KKTC Xalqın Partiyasının sədri və sabiq Xarici İşlər naziri Kudret Özersay MediaTürk TV-də Serdar Şengülün hazırlayıb təqdim etdiyi “Net Baxış 360 Dərəcə” proqramında gündəmə dair mühüm qiymətləndirmələr aparıb.
Proqramda Türkiyənin mövcud geosiyasi mənzərəsini şərh edən Özersay bildirib ki, Türkiyə həm Qara dənizdə yaşanan gərgin proseslər, həm də Şərqi Aralıq dənizində Cənubi Kipr Rum Administrasiyasının atdığı addımlar səbəbilə sıxışdırılmaq istənilir. Lakin hazırkı konjonkturada Türkiyənin dövlət ağlına söykənən təmkinli və balanslı xarici siyasəti nəticəsində bu prosesi uğurla idarə etdiyini vurğulayan Özersay, “Bu mənzərədə qalib olan Türkiyədir”, – deyə qeyd edib.
Qara dənizdəki inkişaflara da toxunan Özersay, Türkiyə Prezidenti Rəcəb Tayyib Ərdoğanın Montrö Boğazlar Konvensiyası və İstanbul danışıqları çərçivəsində verdiyi açıqlamaların Rusiyaya açıq və aydın mesajlar ehtiva etdiyini bildirib. Bu mesajların həm Ukrayna, həm də Rusiya tərəfindən düzgün oxunmasının vacibliyini vurğulayan Özersay, güc balansı yerinə oturduqca prosesin daha aydın şəkildə görünəcəyini deyib.
“Cənubi Kipr rol qazanmaq ardınca düşüb”
Cənubi Kipr Rum Administrasiyasının son dövrdə atdığı addımları da dəyərləndirən Özersay, Rum lider Nikos Xristodulidisin İsrail, Fransa və ABŞ ilə həyata keçirdiyi təşəbbüslərin açıq şəkildə “rol qazanmaq” cəhdi olduğunu bildirib. Özersay, “Cənubi Kipr rəhbərliyi hazırda özünə böyük gələn bir pencəyi geyinməyə çalışır”, – ifadələrini işlədib.
Rum rəhbərliyinin Türkiyəyə qarşı hər fürsətdə Avropa Birliyi kartını masaya çıxardığını qeyd edən Özersay, bu siyasətin nəticə verməyəcəyini və sonda iflasa uğrayacağını söyləyib.
Özersay bildirib ki, Xristodulidisin KKTC Prezidenti Tufan Erhürmanı prosesdən kənarlaşdıraraq Kipr məsələsini birbaşa Türkiyə Prezidenti Rəcəb Tayyib Ərdoğanla müzakirə etmək istəməsinin arxasında Avropa Birliyinin dövr sədrliyi ilə bağlı hədəflər dayanır. Bu yanaşmanın qəbul edilməyəcəyini deyən Özersay, həmin xəttin yekun məqsədə çatmayacağını vurğulayıb.
“Xristodulidis ciddi səs itkisi yaşayır”
Kudret Özersay, həmçinin Cənubi Kiprdə Rum ictimaiyyətinin Xristodulidisə münasibətinin dəyişdiyini, onun ciddi səs itkisi ilə üzləşdiyini bildirib. Mövcud tendensiyanın davam edəcəyi təqdirdə Xristodulidisin növbəti prezident seçkilərində yenidən qalib gəlməsinin çətin olacağını qeyd edən Özersay, prosesin səbr və soyuqqanlılıqla izlənməsinin vacibliyini vurğulayıb.
SAMİRƏ
