Avropa İttifaqının xarici işlər naziri Kaya Kallas Ağ Evdə Vladimir Zelenski ilə Donald Tramp arasında baş verən mübahisədən sonra azad dünya üçün yeni liderə ehtiyac olduğunu bəyan edib. ArbatMedia xəbər verir ki, Avropa İttifaqı Ukraynaya hərbi dəstəyi artırmaq niyyətindədir. Avropa İttifaqının xarici işlər naziri Kaya Kallas isə ABŞ prezidenti Donald Trampın Vladimir Zelenski ilə görüşündəki davranışının azad dünya üçün yeni liderə ehtiyac olduğunu göstərdiyini deyib. Bu, Ukrayna prezidentinin münaqişə ilə başa çatan Vaşinqton səfərindən sonra baş verib. Ağ Evdə canlı yayımlanan görüş cəmi 10 dəqiqə davam edib və Amerika tərəfinin Ukrayna nümayəndə heyətinin otağı tərk etməsini xahiş etməsi ilə yekunlaşıb. Kallas qeyd edib ki, Avropa İttifaqı Kiyevə hərbi yardımı daha da artırmağı planlaşdırır. Avropa liderləri yaranmış vəziyyətdən narahatdırlar.Bir diplomat “Financial Times” qəzetinə deyib ki, Tramp və vitse-prezident Vensın hərəkətləri çaşdırıcıdır. Nəşrin başqa bir mənbəsi isə qeyd edib ki, Avropa ABŞ-ın dəstəyindən ümidini kəsib,baş verənləri təhlil edərək ancaq öz gücünə arxalanmağa məcburdur. Hadisədən sonra Zelenski NATO-nun baş katibi Mark Rutte, Fransa prezidenti Emmanuel Makron və Avropa Şurasının sədri Antonio Kosta ilə telefon danışığı aparıb. Avropa rəsmisinin sözlərinə görə, Kosta ilə telefon danışığı Aİ-nin Ukrayna ilə həmrəyliyini vurğulamaq məqsədi daşıyırdı. Birgə bəyanatda Aİ liderləri Zelenskini səbirli olmağa çağırıb və sülh yolunda birgə işləməyə hazır olduqlarını bir daha təsdiqləyiblər.
Martın 2-də Londonda Kosta, Avropa Komissiyasının sədri Ursula fon der Leyen və digər Avropa liderlərinin iştirakı ilə fövqəladə sammitin keçirilməsi planlaşdırılır. Görüş Böyük Britaniyanın Baş naziri Keyt Starmerin təşəbbüsü ilə keçirilir. Müzakirə zamanı Avropanın müdafiəsi və Ukraynaya dəstək məsələləri müzakirə olunacaq.
Surxay Əliyev
