Rusiya prezidenti Vladimir Putin ABŞ-ın yeni seçilmiş prezidenti Donald Trampla mümkün görüşü zamanı NATO-nun şərq sərhədlərindən çəkilməsini istəyəcək. Bu barədə "Financial Times" Kremlə yaxın mənbələrə istinadən məlumay yayıb.
Bildirilir ki, Putinin danışıqlarda əsas məqsədlərindən biri Ukraynanın heç vaxt NATO üzvü olmayacağına və ABŞ-ın başçılıq etdiyi alyansın şərqdəki hərbi aktivlərinin bir qismindən imtina edəcəyinə dair təminat əldə etməkdir.
Rusiyanın Tramp administrasiyası ilə təhlükəsizlik sahəsində yeni razılaşmalar üzrə danışıqlara hazırlaşdığı bildirilən xəbərdə qeyd edilir ki, Kreml NATO-nun genişlənməsi ilə bağlı narahatlığını Trampın əvvəlki "Putinin narahatlığını başa düşürəm" sözləri ilə əlaqələndirib.
"Putin müharibədən sonrakı beynəlxalq nizamın Rusiya üçün təhlükə yaratmayacaq şəkildə yenidən qurulmasını istəyir. Ancaq bu kontekstdə dünyanın necə şəkillənəcəyindən narahatdır", - Kremldəki mənbə bildirib. İ
Trampın bundan əvvəl NATO-nun genişlənməsini tənqid etməsi və Ukraynanın üzvlük prosesini şübhə altına alması Kreml tərəfindən diqqətlə izlənilir. Trampın sələfi Baydeni Ukraynanı NATO-ya daxil etmək cəhdlərinə görə, tənqid etməsi də Moskvanın gözləntilərini artırır.
Trampın yanvarın 20-də andiçmə mərasimindən sonra Putinlə mümkün görüşlə bağlı planların dəqiqləşəcəyi gözlənilir. İki lider arasında aparılan danışıqların beynəlxalq təhlükəsizlik tarazlığına ciddi təsir göstərə biləcəyi bildirilir.
Tramp administrasiyasının Kremlin bu tələblərini necə qarşılayacağı və bu prosesdə NATO-nun şərqə genişlənmə siyasətinin necə formalaşacağı maraqla gözlənilir.
TAHİR
