Misir Tramp administrasiyası ilə “konstruktiv əlaqəyə” hazır olduğunu bildirib. Misirin xarici işlər naziri Bədr Abdulati ABŞ-ın Yaxın Şərq üzrə xüsusi nümayəndəsi Stiv Vitkoff ilə telefon danışığı apararaq Qəzza zolağının yenidən qurulması planını müzakirə edib. Misir Xarici İşlər Nazirliyinin məlumatına görə, Abdulati Vaşinqtonla “müsbət və konstruktiv qarşılıqlı fəaliyyətə” hazır olduğunu təsdiqləyib və “planı və onun faydalarını hərtərəfli təqdim etmək” üçün dialoqu davam etdirmək istədiyini deyib.Nazir vurğulayıb ki, Ərəb Dövlətləri Liqasının təklif etdiyi plan martın 4-də Qahirədə keçirilən sammitdə ərəb ölkələrinin “tam dəstəyini” alıb. O, həmçinin qeyd edib ki, atəşkəs razılaşmasının bütün mərhələlərinin başa çatdırılması, humanitar yardımın təmin edilməsi və yenidənqurma işlərinin başlanması Qəzzada vəziyyətin sabitləşməsi üçün əsas şərtdir. Ərəb Liqasının zirvə bəyannaməsində BMT Təhlükəsizlik Şurasından Fələstin dövlətinin yaradılmasına yönəlmiş siyasi prosesin bir hissəsi olaraq Qəzza və İordan çayının qərb sahilində beynəlxalq sülhməramlıların yerləşdirməsi tələb olunub. Ərəb ölkələri həmçinin fələstinliləri zorla köçürmək cəhdini rədd etdiklərini bildiriblər. Bundan əvvəl İsrailin baş naziri Benyamin Netanyahu HƏMAS-ın Amerikanın sülh danışıqlarını davam etdirmək təklifini qəbul etməkdən imtina etdiyini bəhanə edərək, eksklava humanitar yardımı dayandırdığını elan edib. Bundan əlavə, İsrail hökuməti ehtiyatda olan 400 min hərbçinin orduya çağırılmasına icazə verib. Məlum olduğu kimi,martın 2-də ehtiyatda olan 320 min nəfəri səfərbər etmək üçün verilən icazənin müddəti başa çatıb.Lakin hakimiyyət bu limiti artırmaq qərarına gəlib. Yeni qərarda qeyd olunur ki, hərbi xidmətə çağırış 2025-ci il mayın 29-dək mümkündür.. İsrail mənbələri isə bunu atəşkəs razılaşmasının birinci mərhələsi başa çatdıqdan və əsirlərin mübadiləsindən sonra Qəzzada aktiv döyüş əməliyyatlarının bərpasına hazırlıq kimi qiymətləndirir.
Surxay Əliyev
