Sahil Kərimli: "Aldığı siyasi və maliyyə dəstəyi səbəbindən rəsmi Kiyev artıq Vaşinqtonun girovuna çevrilib"
NATO-nun Vilnüs sammiti çərçivəsində ABŞ və Ukrayna prezidentləri Cozef Bayden və Volodimir Zelenski arasında görüş olub.
Görüşdə iki dövlət başçıları Amerikanın uzaqmənzilli raketlərinin Ukraynaya təhvil verilməsi və F-16 qırıcılarının tədarükü perspektivlərinə toxunublar.
ABŞ-ın milli təhlükəsizlik müşaviri Ceyk Sallivan görüşdən əvvəl deyib ki, Bayden Zelenskiyə sammitdə ölkənin NATO-ya qəbul edilməməsinin səbəbini açıq şəkildə izah edəcək.
F-16 qırıcılarının tədarükünə gəlincə, Sallivanın qeyd etdiyi kimi, onlar Ukrayna Silahlı Qüvvələrinə bu təyyarələrə malik olan Avropa ölkələri tərəfindən veriləcək.
ABŞ Prezidenti Cozef Bayden Ukrayna Prezidenti Volodimir Zelenski ilə görüşündə deyib ki, dünya dövlətləri Ukrayna sayəsində birləşib: "Lakin Kiyev bunun üçün çox yüksək bədəl ödəyib. Ukraynada baş verənlər çox üzücüdür, amma yaxşı xəbər odur ki, dünya birləşir. İnsanlar başa düşürlər ki, baş verənləri sadəcə izləmək olmaz".
Bayden-Zelenski görüşünün Ukraynadakı müharibəyə nə kimi təsiri olacaq?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, son aylarda İsrail-HƏMAS qarşıdurması səbəbilə Rusiya-Ukrayna savaşı bir qədər arxa plana keçsə də, Amerika və Avropa dairələri yenidən müharibəni qızışdırmaq üçün hərəkətə keçiblər: "Təxminən iki yaxındır ki, Avropa ölkələri Ukraynaya yardımlara müəyyən qədər ara vermişdi, hətta ABŞ Senatı Kiyevə hərbi yardımların dayandırılması istiqamətində addımlar atırdı. Amma bir neçə gün əvvəl prezident Bayden yeni hərbi yardım paketini təsdiqlədi və Ukraynaya yardımları davam etdirdi. Bu günlərdə isə ABŞ və Ukrayna prezidentlərinin görüşü, aparılan danışıqlar və bu ölkəyə açıq dəstək onu deməyə əsas verir ki, Amerika müharibəni qızışdırmaqda maraqlıdır. Görünən odur ki, yaxın günlərdə Rusiya-Ukrayna müharibəsi yenidən alovlanacaq. Biz açıq-aydın görürük ki, tərəflər danışıqlar masasına oturmaqdan boyun qaçırır, Qərb dairələri də prosesdə qızışdırıcı mövqe tutur. Bu isə bölgənin gələcəyi, ümumiyyətlə Rusiya-Ukrayna müharibəsinin taleyi üçün yaxşı heç nə vəd etmir. ABŞ Nümayəndələr Palatasının üzvü Marjorie Taylor Greene bəyan edib ki, ABŞ administrasiyası Ukraynada münaqişəyə son qoyacaq sülh sazişində maraqlı deyil, çünki o, müharibə istəyir. Sirr deyil ki, rəsmi Vaşinqtonu heç də Ukraynanın və ya Yaxın Şərqin taleyi düşündürmür. ABŞ-ın strateji məqsədi bölgədəki təsir gücünün artırılması və Rusiyanın qismən zəifləyərək idarə olunan vəziyyətə salınmasıdır. Bu məqsədlə Birləşmiş Ştatlar əvvəlcə Ukraynanı, demək olar ki, "bataqlığa" çevirdi, sonra da Rusiyanı bu "bataqlığa" saldı.
Əks-hücum əməliyyatları ciddi nəticə vermədiyindən güman etmək olar ki, Ukrayna Prezidenti Zelenski artıq müharibəni dayandırmaq barədə düşünür. Üstəgəl, ölkənin böyük bir hissəsinin müharibə nəticəsində xarabalığa çevrildiyini də nəzərə almaq lazımdır.
Dağıntıların bərpası üçün uzun illər lazımdır. Amma digər tərəfdən Zelenski geri də çəkilə bilmir. Belə ki, aldığı siyasi və maliyyə dəstəyi səbəbindən rəsmi Kiyev artıq Vaşinqtonun girovuna çevrilib. Ukrayna ABŞ-ın iradəsinə zidd olaraq danışıqlar istiqamətində addım atsa, Ağ Ev onsuz da hər ötən gün azaltdığı dəstəyi tamamilə dayandıra bilər. Bu isə Ukrayna üçün fəlakət deməkdir".
Məhəmmədəli QƏRİBLİ
