əməkdaşlıq üzrə Xüsusi Nümayəndəsi Kirill Dmitriyev ABŞ Prezidentinin xüsusi nümayəndəsi Stiven Uitkoff və Ağ Ev rəhbərinin kürəkəni Cared Kuşner arasında bu həftə görüş planlaşdırıldığını bildirib.
"Politico"nun məlumatına görə, Vaşinqtonun Ukrayna ilə danışıqların son mərhələsinin nəticələrinin paylaşılacağı görüş 20-21 dekabr tarixlərində Mayamidə keçiriləcək.
Tramp administrasiyasının rəsmiləri hesab edirlər ki, "Rusiya Qərbin təhlükəsizlik zəmanətlərini və Ukraynanın Avropa Birliyinə üzvlüyünü yekun razılaşmanın bir hissəsi kimi qəbul edəcək".
Bu arada, Ukrayna prezidenti Volodimir Zelenski “Reuters” agentliyinə bildirib ki, Ukrayna nümayəndələri artıq ABŞ-a gedirlər. O, 19 və 20 dekabrda Amerika nümayəndə heyəti ilə görüşməyi planlaşdırdıqlarını bildirib. Dmitriyevin iştirakı ilə üçtərəfli görüş üçün heç bir plan yoxdur.
Qeyd edək ki, dekabrın 14-də Berlində Uitkoff, Kuşner və Zelenskinin iştirakı ilə Ukrayna münaqişəsinin həlli ilə bağlı danışıqlar baş tutmuşdu. Dekabrın 15-də isə Avropa liderlərinin iştirakı ilə danışıqlar davam etdirilib və onlar potensial sülh razılaşmasını təmin etmək üçün "çoxmillətli qüvvə" yaratmağı təklif ediblər. Lakin Moskva dəfələrlə Qərb qoşunlarının Ukrayna ərazisinə yeridilməsinə qarşı çıxıb.
İradə SARIYEVA
