Belçika polisi səhər tezdən Brüsseldəki Avropa Xarici Fəaliyyət Xidməti (EEAS) binasına və Brüggedəki Avropa Kollecinə basqın edib. Məlumatlara görə, polis Aİ vəsaitlərinin sui-istifadəsi şübhəsi ilə bağlı araşdırma aparır.
Şahidlərin sözlərinə görə, təxminən 10 mülki geyimli polis əməkdaşı EEAS-ın qərargahına daxil olaraq axtarış aparıb.
Brüssel və Brüggedə eyni vaxtda keçirilən reydlərdə polis üç nəfəri saxlayıb və dindirib. Məlumata görə, dindirmə tender saxtakarlığı, korrupsiya və maraqların toqquşması şübhələri əsasında aparılıb.
Basqınlarda zamanı rəqəmsal qeydlər, maliyyə sənədləri və məxfi sənədlər müsadirə edilib və üç nəfər saxlanıb.
İstintaqla tanış olan mənbələr təsdiqləyiblər ki, həm EEAS-a, həm də Avropa Kollecinə qarşı 2021 və 2022-ci illərdə AB vəsaitlərinin düzgün istifadə edilməməsi şübhələri ilə bağlı cinayət işləri başlanıb.
Son basqın Avropa Birliyi qurumları daxilində son illərdə baş verən ən böyük qalmaqallardan biridir.
1949-cu ildə Belçikanın Brügge şəhərində qurulan Avropa Kolleci, AB üçün diplomatlar və yüksək vəzifəli bürokratlar hazırlayan ən nüfuzlu aspirantura təhsil müəssisəsi kimi tanınır.
Məzunları arasında Avropa Komissiyasında, Avropa Parlamentində və üzv dövlətlərin hökumətlərində xidmət etmiş çoxsaylı yüksək vəzifəli məmurlar var. Kollec uzun müddətdir ki, "AB-nin diplomatik məktəbi" kimi tanınır.
İstintaqın mərkəzində Avropa Kollecinin Brüggedə AB Diplomatik Akademiyası üçün 3,2 milyon avroya bina alması dayanır.
Binanın maliyyə çətinlikləri dövründə və tenderin dərc olunmasından qısa müddət əvvəl alınması, EEAS tərəfindən sonradan 654.000 avro maliyyə ilə satın alınması prokurorlar tərəfindən şübhəli əməliyyat kimi araşdırılır.
İddia edilir ki, Kollecin və ya onun nümayəndələrinin gizli tenderlə bağlı məlumatlara əvvəlcədən çıxışı olub.
Qeyd edilir ki, həm Avropa Kollecinə, həm də AB Diplomatik Akademiyasına rəhbərlik etmiş Federika Mogerini (keçmiş AB Xarici Siyasət üzrə Ali Nümayəndəsi) istintaqın mərkəzində olanlar arasındadır.
Mogerini 2014-cü ildən 2019-cu ilə qədər EEAS-a rəhbərlik edib, 2020-ci ildə isə Avropa Kollecinin rektoru olub. 2022-ci ildə isə Diplomatik Akademiyaya rəhbərlik edib.
TAHİR
