Rusiya və Ukrayna arasında sülh danışıqlarına başlamaq istəyən ABŞ prezidenti Donald Tramp danışıqlara qarşı çıxan Ukrayna prezidenti Zelenskini hədələyib.
O, Zeleski komediyaçı, diktator adlandırıb: “Komediyaçı, seçilməmiş bir diktator olan Zeleski, yaxşı olar ki, tələssin, yoxsa ölkəsini itirəcək”.
Tramp Zelenskini ABŞ-ı məğlubedilməz müharibəni maliyyələşdirmək üçün aldatmaqda da ittiham edib.
"Təsəvvür edin ki, orta dərəcədə bacarıqlı olan komediya ustası Zelenski ABŞ-ı, qalib gəlməsi mümkünsüz və heç vaxt başlamamalı olan, lakin ABŞ və "TRAMP" olmadan heç vaxt həll edə bilməyəcəyi bir müharibəyə başlamaq üçün 350 milyard dollar xərcləməyə inandırdı. Birləşmiş Ştatlar Avropadan 200 milyard dollar çox xərclədi və Avropanın pulunun qaytarılmasına zəmanət verildi, amma ABŞ heç bir şeyi geri ala bilməyəcək.
Yuxlu Biden niyə bərabərlik tələb etmədi, çünki bu müharibə bizdən çox Avropa üçün vacibdir - Fərq ondadır ki, aramızda böyük və gözəl Okean var. Üstəlik, Zelenski etiraf edir ki, ona göndərdiyimiz pulun yarısı “İTİB”. O, seçki keçirməkdən imtina edir, Ukraynada aparılan sorğularda reytinqi çox aşağıdır və onun yaxşı bacardığı yeganə şey Baydeni “skripka kimi” ifa etmək idi. Seçilməmiş diktator olan Zelenski, tez hərəkət etsə yaxşı olar, yoxsa ölkəsi qalmayacaq.
Bu arada, biz Rusiya ilə müharibənin başa çatması ilə bağlı uğurlu danışıqlar aparırıq, çünki hamının qəbul etdiyi kimi bunu yalnız “TRAMP” və Tramp administrasiyası bacara bilər.
Bayden heç vaxt cəhd etmədi, Avropa da sülh gətirə bilmədi və Zelenski isə yəqin ki, “rüşvət qatarı”nı davam etdirmək istəyir. Mən Ukraynanı sevirəm, amma Zelenski bərbad bir iş gördü, ölkəsi parçalandı və milyonlarla insan gərəksiz yerə öldü. Və bu hələ də davam edir..." – deyə Tramp “Truth Social” sosial şəbəkə hesabında bildirib.
Trampın bu sözləri Kiyevdə sərt təpkilərə səbəb olub. Ukraynanın xarici işlər naziri Andriy Sibiqa Trampın Zelenski və Ukraynanı təhdid etməsinə reaksiya verib. Nazir öz X hesabında açıqlama yayaraq Ukraynanın Avropanın müasir tarixində ən dəhşətli hərbi təcavüzə, üç illik müharibəyə tab gətirdiyini xatırladıb.
Sibiqa açıqlamasında Ukrayna prezidenti Zelenski və ukraynalıların Rusiya prezidenti Putinin "təzyiqlərinə boyun əyməkdən imtina etdiklərini" bildirib və əlavə edib ki, heç kim Ukraynanı təslim olmağa məcbur edə bilməz: “Biz mövcud olmaq haqqımızı müdafiə edəcəyik".
Ukrayna Prezident Aparatının rəhbəri Andrey Yermak isə, Rusiya ilə aralarındakı müharibənin ən çox bitməsini istəyən tərəfin Ukrayna olduğunu bildirib: "Ancaq biz bunu ədalətli və davamlı sülhlə bitirmək istəyirik".
TAHİR
