Tramp administrasiyası keçmiş prezident Co Baydenin dövründə ölkəyə gələn qaçqınların işlərini yenidən araşdırmağı qərara alıb. Bu, onların ABŞ-da qalmalarına mane olacaq potensial səbəbləri müəyyən etmək üçün misli görünməmiş fəaliyyətin bir hissəsidir.
ABŞ Vətəndaşlıq və İmmiqrasiya Xidmətlərinin rəisi Cozef Edlou tərəfindən 21 noyabr tarixində imzalanan memorandumda agentlik rəsmilərinə 20 yanvar 2021-ci il ilə 20 fevral 2025-ci il tarixləri arasında - dörd illik müddət ərzində ABŞ-a daxil olan qaçqınların işlərinə yenidən baxılması tapşırılır.
Edlou bu müddət ərzində qəbul edilən bütün qaçqınların işlərinə baxmağı və potensial olaraq onlarla yenidən müsahibə aparmağı tapşırıb. Onun yazdığına görə, bu araşdırmalar və təkrar müsahibələr həmin şəxslərin ABŞ-a daxil olduqda qaçqın statusuna cavab verib-vermədiyini və onları ABŞ-ın daimi sakinləri olmaq hüququndan məhrum edəcək hər hansı hüquqi maneələrin olub-olmadığını müəyyən etməyə yönələcək.
Memorandumda, həmçinin, göstərilən müddət ərzində ölkəyə buraxılan qaçqınlar tərəfindən təqdim edilən bütün yaşıl kart (və ya daimi yaşayış) üçün baxılmamış müraciətlərə qeyri-müəyyən müddətə fasilə verilib. Edlou qeyd edib ki, müraciət edənlər yaşıl kart işlərinin rədd edilməsinə qarşı apelyasiya şikayəti verə bilməzlər. Memoranduma əsasən, qaçqınlar və ya əsas müraciət edənlər ailə üzvləri ilə gəldikləri təqdirdə işləri rədd edilərsə, qohumlarının işləri də rədd ediləcək və onlar qaçqın statusundan məhrum ediləcəklər. Üstəlik, ərizələri rədd edilənlər deportasiya prosesinə cəlb edilə bilər.
Qeyd edək ki, ABŞ qanunvericiliyinə əsasən, qaçqınlar qəbul edildikdən bir il sonra daimi yaşayış hüququna malikdir.
SAMİRƏ
