ABŞ Rusiyaya ballistik raketlər verdiyinə görə İrana sanksiya tətbiq etdi - 5 gəmi müsadirə ediləcək...
ABŞ Rusiyaya ballistik raketlər verdiyinə görə İrana qarşı sanksiyalar tətbiq edib. Məlumata görə, İran və Rusiyanın 10 fiziki və 6 hüquqi şəxsi, eləcə də Tehranın Rusiyaya silah, o cümlədən pilotsuz uçuş aparatlarını tədarük etdiyi bir neçə gəmsi ABŞ-nin Maliyyə Nazirliyi tərəfindən elan edilmiş sanksiyalar siyahısına daxil edilib.
Bununla yanaşı, ABŞ İranın aparıcı aviaşirkəti "Iran Air"ə əlavə məhdudiyyətlər qoyub. Eyni zamanda, Dövlət Departamenti üç təşkilatı sanksiyalar siyahısına daxil edib və İranın silah sistemlərinin Rusiyaya tədarükündə iştirak edən 5 gəminin müsadirəsinə qərar verib.
Bu arada, Fransa, Almaniya və Britaniya birgə bəyanat yayaraq İran tərəfindən Rusiyaya ballistik raketlərin verilməsini Avropanın təhlükəsizliyi üçün birbaşa təhdid adlandırıblar.
"İran tərəfindən ballistik raketlərin ixracını və Rusiya tərəfindən alınmasını kəskin şəkildə pisləyirik. İranın hərbi dəstəyi Rusiyanın Ukraynaya qarşı təcavüzkar müharibəsinin daha da genişlənməsidir və bu İran raketlərinin Avropa ərazilərinə düşməsinə səbəb olacaq. Bu hərəkət İran, eləcə də Rusiya tərəfindən eskalasiyadır və Avropanın təhlükəsizliyi üçün birbaşa təhdiddir.
Rusiyaya raket verilərsə, İrana qarşı yeni və mühüm tədbirlər görəcəyimizi şəxsi söhbətlərdə və açıq şəkildə bildirmişdik. İndi bizim, İranın bunları həyata keçirdiyinə dair sübutumuz var. İranla ikitərəfli hava xidmətləri müqavilələrini ləğv etmək üçün təcili addımlar atacağıq. Bundan başqa, İranın ballistik raket proqramı, ballistik raketlər və digər silahların Rusiyaya verilməsi ilə əlaqəli mühüm hüquqi və fiziki şəxslərə qarşı sanksiyalar tətbiq edəcəyik. Biz həmçinin İranın dövlət aviaşirkətinə qarşı sanksiyaların tətbiqi üzərində işləyəcəyik" – deyə birgə bəyanatda bildirilir.
Üç ölkə İranı Ukrayna ilə müharibədə Rusiyaya istənilən dəstəyi dərhal dayandırmağa və ballistik raketlərin istehsalını və ixracını dayandırmağa çağırıb.
Qeyd edək ki, artıq Britaniya da İran və Rusiyaya qarşı sanksiyalar tətbiq etdiyini elan edib.
TAHİR
