Bu gün Azərbaycan iqtisadiyyatının mühüm bir sahəsi olan kənd təsərrüfatında mövcud problemlərdən biri də peşəkar, ixtisaslaşmış kadrların çatışmazlığıdır. Ümumiyyətlə, hər bir sahənin inkişafının əsas şərtlərindən biri bu sahəni bilən peşəkar şəxslərin olmasıdır. İxtisaslaşmış kadr olmadıqda yaranan problemlər kokündən həllini tapa bilmədiyindən, uzanır və bu, müvafiq sahədə həm vaxt, həm vəsait itkisinə səbəb olur. Bu gün kənd təsərrüfatında da məhz bu hallar müşahidə olunmaqdadır.
Aqrar sektorda kadr çatışmazlığı problemini Kənd Təsərrüfatı Nazirliyi yanında Aqrar Xidmətlər Agentliyinin (AXA) sədr müavini Yaqub Cəfərov da etiraf edib. O, media nümayəndələrinə açıqlamasında bildirib ki, aqrar sahə kadr çatışmazlığından əziyyət çəkir: “Bu, bütün ölkədə problemdir. SSRİ dağıldıqdan sonra kənd təsərrüfatı üzrə ixtisaslara yiyələnmək istəyən gənclərin sayı azalıb. Gənclər aqronom, baytar, mexanizator, aqrar iqtisadçı kimi ixtisaslara daha az üz tuturlar. Hazırda kimyaçıları, bioloqları aqrar sahəyə cəlb edirik. Onların təkrar hazırlığı ilə məşğul olaraq, özümüz üçün lazımi kadrlar hazırlayırıq".
Aqrar sahədə kadr çatışmazlığı probleminin necə həll olunmasını öyrənmək üçün mütəxəssislərə müraciət etdik.
“Aqrar sahə üzrə kadrların azalması səbəblərindən biri də insanların bu sahəyə marağının olmamasıdır”
Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, aqrar sektorda kadr çatışmazlığı problemi yaşanır: “Sovet dövründə çoxsaylı kənd təsərrüfatı texnikumunu bitirdikdən sonra gənclər dövlət tərəfindən işlə təmin edilirdilər. İndi isə belə stimul yoxdur. Səbəb isə böyük təsərrüfatların olmamasıdır. Kənd təsərrüfatı müəssisələrinin çatışmazlığı, təcrübə sahələrinin qıtlığı aqrar təhsilə marağı da azaldır. Kənd təsərrüfatı ixtisaslarını seçən bakalavrlara əlavə təqaüdlərin ayrılması aqrar sahədə təhsilə təşviq üçün müsbət addımdır.
1990-cı illərdən etibarən aqrar sahədə tənəzzül yaşandı. Belə olan halda, bu sahə ilə məşğul olan mütəxəssislər başqa sektorda çalışmağa başladılar. Sonrakı dövrdə isə aqrar sahə ilə məşğul olanların belə bir təəssüratı var idi ki, onların bu sahə üzrə yetərincə məlumatı var, həmin bilgiləri gələcək nəsillərə ötürə bilərlər. Ancaq sonradan məlum oldu ki, kənd təsərrüfatı sahəsi üzrə məşğul olmaq üçün müasir standartlara cavab verən kadrlara ehtiyac var. Aqrar mütəxəssislərin rəyi olmadan yüksək məhsuldarlıq əldə etmək mümkün deyil. Bu səbəbdən də bölgələrin bir çoxunda çalışan işçilər gübrə və digər preparatlardan hansı normada verilməsini bilmirlər.
Onu da bildirim ki, aqrar sahə üzrə kadrların azalması səbəblərindən biri də insanların bu sahəyə marağının olmamasıdır. Bəzi şəxslər kənd təsərrüfatının gəlirli sahə olmadığını düşündüyündən, aqrar ixtisaslara üz tutanların sayı azaldı. Bu problemin həll olunması üçün aqrar ixtisasa qəbul olunan tələbələrə yüksək təqaüd də təyin olundu”.
Həmsöhbətimiz onu da vurğuladı ki, hazırkı şəraitdə savadlı kadrlara böyük ehtiyac var. Bu sahə üzrə təhsil alan tələbələr müasir kənd təsərrüfatında olan məlumatlara malik olmalıdırlar.
Ekspert hesab edir ki, gənclərin aqrar sahəyə marağını artırmaq üçün kənd təsərrüfatı üzrə ixtisaslaşmış TV kanal açılmalıdır. Həmin kanalda aqrar mütəxəssislərin çıxışları ilə gənclərin kənd təsərrüfatına münasibətini dəyişmək olar. Önəmli olan aqrar sahədə yetişən mütəxəssislərin işlə təmin olunmasıdır. Bu kimi məsələlər həll olunarsa, gənclərin aqrar sahəyə marağı artar.
Günel CƏLİLOVA
