Fransa prezidenti Emmanuel Makron Aİ ölkələrini Amerikadan müdafiə avadanlıqları almağı dayandırmağa və bunun əvəzinə avropalı istehsalçılara müraciət etməyə inandırmaq istəyir. Politico-nun məlumatına görə, o, bu barədə bir sıra Fransa KİV-lərinə müsahibəsində bildirib. Fransa prezidenti deyib ki, o, hazırda Amerikanın hərbi texnikasını “almaqda olan” digər Avropa ölkələrini də yerli silah variantlarına keçməyə inandırmaq istəyir. Sitat- "Gedib Amerika məhsullarını almağa öyrəşmiş Avropa ölkələrini razı salmaq niyyətindəyəm. Patriotu alanlara yeni nəsil Fransa-İtaliya SAMP/T hava hücumundan müdafiə sistemi təklif edilməlidir. F-35 alanlara Rafale təklif edilməlidir. Bu, istehsalın sürətini artırmağın bir yoludur", - sitatın sonu. Makronun bu açıqlamaları NATO-nun Avropa üzvlərinin Amerika silahlarından asılı olduğu bir vaxta təsadüf edir. Bəzi alyans dövlətləri artıq ABŞ-ın mövqeyi ilə bağlı narahatlıqlara görə Amerikanın beşinci nəsil F-35 qırıcılarının alınması planlarına yenidən baxacaqlarını bildiriblər. Bundan əvvəl mətbuatda Donald Trampın ABŞ-ın NATO-da iştirak siyasətində əhəmiyyətli dəyişikliklər etməyi düşündüyü barədə məlumatlar yayılmışdı.
Surxay Əliyev.
