Tural İrfan: "...Bu ilk növbədə dini, irqi ayrıseçkilikdir və beynəlxalq hüquqa, insan haqlarına zidd olan bir qərardır"
"Demokratiya carçısı" Avropada uzun illərdir ki, ksenofobiya, milli-dini ayrı-seçkilik, irqçilik, qeyri-xristian toplumlara dözümsüz münasibət dalğası başlayıb. Fransa kimi dövlətlərdə bu dalğanı yaradıb cəmiyyətə salan elə hökumətin özüdür.
Bu gün Avropada antiislam ab-havası daha da kəskinləşib və bu da müsəlmanların hüquqlarını pozan yanlış bir qərarın verilməsi ilə nəticələnib. Əvvəllər islam dini simvollardan istifadə ilə bağlı Avropa ölkələri cəmiyyətlərində problemlər yaşanırdısa, indi artıq dövlətlər özləri dövlət qurumlarında çalışan müsəlmanlara bu barədə icazə verməyəcəklər. BBC-nin yaydığı məlumata görə, Avropa İttifaqının Ədalət Məhkəməsi üzv dövlətlərə dövlət qulluqçuları üçün dini simvolların qadağan edilməsinə icazə verib.
Qeyd olunur ki, Avropa İttifaqının Ədalət Məhkəməsi qərar verib ki, Aİ-yə üzv ölkələrin dövlət orqanları öz dövlət qulluqçularının dini inancları ilə bağlı atributları, o cümlədən burqa və hicab geyinilməsinə icazə vermək və ya qadağan etmək hüququna malikdir.
Yeni məhkəmə prosesinin səbəbi ölkənin şərqindəki Lyej əyalətində yerləşən Belçikanın Anse şəhərində baş verən son epizod olub. Orada yerli bələdiyyə işçisinin iş yerində hicab taxması qadağan edilib. Qadın din azadlığı hüququnun pozulduğunu iddia edərək məhkəməyə müraciət edib.
Əvvəllər bələdiyyə iş şərtlərini dəyişdirərək, işçilərindən geyim seçimində ciddi neytrallığı qorumağı, dini və ya ideoloji inanclarını açıq şəkildə nümayiş etdirməkdən çəkinməyi tələb edirdi. İddiaçı ofis meneceri vəzifəsində çalışıb və buna görə də quruma gələnləri qəbul etməyib. Avropa İttifaqının Ədalət Məhkəməsi bildirib ki, "neytral inzibati mühitin yaradılmasına" yönəlmiş ciddi geyim neytrallığı siyasəti haqlı sayıla bilər.
Məhkəmənin qərarında deyilir ki, başqa bir administrasiya öz işçilərinə dini inanclarını vurğulayan atributlar geyinməyə icazə versə, onun da bunu etmək hüququ olacaq.
Məhkəmə vurğulayıb ki, Aİ-yə üzv dövlətlərin hakimiyyət orqanları öz dövlət qulluqçularının geyim tərzində "neytrallıq" parametrlərini müstəqil müəyyən etmək hüququna malikdirlər. Bununla belə, siyasət "ardıcıl və sistemli şəkildə" həyata keçirilməli və tədbirlər ciddi şəkildə zəruri olanlarla məhdudlaşdırılmalıdır, məhkəmə qeyd edib.
Avropada uzun illərdir ki, ənənəvi müsəlman geyiminin, əsasən də qadınlar üçün məqbul olması ilə bağlı mübahisələr səngimir. Fransa 2010-cu ildə ictimai yerlərdə üzü örtən müsəlman paltarı geyinməyi qadağan edən ilk Aİ ölkəsi olub.
Bu il Fransada müsəlman məktəbli qızlara ənənəvi xalat paltarı olan abaya geymək də qadağan edilib. 2017-ci ilin aprel ayının sonunda Bundestaq dövlət qulluğunda olan qadınlara niqab və burqa kimi üzlərini örtən baş örtüyü taxmağı qadağan edən qanun qəbul edib. 2018-ci ildə Danimarkada ictimai yerlərdə üzünü örtmək qadağası qüvvəyə minib. Bu ölkədə ictimai yerlərdə niqab taxmağa görə ilk cərimə verilib. BBC-yə görə, "Human Rights Watch" qadağanı ayrıseçkilik adlandırıb və bunun təhlükəli tendensiyanın davam etdiyini bildirib.
XXI əsrdə Beynəlxalq Ədalət Məhkəməsinin verdiyi qərar birbaşa irqçiliyə rəvac verir. Bu nə irqçilikdir, bu nə irqçi qərardır? Necə yəni dövlət qulluqçularına dini simvol daşımaq qadağan olunub? Belə hal olar? İnsanlar Avropada da dini inanc azadlığına sahib deyil ki?
"Bu, müsəlmanlara qarşı bir təzyiq vasitəsidir"
Milli Cəbhə Partiyasının sədr müavini, ilahiyyatçı Tural İrfan "Bakı-Xəbər"ə şərhində bildirdi ki, bu, Avropada hökm sürən irqçiliyin, dini, milli ayrıseçkiliyin təzahürlərindən biridir. "Hər şeydən əvvəl onu bildirim ki, Avropa İttifaqının Beynəlxalq Ədalət Məhkəməsi, adından da göründüyü kimi, hüquqi bir instansiyadır, əsasən insan hüquqları ilə bağlıdır. Burada söhbət müsəlmanların dini atributlarının qadağasından gedirsə, bu ilk növbədə dini, irqi ayrıseçkilikdir və beynəlxalq hüquqa, insan haqlarına zidd olan bir qərardır. Ola bilsin, orada simvolik olaraq hansısa terminlər işlətsinlər ki, bu təkcə müsəlmanlara qarşı deyil, bütövlükdə bütün dinlərə qarşıdır. Amma bu elə deyil. Qərardan da görsənir ki, əsas məqsəd, hədəf müsəlman dini mənsublarıdır və bu qadağalar onlara aiddir.
O zəmini də vaxtilə onlar özləri yaradıblar"-deyə T.İrfan vurğuladı.
İlahiyyatçı hesab edir ki, müsəlmanlardan ibarət hansısa radikal, aqerssiv bir qrup varsa həmin Avropanın özü onların yetişməsi üçün zəmin hazırlayıb, məqsəd də bugünkü gün bu cür qərarlar qəbul edib islamafobiya, müsəlmanlar əleyhinə müxtəlif təzyiqlər göstərsinlər, müsəlman ölkələri əleyhinə müəyyən təsir vasitələri əldə etmiş olsunlar. "Bu birinci növbədə beynəlxalq hüquqa ziddir. Burada təkcə müsəlmanların dini atributlarının qadağan edilməsi islamafobiyanın, kesonofobiyanın, ayrıseçkiliyin təzahürüdür. İstər hicab, istərsə də digər atributlar olsun, onların qadağan olunması qanunauyğun deyil. Onların şərq aləmindən, xüsusən də islam dünyasından tələb etdi "demokratiya" və "insan haqları və hüquqlarına" birbaşa zidd olan məsələdir".
T.İrfanın sözlərinə görə, Avropanın bizə təqdim etdiyi qondarma və əxaqsızlıq təbliğatı kəsb edən məsələni də islam aləmi qadağan edə bilər, etməlidir də. Avropa əslində "Avropa mədəniyyəti", "Avropaya inteqrasiya" adı altında özünün tətbiq ediyi məsələlərlə müsəlmanların kökünü kəsmək istəyir. "Onların bizə təqdim etdiyi "dəyərlərin", tövsiyələrin altında əslində missionerlik, antiislam səlibçi təfəkkürü yatır"-deyə qeyd edən T.İrfanın sözlərinə görə, əslində Azərbaycanda xarici təşkilatların iddia etdiyi məsələlər baş verməyib, sadəcə onlar qaşınmayan yerdən qan çıxarıb maliyyə yardımı etməklə bəzi QHT-lər, təşkilatlar vasitəsilə belə məsələləri müsəlman ölkələrində qabardırlar. "Bu əslində Avropanın islam aləminə bir təzyiq vasitəsidir. Məhkəmənin qəbul etdiyi qərara münasibətim mənfidir, bu, müsəlmanlara qarşı bir təzyiq vasitəsidir və qəbuledilməzdir.
Bir məqamı danmaq olmaz, olsa bilsin, hicabla, dini atributlarla monipulyasiya edən hansısa radikal qruplar olsun. Fəsad yaratmaq istəyən radikal qrupların yaradıcı isə onlar özləridir. ABŞ başda olmaqla, Qərb dövlətləri müsəlmanları radikallaşdırmaq istəyir, bəzi qruplara terror təşkilatları yaratmaları üçün zəmin hazırlayırlar, sonra da həmin təşkilatı bəhanə edib həmin ölkəni işğal və isitismar edirlər. Yaxud da müsəlman ölkələrinə qarşı bu cür çirkin qərarlar imzalayırlar"-deyə T.İrfan vurğuladı.
İradə SARIYEVA
