Parisdə və Fransanın digər şəhərlərində on minlərlə insan şənbə günü irqçiliyə və ifrat sağçıların yüksəlişinə qarşı mitinq keçirib,aksiyaçıların bir qismi ABŞ-da Donald Tramp administrasiyasını hədəfə alıb, digərləri isə Fələstin bayraqları ilə mitinqə qatılıblar. Bu barədə “France24” nəşri yazır. Polisin məlumatına görə, Fransada 62 minə yaxın insan etiraz aksiyası keçirib. Aksiya iştirakçıları həm Fransada, həm də ABŞ-da mürtəce siyasi qüvvələrin güclənməsinə etiraz ediblər. Fransa paytaxtında minlərlə insan küçələrə axışıb. Bir posterdə isə “Faşizm Vaşinqtondan Parisə qədər yayılan qanqrendir” yazılıb. 74 yaşlı təqaüdçü Evelin Duril deyib: “Avropanın hər yerində ifrat sağçıların çevrəsi böyüyür, bu, qorxuludur, çünki biz Fransada ifrat sağçı fikirlərin, hətta bu hökumətdəki nazirlər arasında belə adi hala çevrildiyini görürük”. Amerikalı etirazçılardan biri isə deyib ki, oxşar nümayişlər ABŞ-da da keçirilməlidir. Solçu "Fəth olunmamış Fransa" partiyasından olan millət vəkili Oreli Truv Fransada Marin Le Penin başcılıq etdiyi ifrat sağçı partiyaının artan populyarlığını nəzərdə tutaraq bildirib ki,“İfrat sağçı ideyalar hətta hökumətə belə nüfuz edir”.
Polisin məlumatına görə, ölkənin cənubundakı liman şəhəri Marseldə təxminən 3300, ölkənin şimalındakı Lilldə isə 2600 nəfər küçələrə çıxıb. Bəzi plakatlarda “Dövlət İslamofobiyasına qarşı” və “Tesla yeni svastikadır” sözləri yazılıb. Etirazlar Beynəlxalq İrqi Ayrı-seçkiliyin Aradan Qaldırılması Gününün ertəsi günü keçirilib. "Vəziyyət ciddidir" deyən İnsan Hüquqları Liqası irqçi hərəkətlərin "həyəcanverici artımına" işarə edib. SOS Racisme-in sədri Dominik Sopo da irqçi və antisemitizm aktlarının artdığını qeyd edərək, “Əcnəbilərə və onların uşaqlarına, müsəlmanlara qarşı bu gün qlobal şəkildə mürtəce hücum var” –deyə bildirib.
Surxay Əliyev
