Artıq Amerika prezidenti üstüörtülü siyasət aparmadan Rusiyanın şərtləri ilə müharibəni bitirmək istədiyini gizlətmir. ABŞ prezidenti Donald Trampın Rusiya-Ukrayna müharibəsi ilə bağlı son açıqlamaları onun qan tökülməsinə biganəliyini nümayiş etdirir. Üstəlik, “The Atlantic”də dərc olunan məqaləyə görə, onlar nəinki zorakılığı dayandırmağa, əksinə onu gücləndirməyə hazır olduqlarını göstərirlər.
Trampın müharibəyə əvvəlki yanaşması təcrid ritorikası adı altında Rusiyaya üstüörtülü dəstək vermək olub. Tramp üzdə qəddarlığı pisləyib və xarici münaqişələrin Amerika pulları ilə maliyyələşdirilməsinə qarşı çıxıb. Lakin indi məlum olur ki, onun Ukraynanın müstəqilliyinə qarşı çıxmasının ABŞ-ın resurslarına qənaətlə heç bir əlaqəsi yoxdur. O, sadəcə olaraq Rusiyanın qalib gəlməsini istəyir.Belə ki, Tramp bu yaxınlarda ABŞ-da ukraynalı qaçqınlar üçün müvəqqəti müdafiəni dayandırmağı “nəzərdən keçirdiyini” söylədi. Ukrayna təbii sərvətlərlə bağlı güzəştlər təklif etdikdən sonra da Tramp bunun kifayət etmədiyini açıq şəkildə bildirdi. Bundan əlavə, NBC telekanalının məlumatına görə, hazırkı Ukrayna prezidentinin 67% dəstəyinə və onun əsas rəqiblərinin müharibə zamanı seçkilərə qarşı çıxmasına baxmayaraq, Tramp Vladimir Zelenskini istefaya və ya yeni seçkilər keçirməyə sövq edir.
“Mən Putinə güvənirəm” Trampın ən diqqət çəkən addımı Ukrayna ilə kəşfiyyat məlumatlarını paylaşmağı dayandırması oldu. Hansı ki,bu qərar Amerikanın puluna qənaət etmədi, amma Rusiyaya üstünlük qazandırdı. Bu isə Rusiyanın hücumları gözlənilməz etdi,Ukrayna vətəndaşları üçün ağır nəticələrə səbəb oldu. Zorakılıqların artmasından sonra Putinlə bağlı fikrini dəyişib-dəyişdirmədiyini soruşduqda isə Tramp əminliklə belə cavab verib: "Mən ona inanıram... Düşünürəm ki, biz Rusiya ilə çox yaxşı iş görürük. Amma indi Ukraynanı bombalayırlar, açığı, Ukrayna ilə məşğul olmaq mənim üçün daha çətindir. Onların kozır kartı da yoxdur". Aydındır ki, Ukraynanı tənqid edən,onu kəşfiyyatsız qoyaraq “kozırlarından” məhrum edən də məhz Tramp oldu. Putinin ABŞ-ın qərarından istifadə edib-etmədiyi ilə bağlı suala Tramp faktiki olaraq etiraf edib ki, bu, onun istədiyi şeydir: "Məncə, o, hamının edəcəyini edir... O, buna son qoymaq istəyir və məncə, Ukrayna buna son qoymalıdır, amma mən bunu görmürəm – bu isə çılğınlıqdır.Mən bunu heç cür başa düşmürəm". “Niyə Ukraynaya hava hücumundan müdafiə ilə bağlı kömək edilməyəcək” sualına isə Tramp belə cavab verib: “Çünki mən onların razılıq əldə etmək istədiklərini bilməliyəm”. Yaxşı” Rusiya, “pis” Ukrayna Nəşr qeyd edir ki, Trampın ritorikası onun mövqeyinin dəyişdiyini açıq şəkildə nümayiş etdirir: indi o, təkcə “sülh”ə can atmır, açıq şəkildə Rusiyanı “yaxşı”, Ukraynanı isə “pis” hesab edir. Onun fikrincə, müharibəni bitirmək üçün “pis adamı” daha böyük itkilər verməyə məcbur etmək lazımdır. Trampın tərəfdarları da bu nağılı qəbul edirlər. Məsələn, İlon Mask Ukraynanın korrupsioner elitalar tərəfindən idarə olunması ilə bağlı Rusiyanın iddialarını təkrarlayaraq, ukraynalı “oliqarxlara” qarşı sanksiyalar tətbiq etməyə çağırıb. Bu isə Ukraynanın müstəqilliyini pozmağa yönəlmiş Rusiyanın informasiya strategiyasının tərkib hissəsidir. Hansı ki,Rusiyanın özündə oliqarxik sistem qat-qat güclüdür, lakin Tramp dəfələrlə həm ABŞ-da, həm də xaricdə korrupsiyaya qarşı biganəlik nümayiş etdirib. Senator Mark Kelli bu yaxınlarda sosial şəbəkədə yazıb: “İstənilən razılaşma Ukraynanın təhlükəsizliyini qorumalıdır və Putinə hədiyyə ola bilməz”. Mask Ukraynanın ABŞ-ın düşməni olduğuna işarə edərək, “Sən satqınsan” cavabını verib. Əgər belə bir mövqe Trampın tərəfdarları arasında populyarlıq qazanarsa, onun gələcək siyasətində bunun rəsmiləşəcəyini söyləmək üçün bütün əsaslar var. Nəşr yazısını belə yekunlaşdırıb: "Tramp Ukraynanın suverenliyini qorumağa çalışan Amerika hökumətini miras aldı. Lakin o, tez bir zamanda Amerika siyasətini dəyişdi. Amerikanın mövqeyi artıq neytrallıq xəttini keçib. Amerikanın yeni məqsədi artıq müharibəni bitirmək deyil, Putinin şərtləri ilə müharibəyə son qoymaqdır. Bazar günü Fox News telekanalında onun hərəkətlərinin Ukraynanın sağ qalmasını təhdid edə biləcəyi ehtimalından narahat olub-olmadığını soruşduqda, Tramp fikirləşmədən cavab verib: "Hələ də sağ qalmaya bilər". Bu proqnoz deyil. Bu məqsəddir”. Surxay Əliyev
