ABŞ Prezidenti Donald Tramp Kremlin rəhbəri Vladimir Putinlə söhbətini “yaxşı və məhsuldar” adlandırıb. “European Pravda” xəbər verir ki, bu barədə Tramp özünün “Truth Social” sosial şəbəkəsində yazıb. Belə ki,Tramp Putinlə telefon danışığının çox yaxşı və məhsuldar olduğunu iddia edir. “Biz bütün enerji və infrastruktur obyektlərində dərhal atəşkəsə razılaşdıq.Nəhayət tam atəşkəsə və Rusiya ilə Ukrayna arasında bu dəhşətli müharibəyə son qoymağa sürətlə çalışacağımızı anladıq”, deyə o əlavə edib. Həmçinin, ABŞ prezidentinin sözlərinə görə, “sülh müqaviləsinin bir çox elementləri müzakirə olunub”. "Bu proses indi tam sürətlə davam edir və biz onu başa çatdıracağımıza ümid edirik!" – deyə ABŞ prezidenti yekunlaşdırdı. Məlum olduğu kimi, Vladimir Putin söhbət zamanı ABŞ-ın Ukraynanın razılaşdığı 30 günlük tam atəşkəs təklifini növbəti dəfə rədd edib. Bununla belə, o, tərəflərin 30 gün ərzində enerji obyektlərinə hücumlardan “çəkinmək” vədini dəstəkləyib. Tramp və Kreml lideri həmçinin Rusiya-Ukrayna müharibəsi üzrə sülh danışıqlarının “Yaxın Şərqdə dərhal başlaması” ilə bağlı razılığa gəliblər. Bu söhbətdən əvvəl Ağ Ev iddia edirdi ki, ABŞ prezidenti Rusiyanın Ukraynaya qarşı müharibəsini dayandırmaq üçün saziş bağlamaqda “qətiyyətli”dir və dünya sülhə yaxındır.
Surxay Əliyev
