Avropa İttifaqı anti-Rusiya sanksiyalarının region ölkələrinin iqtisadiyyatına ziyan vurmasına baxmayaraq, Mərkəzi Asiyadan yan keçməsinə imkan verməyəcək. Bunu martın 27-də Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas Aşqabadda keçirilən Avropa İttifaqıyla Mərkəzi Asiya Nazirlərinin 20-ci görüşündə deyib.Sitat - "Avropa İttifaqı Rusiyanın döyüş maşınına zərbə vurmaq üçün 16 sanksiya paketi tətbiq edib və artıq 17-ci paket üzərində işləyirik. Mən başa düşürəm ki, bu sanksiyalar sizin iqtisadiyyatınıza zərər vurur, amma aydındır ki, biz hamımız bu müharibənin bitməsini istəyirik. Ona görə də Rusiya şirkətlərinin sanksiyalardan yan keçmək üçün Mərkəzi Asiyaya üz tutmasına imkan verilə bilməz", - sitatın sonu. Nazirlərin görüşündə Qazaxıstan, Qırğızıstan, Tacikistan, Türkmənistan və Özbəkistanın xarici siyasət idarələrinin rəhbərləri iştirak ediblər. Əsas müzakirə mövzusu aprelin 3-4-də Səmərqənddə keçiriləcək ilk Aİ-Mərkəzi Asiya sammitinə hazırlıq olub. Tərəflər həmçinin Ukraynadakı müharibənin nəticələrini, nəqliyyat və rəqəmsal əlaqənin inkişafı, enerji, ticarət, su ehtiyatları və başqa məsələləri müzakirə ediblər. Kaya Kallas Aşqabadda Türkmənistan prezidenti Serdar Berdiməhəmmədov və xarici işlər naziri Rəşid Meredov, həmçinin Tacikistanın xarici işlər naziri Sirociddin Muxriddin ilə ikitərəfli danışıqlar aparıb. Daha sonra Avropa Komissiyasının nümayəndəsi Özbəkistana gedib. Daşkənddə o, prezident Şavkat Mirziyoyev və xarici işlər naziri Bəxtiyor Saidovla görüşüb. Bu gün, martın 28-də isə Kallas Qazaxıstanda danışıqlar aparacaq. Onun Astanada prezident Qasım-Jomart Tokayev və xarici işlər naziri Murat Nurtleu ilə görüşü planlaşdırılır.
Surxay Əliyev
