Türkiyə hakimiyyəti indiyədək daxili siyasi vəziyyəti nəzarətdə saxlaya bilib və ölkənin hazırkı prezidenti Ərdoğan küçə təzyiqlərinə boyun əyib istefa verəcək siyasətçi deyil. Bu sözləri İrəvan Dövlət Universitetinin Şərqşünaslıq fakültəsinin dekanı, türkoloq Ruben Melkonyan Ermənistan xəbərləri – NEWS.am-ın “Güc faktoru” proqramında qonaq olarkən dilə gətirib. Onun sözlərinə görə, hakimiyyətlə Türkiyə müxalifəti arasında ideoloji müstəvidə ciddi döyüş gedir. Mübarizə mühafizəkar islamçı və dünyəvi kamalist ideyaları arasında gedir. Ərdoğan bu yolda onun əsas rəqibi, müxalifətdən olan İstanbul bələdiyyə başqanı Əkrəm İmamoğlunu sıradan çıxararaq, öz qələbəsini və ya varisinin qələbəsini təmin etmək istəyir. "Aksiyalar zamanı tələbələr daha fəaldırlar, etirazlara ölkədəki sosial-iqtisadi problemlər də təkan verib, lakin təhlükəsizlik qüvvələri Ərdoğanın təsiri altındadır, hakimiyyət elitasında isə çatlar nəzərə çarpmır. Eyni zamanda, hazırkı prezidentin də kifayət qədər öz tərəfdarları var və o, mitinqlər təşkil edə bilir. Bundan başqa, Ərdöğan bu cür çətin vəziyyətlərin həllində artıq kifayət qədər geniş təcrübəyə malikdir”, - deyə Melkonyan vurğulayıb. Onun fikrincə, Türkiyədə siyasi sahədə nəsil dəyişikliyi baş verir: həm iqtidar, həm də müxalifət növbəti mərhələyə hazırlaşır. “Müxalifətdə gələcək prezident seçkilərində ən real namizəd İmamoğludur, Ərdoğanın isə ən çox ehtimal olunan varisi həm Ərdoğandan, həm də İmamoğlundan natiqlik qabiliyyətinə görə zəif olan xarici işlər naziri Fidandır”, - deyə türkoloq qeyd edib. Melkonyan xatırladıb ki, hakimiyyətin ciddi rəqibi olan İmamoğlu martın 23-də rəsmən namizədliyini irəli sürməli idi. Ekspert hesab edir ki, hakimiyyətin hesablaması ona yönəldi ki, İmamoğlu hələ bələdiyyə sədri olduğu müddətdə və gələcək prezident seçkilərində vahid namizəd kimi irəli sürülmədiyi bir vaxtda müxalifətə indidən zərbə vurmaq daha məqsədəuyğundur ki, onu türklərin gözündə korrupsiyada ittiham edərək zəiflədə bilsin”. Melkonyan Ərdoğanın 2028-ci ildən sonra da siyasətdən getməsinə inanmadığını qeyd edərək, onun ölkə lideri olaraq qalması üçün bir yol tapacağını bildirib. Onun sözlərinə görə, son hadisələr göstərir ki, müstəqil Kürdüstanın yaradılması ilə bağlı şüarlar artıq puç olub.Belə ki, bu məsələ daha Türkiyə üçün heç bir siyasi təhlükə yaratmır. “Ərdoğan üçün bu, çox mühüm amildir, çünki o, hələ 1920-ci illərdən bəri yaranmış kürd problemini həll edə bilən yeganə siyasətçi kimi tarixə düşə bilər”, - deyə türkoloq bildirib. Erməni ekspertə görə, ABŞ və Rusiyanın hazırkı prezidentləri Ərdoğanla, Avropa ölkələri (Fransa, Almaniya və digər ölkələr) isə kamalistlərlə işləməyi daha üstün tuturlar. Və Türkiyənin daxili siyasi durumuna xarici təsir, o cümlədən əvvəllər olduğu kimi,ABŞ-ın göstərişi ilə dövlət çevrilişi həyata keçirən ordunun siyasətdə rolu xeyli zəifləyib”, - deyə Ruben Melkonyan fikirlərini yekunlaşdırıb.
Surxay Əliyev
