Cahid İmanlı: “DİM əgər elektron imtahanların təşkilinə daha az maddiyyat xərcləyirsə, imtahanın qiymətini də aşağı sala bilər”
Magistratura imtahanlarının məzmununda dəyişikliyin ediləcəyi gözlənilir. Son günlər bu barədə bəzi sosial şəbəkələrdəki təhsil səhifələrində məlumat yayılıb. Qeyd edilir ki, magistraturaya qəbul elektron formata keçəcək.
Məlumat üçün bildirək ki, Azərbaycanda magistraturaya qəbul 2006-cı ildən etibarən həyata keçirilir. 2005-ci ilə qədər magistraturaya qəbulu universitetlər daxili qaydada həyata keçirirdilər. Bugünə kimi magistraturaya qəbul imtahanlarının formatında çoxsaylı dəyişikliklər edilib. Qeyd edilən imtahana yenidən dəyişikliyin ediləcəyi gözlənilir.
Maraqlıdır, magistraturaya qəbulun elektron formada keçirilməsi təhsilin keyfiyyətinə necə təsir edəcək?
“İmtahanların elektron formada həyata keçirilməsi hazırkı dövrümüzün ən aktual və vacib predmetlərindən biridir”
Təhsil eksperti Cahid İmanlı “Bakı-Xəbər”ə şərhində bildirdi ki, imtahanların elektron formada həyata keçirilməsi hazırki dövrümüzün ən aktual və vacib predmetlərindən biridir. Magistr imtahanlarının da elektronlaşdırılması bütün mənalarda müsbət bir addımdır: “Bu, ilk növbədə şəffaflığın göstəricisidir. Magistr real vaxt çərçivəsində sualları cavablandırıb nəticəni də dərhal öyrənir. Burada bir məqamı qeyd edim ki, istənilən imtahanın sualları ictimaiyyət üçün açıq olmalıdır. Yəni imtahandan sonra məzmunu paylaşılmalıdır”.
Həmsöhbətimiz onu da əlavə etdi ki, maddi məsələ də önəm daşıyır: “DİM əgər elektron imtahanlarının təşkilinə daha az maddiyyat xərcləyirsə imtahanın qiymətini də aşağı sala bilər. Operativlik və vaxt amili də məsələnin müsbət tərəfidir. İmtahan nəticəsinin daha tez elan edilməsi magistrləri əlavə psixoloji yüklənmədən qurtarar və onların karyera planlaşmasına necə yanaşmalarını təmin edər. İmtahanların elektronlaşdırlmasının ən mühüm əhəmiyyəti magistr imtahanlarının məzmunununda dəyişiklik ola bilər. Hazırda kompüter proqramlaşmasında onlarla imtahan-yoxlama-ölçmə alətləri var. Bundan istifadə edərək, imtahan suallarının modelində ciddi dəyişiklik etmək olar. Ənənəvi sual-variant test üsulunu daha effektiv üsullarla əvəz etmək olar. Bu, magistr təhsilində keyfiyyətcə yeni mərhələ ola bilər”.
Günel CƏLİLOVA
