Əliməmməd Nuriyev: “Ola bilsin, sənədlərdə hüquqla bağlı hansısa kiçik problemlər olub, ancaq bu o demək deyil ki, həmin iş adamı şəhid ailəsinə qarşı bu cür davranış nümayiş etdirməli idi”
Sosial şəbəkələrdə və internet saytlarında iş adamı Şərurlu İsfəndiyarın (İsfəndiyar Axundov) məhkəmə yolu ilə aprel şəhidi, polkovnik-leytenant Sənan Axundovun ailəsinə məxsus evi əllərindən alması barədə xəbərlər yayılıb. Sosial mediada iş adamının aprel şəhidinin ailəsinə qarşı sərgilədiyi bu davranış ciddi qınağa səbəb olub.
Prezident İlham Əliyev iş adamlarının fəaliyyətinə hər zaman diqqət göstərib və onlar üçün münbit şərait yaradıb. Eyni zamanda, dəfələrlə vurğulayıb ki, iş adamlarının cəmiyyət qarşısında sosial məsuliyyəti var və onlar hər zaman həssas qruplara dəstək olmalı, onlarla bağlı həyata keçirilən layihələrdə yaxından iştirak etməlidirlər. Ölkə başçısının, eləcə də ölkəmizin Birinci vitse-prezidenti Mehriban Əliyevanın şəhid ailələrinə diqqət və qayğısı, həssas qruplara göstərdikləri münasibət iş adamları üçün də bir nümunə olmaldır. Təəssüf ki, bir çox iş adamı özlərinin sosial məsuliyyətini dərk etmək istəmir. Aprel şəhidinin ailəsini evsiz qoyan Şərurlu İsfəndiyar kimi.
Aprel şəhidi, polkovnik-leytenant Sənan Axundovun həyat yoldaşı Nəcibə Axundova mətbuata bildirib ki, iş adamı Ali Məhkəmənin çıxardığı qərarla onlara məxsus evi əllərindən alıb. Nəcibə Axundovanın sözlərinə görə, S.Axundov şəhid olmamışdan bir neçə il əvvəl “Kamran MMC”nin tikdiyi binadan 50 kvadratmetr yer götürüb, sonra “Kamran MMC”nin işçiləri barəsində cinayət işi başlanıb və binanın 11 mərtəbəsini biznesmen Şərurlu İsfəndiyar alıb.
O qeyd edib ki, iş adamı həmin binada əlavə beş mərtəbə də tikib. Onun sözlərinə görə, Şərurlu İsfəndiyar isə sakinlərlə şərt kəsib və deyib ki, binadakı mənzillər üçün onun istədiyi qiymət ödənilməlidir.
Şəhidin xanımının verdiyi məlumata görə, məhkəmə proseslərindən biri Sənan Axundov sağ olanda baş tutub, qərar Axundovlar ailəsinin lehinə olub, lakin Ali Məhkəmə Şərurlu İsfəndiyarı müdafiə edib və şəhid ailəsini evsiz qoyub.
N.Axundova deyib ki, Şərurlu İsfəndiyara əlavə ödəniş etməkdən imtina etdiklərinə görə evləri əllərindən alınıb: “Mən Şərurlu İsfəndiyardan əlavə mənzil və ya başqa heç nə istəmirəm. Tələbim yalnız haqqını ödədiyimiz mənzilimizdir. Onu da İsfəndiyar yalnız ikiqat pul ödədikdən sonra bizə verəcəyini deyir. Əvvəl bizdən 100 min, sonra 53 min manat istəmişdilər. Biz bu mənzilə 53 min manat ödəmişdik, 11 min manat isə borcumuz qalmışdı. Əlavə ödəniş verməyə razılaşmamışdıq. Bina təhvil veriləndən sonra 76 ailədən mənzillərin ikiqat qiymətini tələb etdi və razılaşanlara çıxarış verildi. Kim ki, onun istədiyi məbləği vermədi, onların müqavilələrini yeniləmədi, saxta adlandıraraq məhkəmələrə verdi” - deyə o qeyd edib.
N.Axundova açıqlamasında diqqətçəkən müqayisə apararaq bildirib ki, Ali Məhkəmənin lehinə qərar çıxardığı vətəndaşlardakı müqavilələrlə onların müqaviləsi arasında heç bir fərq yoxdur. Bəs necə olur ki, məhkəmə birinin müqaviləsini saxta hesab edir, digərininkini isə həqiqi? “Biz Ali Məhkəmədə bu məsələni qaldırdıq. Kassasiya şikayətinə bir müraciəti də əlavə edərək bildirdik ki, eyni şirkət, eyni bina, eyni müqaviləsi olan vətəndaş məhkəməyə müraciət edib və məhkəmə Şərurlu İsfəndiyarın əleyhinə qərar çıxarıb. Vətəndaş məhkəməni udub. İsfəndiyar vətəndaşı Apelyasiya Məhkəməsinə verib. Lakin yenə Ali Məhkəmə vətəndaşın hüquqlarını müdafiə edib və onun lehinə qərar çıxarıb. Mən başa düşə bilmirəm ki, bizim situasiyada fərqli olan nədir ki, Ali Məhkəmə Apelyasiyanın qərarını qüvvədə saxladı? Halbuki, söhbət eyni binadan, eyni müqavilədən gedir. Bizdə isə müqavilənin saxta olduğunu irəli sürdülər. Belə çıxır ki, bu saxta müqavilə ilə iki il bundan əvvəl başqa bir vətəndaş haqqında Apelyasiya Məhkəməsinin verdiyi qərar ləğv edilib və vətəndaşın xeyrinə qərar çıxarılıb. Yəni məhkəmə özünü təkzib edir?! Bəs 76 ailənin müqaviləsi də eyni cür verilib, onlar saxta olmadı, elə bizim müqaviləmiz saxta oldu?” - deyə qeyd edən N.Axundova onu da bildirib ki, srağagünkü prosesi aparan hakim Əsəd Mirzəliyev onların fikirlərinə önəm verməyib və şəhid ailəsinin hüquqlarının tapdalanmasına göz yumub: “Elə ilk başda bizə əlavə heç bir fikir söyləməməyimiz tapşırıldı. Mən dərhal buna etiraz etdim. Çünki o ev, o mənzil mənim pulumla tikilib. Bunu qeyd etməməliyəm? Məhkəmə hələ başlamamışdı, amma artıq çıxarılacaq qərar bəlli idi. Məhkəmə bizə söz vermək, fikrimizi dinləmək istəmirdi. Bu, adi qonşu mübahisəsi deyil, mal-mülk davası deyil. Bu, biznesmenin Azərbaycan torpaqları uğrunda canından keçmiş oğulun, şəhidin ailəsinə qarşı ədalətsizliyidir. Mən demirəm kimsə bizə əlavə üstünlük versin, mən öz haqqımızı tələb edirəm. Lakin məsələyə obyektiv yanaşılmır” - deyə o vurğulayıb.
Şəhid xanımı, həmçinin, məsələ ilə bağlı çıxarılan ədalətsiz qərardan ölkə rəhbərliyinə müraciət ünvanlayaraq, ədalətin bərpa edilməsində kömək istəyib.
Qeyd edək ki, Şərurlu İsfəndiyar aprel şəhidinin ailəsinin əlindən onlara məxsus 50 kvadratmetrlik mənzili alsa da, ölkəmizin Birinci vitse-prezidenti Mehriban Əliyeva S.Axundovun ailəsini sevindirib. Belə ki, Mehriban Əliyevanın göstərişi ilə şəhid zabitin ailəsi yeni mənzillə təmin olunub.
Aprel şəhidi, polkovnik-leytenant S.Axundovun ailəsinə məxsus evi onların əlindən alan iş adamı İsfəndiyar Axundovun bu hərəkətini qətiyyətlə pisləyən tanınmış hüquqşünas Əliməmməd Nuriyev “Bakı-Xəbər”ə bildirdi ki, şəhid ailəsi hüquqi baxımdan haqsız olsaydı belə, iş adamının belə bir addım atması mənəvi cəhətdən doğru deyil. O bunun hüquqi yox, daha çox mənəvi bir məsələ olduğunu vurğulayaraq bildirdi ki, iş adamları hər şeyi öz biznes maraqlarına qurban verirlər. “Yadımdadır, cənab Prezident özü də deyib ki, iş adamlarının öz funksiyaları var, onlar biznesdən gəlir əldə etməlidir, ancaq, eyni zamanda, onların cəmiyyət qarşısında da öz məsuliyyəti var. Bu da sosial məsuliyyətdir. Yəni cəmiyyətdə kövrək, həssas insanlar, təbəqələr var, iş adamları onlara münasibətdə daha diqqətli olmalıdırlar. Cəmiyyətin xeyrinə keçirilən sosial-ictimai layihələrə iş adamları dəstək verməlidirlər. Çox təəssüf ki, Azərbaycanda biznes fəaliyyəti ilə məşğul olan şirkətlərin, insanların mütləq əksəriyyəti sosial məsuliyyət anlayışından uzaqdır, onların yeganə məqsədi yalnız gəlir əldə etməkdir. Bizdə böyük tikinti şirkətləri var və onlar daha çox qazanırlar, lakin biz onların sosial layihələrdə hər hansı bir iştiraklarını görmürük. Əslində, şəhid ailələri Vətən, torpaq uğrunda həlak olan insanların ailələridir. Onlara yalnız dövlət tərəfindən deyil, cəmiyyətin bütün təbəqələri tərəfindən diqqət-qayğı göstərilməlidir. Özəl sektor da şəhid ailələrindən öz qayğısını əsirgəməməlidir. Bu məsələ ilə bağlı hüquqi baxımdan problemlər var idisə belə, bu məhkəmə prosesi şəhid ailəsinin xeyrinə həll oluna bilərdi. Mənə elə gəlir ki, bundan həmin şəxsin gəlirləri azalmayacaqdı, əksinə, o, xeyirxah əməlinə görə özünə daha müsbət imic qazanardı. Bunun əvəzində hər şeydən yüksək olan mənəvi gəlir əldə edərdi, nəinki şəhid ailəsini məhkəməyə verib onlara məxsus evi əllərindən almaqla. Ola bilsin, sənədlərdə hüquqla bağlı hansısa kiçik problemlər olub, ancaq bu o demək deyil ki, həmin iş adamı şəhid ailəsinə qarşı bu cür davranış nümayiş etdirməli idi. Bu məsələ artıq kütləvi informasiya vasitələrində müzakirə olunur. Görürsünüz, hörmətli Birinci vitse-prezidentimiz Mehriban xanım Əliyeva tərəfindən yenə də, həmişə olduğu kimi, qərar qəbul olundu və aprel şəhidinin ailəsi Nərimanov rayonunda evlə təmin edildi. Xeyirxahlıq Mehriban xanımın həyat kredosudur. Mən şəhid ailəsini evlə təmin etdiyinə görə ona öz təşəkkürümü bildirirəm. Heç olmasa həm dövlət başçısının, həm də Birinci vitse-prezidentin göstərdikləri bu nümunələrdən iş adamları örnək götürsünlər. Onlar cəmiyyətə hər gün yeni nümunələr təqdim edirlər. Biznes sektoru hansı nümunələr göstərir? Şəhid ailəsinin evini əlindən almaq nümunəsi? Şəhid ailəsinə münasibət beləmi olmalıdır? İş adamının aprel hadisəsinin ildönümü ərəfəsində onun ailəsinə məxsus evi əllərindən alması heç cür müsbət qarşılana bilməz. Bu ev aprel şəhidinin ailəsinə aiddir. Bu gün bütün diqqətimiz aprel hadisələrindədir. Aprel şəhidləri Azərbaycan xalqına böyük və yeni qələbə ruhu bəxş etdilər, belə bir insanın ailəsinə münasibətdə biznes adamının bu hərəkəti qətiyyən qəbuledilən deyil. Mən məsələnin mənəvi tərəfindən danışıram, onun hüquqi tərəfinə toxunmaq istəmirəm. Elə məsələlər var ki, orada mənəvi tərəf hüquqdan üstündür. Bu baxımdan, bu məsələyə diqqətlə yanaşılmalı və proses şəhid ailəsinin xeyrinə həll olunmalı idi. Ancaq bunu etmədilər. Çünki bizim biznes adamlarının məfkurə, dünyagörüşü baxımından, sosial məsuliyyət nöqteyi-nəzərindən anlayışları yoxdur, yaxud aşağı səviyyədədir. Çox təəssüf edirəm ki, iş adamı şəhid ailəsinin evinə əl uzatdı, bu, hər şeydən əvvəl mənəvi cəhətdən haqsızlıqdır. Onun bu məsələdə yumşaq mövqe tutmaq imkanı vardı və buna onun gəlirləri, şirkətinin maddi qazancları da imkan verirdi” - deyə bildirən Ə.Nuriyevin sözlərinə görə, şəhid ailəsinin başına oyun gətirən iş adamları sabah cəmiyyət içinə necə çıxacaqlar. “Anlaya bilmirəm ki, şəhid ailələrinə qarşı bu cür hərəkətlər edən şəxslər Allah qarşısında necə hesabat verəcəklər? Belə ədalətsizlik olmaz” - deyə Ə.Nuriyev vurğuladı. O bildirdi ki, yuva qurmaq istəyən bir insanın yuvasını uçuran insanlar böyük günaha batırlar. “Belə bir davranışı heç kəsə layiq bilməzdim” - deyə Ə.Nuriyev qeyd etdi.
İradə SARIYEVA
