Türkiyədə yeni doğulmuş körpələri özəl xəstəxanalara göndərərək külli miqdarda qazanc əldə edən və səhlənkarlıq edərək onların ölümünə səbəb olan dəstə ilə bağlı yeni təfərrüatlar üzə çıxdıqca ölkədə bu olay üzərindən yaranan qəzəb dalğası daha da artır.
Xatırladaq ki, araşdırmalarla bir qrup şəxsin əməlləri nəticəsində 12 körpənin öldüyü məlum olub. "Yenidoğan" dəstəsi adı verilən qruplaşma bir neçə özəl xəstəxana, eləcə də 112 "qaynar xətti"ndə işləyən şəxslərlə əlbir olaraq körpələri həmin tibb müəssisələrinin yenidoğulmuşlar üçün nəzərdə tutulan bölmələrinə yerləşdirib.
Araşdırmalardan bəlli olur ki, barəsində bəhs olunan özəl xəstəxanalar pasiyentlərin effektiv müalicəsi üçün zəruri resurslara malik olmayıb. Buna rəğmən, dəstə üzvləri uşaqların mövcud vəziyyətini olduğundan daha ağır göstərərək uzun müddət orada qalmalarını təmin edib. Nəticədə isə Sosial Təminat Qurumundan yüksək məbləğdə vəsait əldə ediblər. Onlar, eyni zamanda xəstə yaxınlarından əlavə pul da alıblar. Bununla yanaşı, körpələrin tənəffüs yollarının müalicəsində istifadə edilən dərmanlar işlədilmiş kimi göstərilərək üçüncü tərəfə satılıb. Onlar uşaqların xəstə olduğunu iddia etmək üçün qan testlərini də saxtalaşdırıb. Bu yolla gündəlik hər xəstə üçün 8000 türk lirəsi əldə ediblər. Fırat Sarı adlı şəxsin rəhbərlik etdiyi bu dəstənin əməlləri nəticəsində 12 körpə vəfat edib. Yeni doğulmuş körpələrin bəzilərinin infeksiya səbəbindən öldüyü qeyd olunub. Sağ qalan körpələrin əksəriyyətinin səhhətində isə ciddi problemlər yaranıb. 47 nəfər bu məsələdə şübhəli bilinir. Onlardan 27-si artıq həbs edilib. Bakırköy Respublika Prokurorluğunun hazırladığı 1399 səhifəlik iddianamədə sadalanan 197 cinayət hadisəsinin qeydlərində şəbəkə üzvləri bir-birinə körpə ölümlərini danışarkən gülüb zarafatlaşırlar. Dəstənin başçısı olduğu bildirilən həkim Fırat Sarı bu məsələdə xüsusi fəallıq nümayiş etdirib. Ümumiyyətlə, bir çox tibb işçilərinin qeydlərində körpə ölümlərinə biganə qaldıqları, körpələr ölərkən bir-birilə zarafatlaşdıqları, bu hərəkətləri sırf pul qazanmaq üçün etdikləri, körpə ölümlərindən narahat olmadıqları, əsl ölüm səbəblərini gizlətməyə çalışdıqlarını bildirirlər. Sağlam yeni doğulmuş körpələrin "ölümünə səbəb olan" və ya ölmək üzrə olan körpələri ailələrindən daha çox pul almaq üçün "yaşamağa" məcbur edən dəstəyə qarşı ittiham aktında olduqca maraqlı nüanslar yer alır. Səhiyyə Nazirliyinin hazırladığı müfəttiş hesabatı da ittiham aktında yer alıb. İstintaqın aparıldığı xəstəxanalarda dünyasını dəyişən körpələrlə bağlı vəziyyətin tək-tək araşdırıldığı hesabatda diqqəti çəkən detallara yer verilib. Məsələn, Ayaz K. adlı körpənin 26 noyabr 2023-cü ildə dövlət xəstəxanasında doğulduğu və ilkin olaraq sağlam olan körpədə ürək çatışmazlığı inkişaf etdiyi üçün özəl xəstəxanaya köçürüldüyü bildirilib. Körpənin göndərildiyi özəl xəstəxananın reanimasiya bölməsinin şəraitinin qeyri-kafi olduğu bildirilən hesabatda şübhəli tibb bacısı Çağla Durmuşun səlahiyyətində olmadan körpəyə müdaxilə etdiyi vurğulanır. O da qeyd olunub ki, körpənin ölümündə özəl xəstəxananın rəhbərlərinin də rolu var.
Saxlanılan şübhəlilərin vəkilinin istintaqı aparan prokuroru təhdid etməsinin gizli kamera qeydi jurnalist Emrullah Erdinç tərəfindən 11 oktyabr 2024-cü ildə ictimaiyyətlə paylaşılıb. İddianamədə Fırat Sarı, 112 Təcili Zəng Mərkəzinin təcili yardım sürücüsü Qıyasəddin Mert Özdemir və həkim İlker Gönen "təşkilat qurmaqda" ittiham olunur. İstintaq prokurorunu ailəsi ilə hədələyən vəkil Aylin Arslantatar və özünü müşavir kimi təqdim edən Mustafa Kamal Zengin adlı şəxs də həbs edilənlər arasındadır. İttiham aktının təfərrüatları mətbuatda dərc edildikdən sonra hadisədə iştirak etdiyi iddia edilən 10 xəstəxananın lisenziyası ləğv edilib. Lisenziyaları ləğv edilən xəstəxanalar bunlardır: Özəl Avcılar Xəstəxanası, Özəl TRG Hospitalist Xəstəxanası, Özəl Birinci Xəstəxana, Özəl Güney Xəstəxanası, Özəl Bağcılar Medilife Xəstəxanası, Özəl Beylikdüzü Medilife Xəstəxanası, Özəl Reyap İstanbul Xəstəxanası, Özəl Silvate İstanbul Xəstəxanası, Özəl Bağcılar Xəstəxanası Xəstəxanası və Çorlu Reyap Xəstəxanası. Səhiyyə naziri Kamal Memişoğlu bildirib: "Artıq on xəstəxananın xəstəxana vəsiqələri əllərindən alındı, onlar artıq xəstəxana deyil. Bu qurumlara xəstələrin qəbul edilməsi dayandırılıb və onlarda olan xəstələr köçürülüb". Türkiyə prezidenti Rəcəb Tayyib Ərdoğan Memişoğlu və ədliyyə naziri Yılmaz Tunçla görüşüb və məsələ ilə bağlı məlumat alıb. Daxili işlər naziri Əli Yerlikaya bildirib: "Haqsız qazanc əldə etmək üçün cənnət körpələrimizin həyatını heçə sayan bu vicdansız insanların öz cəzalarını alması üçün məsələni diqqətdə saxlayacam". CHP sədri Özgür Özəl dəstəni araşdırmaq üçün partiya nümayəndələrindən ibarət heyət yaradıldığını açıqlayıb. CHP-nin sözçüsü Deniz Yücel Memişoğlunu istefaya çağıraraq qeyd edib: "Başqa ölkədə olsaydı, hökumət istefa verərdi. Bizdə məsul siyasətçilər həyasızlıqla kresloya yapışırlar".
Nahid SALAYEV
