Son illərdə Azərbaycanın sosial-iqtisadi inkişaf strategiyasında regionların bərabər və davamlı inkişafı əsas prioritetlərdən birinə çevrilib. Bu siyasətin mühüm istiqamətlərindən biri də idman infrastrukturunun regionlarda geniş şəkildə formalaşdırılmasıdır.
Mərkəzlə regionlar arasındakı fərqlərin azaldılması, əhalinin sağlam həyat tərzinə təşviqi və gənclərin sosial fəallığının artırılması məqsədilə ölkənin hər bölgəsində müasir idman obyektləri, stadionlar, olimpiya kompleksləri və idman məktəbləri tikilib istifadəyə verilib. Bu proses artıq Azərbaycan regionlarında da beynəlxalq əhəmiyyətli yarışların və digər tədbirlərin həyata keçirilməsinə imkan verir.
Azərbaycanın yeddi şəhəri beynəlxalq idman yarışına uğurla ev sahibliyi etdi
Ölkəmizin ilk dəfə ev sahibliyi etdiyi III MDB Oyunları fonunda yuxarıda qeyd edilənlər bir daha öz təsdiqini tapdı. Xatırladaq ki, elə bu günlərdə Gəncə Stadionunda III MDB Oyunlarının bağlanış mərasimi keçirilib. III MDB Oyunlarının Təşkilat Komitəsinin sədri Samir Şərifov yarışların uğurla başa çatdığını bildirib. O deyib: "On bir gün ərzində Oyunlara ev sahibliyi edən Gəncə, Şəki, Qəbələ, Yevlax, Mingəçevir, Göygöl və Xankəndi şəhərləri möhtəşəm idman bayramının şahidinə və bilavasitə iştirakçısına çevrilib. Müstəqil Dövlətlər Birliyinə daxil olan 8 ölkənin və Oyunlara qatılan daha 5 ölkənin idmançıları 23 idman növü üzrə yarışlarda öz məharətlərini, əzmkarlıqlarını nümayiş etdirdilər. Onlar 235 dəst fərdi və komanda mükafatları uğrunda mübarizə apararaq milyonlarla idmansevərə unudulmaz sevinc, həyəcan, həmçinin qürur dolu anlar yaşatdılar. Bu möhtəşəm idman bayramının ərsəyə gəlməsi Azərbaycan Respublikasının prezidenti İlham Əliyevin ölkəmizdə idmanın inkişafına göstərdiyi qayğının təzahürüdür. Əminliklə deyə bilərik ki, Azərbaycanda keçirilən III MDB Oyunlarının təşkilində ən yüksək standartlar təmin edilib".
Bu arada onu da qeyd edək ki, Azərbaycan oyunları ümumilikdə 184 medalla başa vurub. Bunların 33-ü qızıl, 56-sı gümüş, 95-i isə bürünc mükafatdır. Ölkəmiz bu göstərici ilə ümumi medal sıralamasında 2-ci yeri tutub. İlk sırada Rusiya qərarlaşıb. Beləliklə, Azərbaycan idmançıları 2021-ci ildən təşkil olunan MDB Oyunlarında ən yaxşı nəticəsinə imza atıb. Ölkəmiz I Oyunlarda 60 (16 qızıl, 16 gümüş, 28 bürünc), ikincidə isə 62 (10 qızıl, 17 gümüş və 35 bürünc) medal əldə etmişdi. III MDB Oyunlarına Azərbaycanın yeddi şəhəri – Gəncə, Şəki, Qəbələ, Yevlax, Mingəçevir, Göygöl və Xankəndi ev sahibliyi edib. Burada onu da qeyd edək ki, 2004-cü ildən etibarən həyata keçirilən “Regionların sosial-iqtisadi inkişafı Dövlət Proqramları” Azərbaycanın iqtisadi və sosial həyatında dönüş nöqtəsi yaratdı. Bu proqramlar çərçivəsində kənd və şəhərlərdə yollar, körpülər, məktəblər, xəstəxanalarla yanaşı, idman obyektlərinin də inşasına xüsusi diqqət yetirildi. Məqsəd yalnız idman uğurlarını artırmaq deyil, həm də regionlarda sağlam və aktiv gənclik yetişdirmək idi. Bu gün Azərbaycanın hər bir bölgəsində olimpiya idman kompleksləri fəaliyyət göstərir. Əgər 2000-ci illərin əvvəlində belə obyektlər cəmi bir neçə şəhərdə mövcud idisə, hazırda onların sayı 50-dən artıqdır. Bu komplekslər yalnız yarışların keçirildiyi yerlər deyil, həm də gənclərin asudə vaxtlarını səmərəli keçirdikləri, idmanla peşəkar səviyyədə məşğul olduqları mərkəzlərdir. Elə prezident İlham Əliyev dəfələrlə vurğulayıb ki, idman Azərbaycanın dövlət siyasətinin ayrılmaz hissəsidir. Onun təşəbbüsü ilə paytaxtla yanaşı, bütün regionlarda idmanın inkişafına xüsusi önəm verilib. Dövlət başçısının müxtəlif rayonlara səfərləri zamanı idman komplekslərinin açılışında iştirakı və bu sahəyə verdiyi dəstək, regionlarda idmana olan marağı daha da artırıb. Məsələn, Quba, Qəbələ, Gəncə, Şəki, Mingəçevir, Lənkəran, Naxçıvan və digər şəhərlərdə inşa edilən olimpiya kompleksləri beynəlxalq standartlara cavab verir. Mingəçevir Su İdmanı Mərkəzi, Gəncə Atletika Stadionu, Qəbələ Atıcılıq Mərkəzi kimi obyektlər təkcə yerli deyil, beynəlxalq yarışlara da ev sahibliyi edir.
Regionlarda idman obyektləri təkcə idman həyatını deyil, sosial və iqtisadi mühiti də canlandırır
Regionlarda idman obyektlərinin formalaşması təkcə idman həyatını deyil, ümumilikdə sosial və iqtisadi mühiti də canlandırıb. Bu obyektlərin tikintisi və fəaliyyəti minlərlə insana iş yeri yaradıb, xidmət sektorunu genişləndirib, turizmin inkişafına təkan verib. Məsələn, Qəbələ və Lənkəran bölgələri təkcə təbiəti ilə deyil, həm də idman turizmi ilə tanınmağa başlayıb. Bu regionlarda keçirilən beynəlxalq turnirlər həm yerli iqtisadiyyata, həm də ölkənin idman imicinə müsbət təsir göstərir. İdman infrastrukturu həmçinin gənclərin sağlam həyat tərzinə meyilini artırıb, onları zərərli vərdişlərdən uzaqlaşdıran sosial mühərrik rolunu oynayır.
Azərbaycanın idman uğurları – Olimpiya və dünya çempionatlarında qazanılan medallar, beynəlxalq arenada tanınan idmançılar – təsadüfi nəticə deyil. Bu nailiyyətlərin əsasında regionlarda yaradılan güclü baza dayanır. İdman məktəbləri, uşaq-gənclər idman mərkəzləri və peşəkar məşqçi hazırlığı sistemi bu uğurları təmin edən əsas faktorlardandır. Hazırda ölkənin bir çox tanınmış idmançıları – güləş, boks, cüdo, ağırlıqqaldırma və karate üzrə dünya səviyyəsində uğur qazanan idmançılar – məhz bölgələrdə yetişmiş gənclərdir. Bu da regional infrastrukturun nə qədər səmərəli işlədiyini sübut edir. Regionlarda keçirilən yerli və respublika səviyyəli yarışlar, “İdman hamı üçün” devizi ilə aparılan kampaniyalar əhalidə idmana marağı artırıb. Artıq idman yalnız peşəkar yarışlarla məhdudlaşmır – o, insanların gündəlik həyat tərzinə çevrilir. Müasir idman zalları, stadionlar və açıq hava meydançaları kənd və şəhərlərdə gənclərin toplaşdığı sosial mərkəzlər funksiyasını daşıyır. Bundan əlavə, televiziya və sosial media vasitəsilə bölgələrdə keçirilən yarışların işıqlandırılması idmanın təbliğinə mühüm töhfə verir. Dövlət və özəl sektorun ortaq təşəbbüsləri nəticəsində regionlarda idman klublarının sayı da artmaqdadır. Azərbaycanın 2030-cu ilə qədər olan sosial-iqtisadi inkişaf strategiyasında regionlarda idman infrastrukturunun daha da genişləndirilməsi xüsusi yer tutur. Yeni idman məktəblərinin, üzgüçülük hovuzlarının, idman parklarının tikintisi, qadın və uşaqlar arasında idmanın təşviqi dövlət siyasətinin əsas istiqamətlərindəndir. Eyni zamanda, “yaşil enerji zonaları” konsepsiyası çərçivəsində idman infrastrukturu da ekoloji baxımdan dayanıqlı formada inşa edilir. Bu, Azərbaycanın həm modern, həm də ekoloji baxımdan məsuliyyətli inkişaf modelinə sadiqliyini göstərir. Beləliklə, Azərbaycanın regionlarında həyata keçirilən inkişaf siyasəti ölkəni mərkəzdən kənar bölgələrdə də dinamik və müasir infrastrukturla təmin edib. Bu gün idman infrastrukturu Azərbaycanın regional inkişaf modelinin ayrılmaz hissəsinə çevrilib. Müasir idman kompleksləri, gənclər üçün yaradılan imkanlar və dövlətin davamlı dəstəyi sübut edir ki, Azərbaycan regionları təkcə iqtisadi deyil, həm də sosial-mədəni inkişaf baxımından yeni mərhələyə qədəm qoyub.
Tahir TAĞIYEV Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
