The Wall Street Journal yazır ki, Putinin atəşkəs razılaşmasına qeyri-müəyyən yanaşması Trampı çətin vəziyyətə salıb. Putinin sülh istədiyini vəd edən və Kiyevə hərbi əməliyyatlarda 30 günlük fasilə verməsi üçün təzyiq edən Tramp, Kreml geri çəkiləcəyi təqdirdə Moskvaya qarşı yeni sanksiyaların tətbiqi ilə bağlı vəd etdiyi çətin qərarı verməli olacaq. Qəzet yazır: “Ancaq Moskvanı cəzalandırmaq, onun Rusiya ilə münasibətləri yaxşılaşdırmaq kimi məqsədini təhlükəyə ata bilər.İndi Trampın məqsədinə nail olub-olmaması onun müşavirlərinin Moskva ilə necə danışıqlar aparmasından asılıdır. Hansı ki,Rusiya rəsmiləri müharibəni bitirmək üçün danışıqlara başlamazdan əvvəl güzəşt tələb edə bilər ki,bu da Trampı çətin duruma sala bilər. Ancaq əsas sual budur ki, Putin Trampın təkid etdiyi kimi sülhə sadiqdirmi? Bununla belə, bir çox analitiklər Putinin son nəticədə bu və ya digər təklifə imza atacağına şübhə ilə yanaşırlar,- deyə The Wall Street Journal qeyd edir.
Trampın Senatdakı ən yaxın adamı senator Lindsi Qrem isə çərşənbə günü X səhifəsində yazıb: “Rusiyanın atəşkəsə razı olacağına və onların bu müharibəni bitirmək istəməsinə çox şübhə edirəm”. O, həmçinin bildirib ki, əks təqdirdə o,həftənin sonuna kimi Kremlə qarşı “sümük qıran sanksiyalar və tariflər” tətbiq edəcək. Eyni zamanda, The Wall Street Journal qeyd edir ki, Tramp həm Konqresdə, həm də xaricdə müttəfiqlərin Ukrayna danışıqlarına şübhə ilə yanaşılmasına dair heç bir əlamət hiss elətdirmir. Nəşr yazır: “Analitiklər qeyd edirlər ki, o, öz instinktləri ilə hərəkət edir və başqa fikirlərə çox az əhəmiyyət verir”. Məlum olduğu kimi,martın 11-də Səudiyyə Ərəbistanında Ukrayna və Amerika nümayəndə heyətlərinin görüşü baş tutub. Danışıqlardan məlum olub ki, Rusiya da eyni addımı atacağı təqdirdə Ukrayna ABŞ-ın 30 günlük atəşkəs təklifiylə razılaşıb. Martın 13-də isə ABŞ nümayəndələri Moskvaya oxşar təkliflə çıxış etmək məqsədi ilə Rusiyaya səfər ediblər. Rusiya lideri Vladimir Putin atəşkəsin əleyhinə olmadığını desə də, Ukraynadan səfərbərliyi və hərbi kadrların hazırlanmasını dayandırmağı və müttəfiqlərindən silah almamağı tələb edib. Ukrayna prezidenti Vladimir Zelenski isə o fikirdədir ki, Putin hazırda ABŞ-ın müharibədə 30 günlük atəşkəs təklifini rədd etməyə hazırlaşır. Belə ki,Rusiya lideri birbaşa “yox” demir, amma prosesləri ləngidərək normal qərarların qəbulunu mümkünsüz edən hərəkətlərə əl atır.
Surxay Əliyev
