“Bild” xəbər verir ki, Şotlandiyada ABŞ prezidenti Donald Trampa məxsus “Trump Turnberry” qolf klubu hücuma məruz qalıb.
Fələstin tərəfdarları ərazini qırmızı boyayla boyayıb və Trampın Qəzza ilə bağlı mövqeyinə etiraz edən siyasi şüarlar yazıblar. Etirazçılar yaşıl qazonda iri hərflərlə «GAZA IS NOT 4SALE» “Qəzza satılmır” sözləri yazıblar. Bundan başqa, asfalt üzərində «Free Gaza», «Free Palestine», “Azad Qəzza”, “Azad Fələstin” sözləri ilə yanaşı Trampa ünvanlanan təhqirlər yazılıb. Naməlum şəxslər həmçinin bir neçə çuxur qazaraq səthə ziyan vurublar. Daily Mail-in məlumatına görə, hücumu ABŞ-ın Yaxın Şərqdəki münaqişə ilə bağlı siyasətinə qarşı çıxan Palestine Action təşkilatı həyata keçirib. “Tramp Qəzzaya öz mülkü kimi sərəncam verə biləcəyini düşünür. Biz ona göstərdik ki, onun özünün də mülkü təhlükəsiz deyil”, – deyə Palestine Action sosial mediada bildirib. 1906-cı ildə qurulan Trump Turnberry Qolf Klubu 2014-cü ildə Tramp tərəfindən 60 milyon dollara alınıb. Daha sonra orada əsaslı yenidənqurma işləri apararaq onu dünyanın ən yaxşı qolf klublarından birinə çevirib
Surxay Əliyev
