Donald Trampın ABŞ-ın Ukraynaya hərbi yardımını dayandırması demokrat qanunvericiləri qəzəbləndirməklə yanaşı respublikaçıları arasında da fikir ayrılığı yaradıb.NB nəşri hər iki aparıcı partiyanı təmsil edən Konqres üzvlərinin ilk reaksiyalarını toplayıb. ABŞ Konqresinin Nümayəndələr Palatasında Nyu Yorku təmsil edən respublikaçı konqresmen Mayk Louler deyib ki, “Ukraynaya dəstəyin geri çəkilməsi Avropanın və azad dünyanın sabitliyini təhdid edəcək”.
ABŞ Nümayəndələr Palatasının Respublikaçı üzvü və ABŞ Hərbi Hava Qüvvələrinin təqaüdə çıxmış briqada generalı Don Bekon Trampın qərarına tənqidi kəsə olub. “İran, Şimali Koreya və Çinin Rusiyaya hərbi yardımını və iqtisadi dəstəyini dayandırmaması bizim üçün utancvericidir”. Bekon əlavə edib ki,“İşğalçı və qurban var; demokratiya və diktatura var; Qərbin bir parçası olmaq istəyən bir ölkə var, bir də Qərbə nifrət edən. "Biz mütləq yaxşılığın tərəfində olmalıyıq". Trampın partiyasını ABŞ Nümayəndələr Palatasında təmsil edən respublikaçı Meri Miller kəskin anti-Ukrayna bəyanatı ilə prezidentin qərarını dəstəkləyib: “Prezident Tramp Amerikanın Ukraynaya silah tədarükünü dayandırmaqda haqlıdır. Zelenski sonsuz müharibəni davam etdirmək istəyirsə, qoy bunu özü etsin”. Respublikaçı konqresmen Çip Roy da CNN-ə Ağ Evin mövqeyini dəstəkləyib və bildirib ki, Donald Tramp Ukraynaya hərbi yardımı daha əvvəl dayandıra bilərdi. “Amerikanın Səsi”nin jurnalisti Ostap Yarışın sitat gətirdiyi respublikaçı senator Syuzan Kollinz Trampın bu addımına qarşı çıxıb: “Düşünmürəm ki, səylərimizi dayandırmalıyıq. Ukraynalılar qan tökür. Mən Ukraynaya dəstəyimdən əl çəkmirəm”. O, həmçinin “Ukrayna üçün kritik zaman” haqqında da danışıb. Ukrayna əsilli respublikaçı konqresmen Viktoriya Sparts Fox News-da Trampın addımlarını şərh edərək, Zelenskiyə əsassız tənqidlər yağdırıb: “Zelenski qəhrəman rolunu oynamaq istəyir əslində qəhrəmanlar Ukrayna hərbçiləridir. Zelenski onlara xəyanət edib və öz şəxsi maraqları naminə Ukrayna xalqını alt-üst etməkdə davam edir”. Demokratlar gözlənildiyi kimi Trampın Rusiya ilə müharibədə Ukraynaya yardımını dayandırmaq qərarını kəskin tənqid ediblər. Senatın Xarici Əlaqələr Komitəsinin həmsədri, senator Cin Şaqin: “Azadlıq və demokratiyanın müdafiəsində ön sıralarda dayanan müttəfiqimizə qarşı bu qisas aktı təkcə utancverici deyil, həm də təhlükəlidir. Rəhbərliyi kursunu dəyişməyə çağırıram”. ABŞ prezidentliyinə keçmiş namizəd, demokrat senator Elizabet Uorren xatırladıb: “Birincisi, Tramp Zelenskini Putinin Ukraynaya müdaxiləsində ittiham etdi. Daha sonra o, Putinə “güvəndiyini” bəyan etdi. İndi də o, ikitərəfli hərbi yardımı dondurub. Aydındır ki, Donald Tramp öz kövrək eqosunu bizim milli təhlükəsizliyimizdən üstün tutur ”. Nümayəndələr Palatasının Demokratik Konqresmeni Brendan Boyl Trampın qərarını “ehtiyatsız, qəbuledilməz və milli təhlükəsizliyimizə birbaşa təhdid” adlandıraraq, hərbi yardımın Konqresdə hər iki partiya tərəfindən təsdiqləndiyini vurğulayıb. Boyl həmçinin bildirib ki, Ukraynaya bu cür təzyiqlər “qəsb” cəhdidir. Bloomberg-in məlumatına görə, Ukraynaya yardımın dayandırılması artıq Ukrayna ərazisində olmayan bütün Amerika hərbi texnikasına şamil edilir. Bura daxildir: təyyarələr və gəmilərlə daşınan silahlar, Polşada tranzit zonalarda olan avadanlıqlar, daşınmağa hazırlanan avadanlıqlar. Agentlik bildirir ki, bu qərarı şəxsən Donald Tramp verib və o, sərəncamın icrasını yeni müdafiə naziri Pit Heqsetə həvalə edib. Surxay Əliyev
