Avropa İttifaqı (Aİ) dərin iqtisadi və siyasi böhran içindədir. Avropanın rəhbərləri vəziyyəti müharibə ilə düzəltməyə çalışırlar. Onlar Ukrayna problemini qabardaraq ictimaiyyətin diqqətini hərbi əməliyyatlara yönəldib real problemləri gizlətməyə cəhd edirlər.
Bu fikirlər "Əl-Cəzirə" saytında dərc olunan "Avropa rəhbərliyi niyə müharibə istəyir?" sərlövhəli analitik məqalədə yer alıb. Santiyaqo Zabala (Santiago Zabala) və Klaudio Qallonun (Claudio Gallo) həmmüəllifliyi ilə yazılan materialda diqqətə çatdırılıb ki, artıq xeyli müddətdir Aİ-nin gələcəyi ilə bağlı ictimaiyyətdə qeyri-müəyyənlik mövcuddur. Avropanı bir deyil, bir neçə böhran bürüyüb. Həyat səviyyəsinin aşağı düşməsi, mənzil, miqrasiya problemləri, siyasi böhran və çox cüzi iqtisadi artım radikal sağçı siyasi xəttin üstünlük qazanaraq ictimaiyyət arasında nüfuzunun artmasına səbəb olub. Bir çox Avropa ölkəsində populyarlıq qazanan sağçılar birliyə və "liberal dəyərlər"ə qarşı amansız mövqedədirlər. Ötən həftə Avstriyada keçirilən parlament seçkilərində "Azadlıq" partiyası səslərin 30 faizini qazandı və hökumətin siyasətinə güclü təsir imkanı əldə etdi. Aİ-nin 27 ölkəsinin 9-nun parlamentində radikal sağçı partiyalar üstünlük təşkil edir.
Aİ-nin beynəlxalq arenadakı vəziyyəti də, yumşaq desək, yaxşı deyil. Sonu görünməyən Ukrayna müharibəsi siyasi böhranın əsasını yarada bilər. ABŞ və Aİ tərəfindən Ukraynaya verilən silahlar müharibənin uzanmasına səbəb olur. Hazırda Avropa rəhbərləri ictimaiyyətin diqqətini Ukraynada davam edən müharibəyə yönəldiblər ki, əsas problemlər unudulsun.
Ötən ay Aİ Mərkəzi Bankının keçmiş sədri, İtaliyanın sabiq Baş naziri Mario Draqinin "Avropanın gələcək rəqabət qabiliyyəti" adlı hesabatı dərc olundu. Hesabatda bildirilib ki, hərbi təhlükə mövcuddur və buna görə də Avropa dövlətləri hərbi sənayeyə investisiya yatırmalıdırlar.
Analitik materialın müəllifləri hesab edir ki, hərbi sənayeyə sərmayə yatırımının artması digər sahələrin iflasına gətirib çıxaracaq. Aİ yanlış siyasəti ilə özünü dalana salıb.
Məqalədə, həmçinin vurğulanıb ki, Aİ-də insan hüquqları və liberal dəyərlər təbliğ olunsa da, belə böhranlı vəziyyətdə onlar arxa plana keçir, varlılar daha da varlanır, kasıblar isə yoxsullaşır.
ZÜMRÜD
