Adını qəhrəmanlıq tariximizə həkk edən daha bir zəfər şəhidimiz Yusif Məmmədrza oğlu Xəlilovdur. Bu Vətən sevdalısının doğma Azərbaycana sevgisi sonsuz idi. Məhz buna görə 1983-cü ildə Lənkəran rayonunun Veravul kəndində dünyaya göz açan Yusifin qəlbi düşmən tapdağında qalan torpaqların azad edilməsi uğrunda alışıb-yanırdı. Elə həyatını hərbiyə bağlaması da bundan irəli gəlirdi.
Vətənini, torpağını hər şeydən üstün bilən, Qarabağımıza dadanmış yağıya qan qusdurmaq üçün hər an məqam gözləyən Yusif 18 il Azərbaycan Silahlı Qüvvələrində tank komandiri vəzifəsində oğulluq borcunu şərəflə yerinə yetirib. Daim nümunəvi xidməti ilə fərqlənib, qatıldığı bütün təlimlərdə əla döyüşçü keyfiyyətləri nümayiş edib. Ölümsüzlüyə qovuşan Azərbaycanın qəhrəman oğlu son nəfəsə qədər sinəsini canından artıq sevdiyi Vətəninə sipər edib, onu qanı bahasına alınmaz qalaya çevirib.
Yusif yağıya birinci gücünü 2016-ci ilin Aprel döyüşlərində göstərib. Odlardan, alovlardan keçməklə Lələ təpənin alınmasında əsl tarix yazıb. Fədakarlığı, mərdliyi yağıya yaxşı dərs olub. Onlar bir daha yaxşı dərk ediblər ki, Yusif kimi oğlanların qarşısında duruş gətirmək qeyri-mümkündür, Azərbaycan Ordusu tezliklə öz istəyinə nail olacaq.
Doğrudur, Yusif həmin döyüşlərdə ağır yaralanıb. Qaldı ki, uşaq yaşlarında qanına, canına hopan Vətən sevgisi, həmçinin yağıdan alacağı öcə görə hərbidə qalmağı özünə şərəf bilib və MAXE kimi fəaliyyətini davam edib. Hər bir qeyrətli Vətən oğlunun gözlədiyi, 27 sentyabr 2020-ci ildə başlanan İkinci Qarabağ müharibəsində erməni dığalarına qarşı aparılan ölüm-dirim vuruşlara ürəklə qatılıb, həqiqi mərdlik, cəsurluq göstərib və bu haqq savaşımızın sonuna qədər hər günü yeni-yeni igidliklərlə yadda qalıb.
44 günə qorxmaz, mərd oğullarımız düşmən üzərində qələbə qazanıb Azərbaycanın hərb tarixinə qəhrəmanlı salnaməsi yazdıqdan sonra Yusif Xəlilov birgünlük antiteror tədbirləri zamanı şəhid olub. Doğma Azərbaycanı canı bahasına qoruyan, dövlət tərəfindən 3-cü dərəcəli “ Vətənə xidmətə görə” ordeninə, “Vətən uğrunda” medalına layiq görülən zəfər şəhidimiz Yusifdən bizlərə iki qız uşağı yadigar qalıb. Onların yaşı az olsa da, Vətənə sevdalanıb parlaq gələcəyə doğru gedirlər.
Bəli, şəhid Yusif Xəlilovun adı əbədi olaraq yaddaşlarda yaşayır. Lənkəranda kiçik də, böyük də hər yerdə, hər zaman sevgi dolu ürəklə onu yad edir. Çünki hər kəsə qismət olmayan ali mərtəbəyə yüksələn, ölümsüzlüyə qovuşan qəhrəman Yusif öz qısa ömrünü canından artıq sevdiyi Azərbaycan üçün yaşyıb. Tökdüyü qanla torpaq Vətən oldu. İndi o, özü cismən həyatda olmasa da, yeri, yurdu milyonların ürəyidir. Bütün lənkəranlılar onunla fəxr edir, adı çəkiləndə qürur hissi keçirdir.
İndi bütün Azərbaycan xalqı üçün əziz olan şəhidimizin yarımçıq arzularını gələcəkdə ləyaqətlə, atasının adına layiq həyata keçirəcək iki qız övladı bizlərə əmanət qalıb.
Zəfər ORUCOĞLU Azərbaycan Jurnalistlər Birliyinin üzvü
