Rusiyalı siyasi fəal və keçmiş dünya şahmat çempionu Harri Kasparov Vaşinqtonda keçirilən Halifax Təhlükəsizlik Forumundakı çıxışında Qərbi və NATO-nu sərt tənqid edib. Ukraynanın Rusiyaya qarşı mübarizəsinin vacibliyinə diqqət çəkən Kasparov bildirib ki, əgər Ukrayna bu razılaşmanı bağlamağa məcbur edilərsə, Putin öz arzusunu gerçəkləşdirəcək.
"NATO güclü deyil. NATO deyə bir şey yoxdur. Bu, saxta bir strukturdur. N-A-T-O, sadəcə dörd hərfdən ibarətdir. Əgər siz hələ də burada oturub bayram edirsinizsə, bu, ukraynalıların hər dəqiqə ölməsi ilə bağlıdır. Bu, böyük bir fədakarlıqdır" – deyən Kasparov NATO-nun hazırkı vəziyyətini tənqid edib.
Kasparov NATO-nun çəkindirmə gücünə şübhə ilə yanaşıb: "Latviyada Kanadanın rəhbərlik etdiyi bir briqadanız var, çox gözəl. Bəs bu briqadanın işi nədir? Ruslar sərhədi keçsə, atəş açacaqlarmı? Cavabı bilirik. Danışıqlar uzun çəkəcək."
Ukraynanın Avropa üçün qalxan rolunu oynadığını bildirən Kasparov bildirib ki, əgər Ukrayna mövcud olmasaydı, Rusiyanın qarşısında dayanmasaydı, Rusiya tankları çoxdan Polşada olardı: “Hamınız Ukraynanın təslim olacağını düşünürdünüz. Hətta Zelenskiyə ölkəni tərk etmək üçün nəqliyyat vasitəsi də təklif etdiniz. O isə "Mənə nəqliyyat vasitəsinə yox, sursata ehtiyacımız" dedi. Dörd ildir ki, Ukrayna bütün Avropa uğrunda vuruşur. NATO tək bir müharibə üçün yaradılıb: azad Avropanı Rusiya təcavüzündən qorumaq. Ukrayna bu müharibədə vuruşan yeganə ölkədir və biz hələ də onları ittifaqa daxil edib-etməməyi müzakirə edirik. Ukrayna NATO-nun vəzifəsini yerinə yetirən yeganə ölkədir və biz onlara hər şeyi borcluyuq".
Kasparov, Trampın liderliyində Ukrayna ilə bağlı potensial bir sövdələşməni isə "daşınmaz əmlak sövdələşməsi" adlandırıb. "Trampın biznes tərəfdaşı tərəfindən bağlanan bir sövdələşməni necə ciddiyə ala bilərik? Bu, Trampın ailəsini zənginləşdirmək və Ukraynanı satmaq üçün hazırlanmış bir daşınmaz əmlak sövdələşməsidir".
Rusiyanın Şimali Koreya, Kuba və Afrikadan könüllü döyüşçülər cəlb etdiyini xatırladan Kasparov, Qərbin hazırkı vəziyyətini tənqid edib: "Bütün hərbi, siyasi və iqtisadi qüvvələrin bizim tərəfimizdə olmasına baxmayaraq, müharibəni uduzuruq."
"Ukrayna sayəsində Rusiya Putinin Rusiya İmperiyasını yenidən qurmaq arzusunu gerçəkləşdirə bilmir. Amma Allah qorusun, Ukrayna bu sövdələşməyə getməyə məcbur edilərsə, Putin öz arzusunu gerçəkləşdirəcək. Və sonra, cənablar, növbə sizə gələcək. Amma siz döyüşməyə hazır deyilsiniz".
TAHİR
