Elyar İslamoğlu: “Bu çox ziyanlı təklifdir”
Azad Qarabağda müəllim işləmək doğrudan da şərəflidir. Hər bir müəllimin, hətta univerisitet professorlarının da ən böyük arzusu olub ki, torpaqlar azad olunduqdan sonra bütün titullarını unudub Qarabağda sadə bir kənd müəllimi işləsinlər. Yəni Azərbaycan müəllimi hər zaman Qarabağda işləməyə hazır olub. Bu gün artıq azad ərazilərimizdə məktəblərin fəaliyyəti bərpa olunub, onlarla müəllim müxtəlif kənd və qəsəbələrdəki, şəhərlərdəki məktəblərdə öz peşə borclarını yerinə yetirir. Deyərdik ki, o müəllimlərin hamısı bir nəfər kimi orda dərs deməkdən məmnundur…
Bu arada bəzi tanımış şəxslər, eləcə də bəzi deputatlar təklif edirlər ki, Qarabağda işləyən müəllimlərin əməkhaqları artırılsın, onlara əlavə əməkhaqqı və imtiyazlar verilsin. Bu təklifi anlamaq elə də asan deyil. Bəziləri elə qələmə vermək istəyir ki, Qarabağda işləmək sanki bu insanlara verilmiş “cəzadır”. Tarixən görmüşük ki, çətin dağ şəraitində işləyənlərə əlavə pul verilsin, yaxud zərərli zonalarda, yerlərdə işləyənlərə əlavə əmək haqqı ödənilsin. Qarabağda işləməyin nəyi zərərlidir ki, belə təkliflər verilir? Kim Xankəndidə, kim Şuşada işləmək istəməz ki?! O məktəblər yüksək səviyyədə təmir olunmuş, bütün lazımı vəsaitlərlə təmin edilmiş müasir məktəblərdir ki, səfalı yerlərdə yerləşir. Bu halda hər kəs gedib orda işləmək istəyər, işləyə bilər. Belə təklif edə bilərdilər ki, Qarabağda işləyən müəllimlərin ailələrinin də orda yaşaması üçün şərait yaratmaq lazımdır. Onlara xidməti evlər və sair vermək olar. Bu tam yerində olardı. Yoxsa bəziləri o müəllimlərin əlavə əmək haqqı ilə təmin edilməsi təklifini verməklə, sanki Qarabağı bir "cəza" zonası kimi qəbul etdiyini göstərir. Deyirlər ki, yəni müəllim orda işləyirsə demək ona əlavə pul verilməlidir. Sanki onlar səfalı bir güşədə, səfalı bir yerdə yox, "vrednı" bir ərazidə işləyir.
“…Belə bir təklifin səsləndirilməsi düzgün deyil, bu, yanlış rəyin formalaşmasına səbəb ola bilər”
Təhsil eksperti, filologiya üzrə fəlsəfə doktoru Elyar İslamoğlu “Bakı-Xəbər”ə bildirdi ki, Qarabağda işləyən müəllimlərin əməkhaqlarının qaldırılması ilə bağlı təklifin irəli sürülməsi doğru deyil: “Əslində bu çox ziyanlı təklifdir. Bu təklifi irəli sürməklə ictimaiyyətdə belə yanlış bir fikir formalaşdırmaq istəyirlər ki, heç kim guya Qarabağda işləməyə getmək istəmir, ona görə də məcbur qalıb müəllimlərin əməkhaqqını artırırlar, yaxud onlara əlavə əməkhaqqı verirlər. Bu düzgün yanaşma deyil. Orda işləyən müəllimlər əslində işlərindən çox məmnundurlar və öz peşələrinin öhdəsindən şərəflə gəlirlər. Keçmiş məcburi köçkünlər arasında da kifayət qədər müəllimlər var və onlar doğma yurdlarında, ata ocaqlarında yaşamaq və çalışmaq istəyirlər. Buna görə də sorğu keçirmək lazımdır və hansı müəllimlər Qarabağda könüllü işləmək istəyirsə ora göndərsinlər. Bakıda saatlarla tıxaclarda qalıb işə gecikməkdənsə, əsəbiləşməkdənsə hər kəs gedib tıxacsız, gözəl havası-suyu, təbiəti olan Qarabağda gözəl evlərdə yaşamağı, müasir məktəblərdə işləməyi üstün tutar. Hətta belə bir çağırış olarsa bütün müəllimlər Qarabağda işləməyə həvəslə gedəcəklər. Buna heç kəsin şübhəsi olmasın. Ona görə də, Qarabağda işləyən müəllimlərin əməkhaqqısı ilə bağlı fikir formalaşdırılmasını düzgün hesab etmirəm. Bu düzgün yanaşma olmamaqla yanaşı, həm də dövlətin apardığı siyasətə ziddir. Çox təəssüf ki, bəziləri belə rəy yaratmaq istəyirlər ki, guya heç kəs orda işləmək, ora qayıtmaq istəmir, məcburi şəkildə maaşları artırırlar ki, bəlkə kimlərsə gedib orda işləsin. Bu rəyi yaratmaq istəyənlər yanılırlar”.
E.İslamoğlu qeyd etdi ki, bu gün əksinə, maaşdan aslı olmayaraq müəllimlərimiz Qarabağda işləməyə böyük meyl göstərirlər.
E.İslamoğlu bildirdi ki, Qarabağda işləyən müəllimlərin maaşlarının artırılması təklifini verənlər yaxşı olardı bu təklifi onlarla bağlı yox, şəraitsiz ucqar dağ kəndlərində, sərhədyanı rayon və kəndlərdə çətin şəraitdə işləyən müəllimlərlə əlaqədar versinlər. “Yolsuz, izsiz, təmirsiz məktəbləri olan ucqar dağ kəndlərində çətin şəraitdə işləyən müəllimlərin maaşlarının artırılması, onlara əlavə əməkhaqqının verilməsi daha doğru olar. Çünki onlar uzun illərdir çox şəraitsiz məktəblərdə şagirdlərə bilik öyrədirlər. Sərhəddyanı kənd və qəsəbələrdə dərs deyən müəllimlərin də əmək haqlarının nəzərdən keçirilməsi zərurətdir. Dediyim kimi, bu müəllimlər çətin şəraitdə işləyirlər. Yoxsa Qarabağda işləyən müəllimlərlə bağlı belə bir təklifin səsləndirilməsi düzgün deyil, bu, yanlış rəyin formalaşmasına səbəb ola bilər”-deyə E.İslamoğlu qeyd etdi.
İradə SARIYEVA
