İlham Əhmədov: “Sertifikatlaşdırmadan kənar qalan şəxslərin müvafiq işlə təmin olunması inandırıcı görünmür”
Sertifikatlaşdırmada uğur qazanmayan şəxslərin sosial vəziyyətləri və məşğulluq imkanlarının qiymətləndirilməsi məqsədilə yerli təhsili idarəetmə orqanlarında xüsusi komissiyalar yaradılıb. Bu barədə MÜTDA-nın yaydığı məlumatda qeyd edilir.
Bildirilir ki, komissiyalar tərəfindən keçirilmiş fərdi görüşlər nəticəsində sosial həssaslıq meyarları əsasında prioritetlik səviyyələri müəyyən edilib və işlə təmin olunma istiqamətində müvafiq tədbirlər görülüb.
Məlumat üçün bildirək ki, cari ildə baş tutmuş sertifikatlaşdırma prosesində 2343 nəfər müvafiq keçid balını toplamayıb. Müvafiq komissiyalara müraciət edən şəxslərin sayı 872 nəfər olub. Hazırda sosial baxımdan ən həssas olan vətəndaşların alternativ işlərlə təminatı üzrə rəsmiləşdirmə prosesinə başlanılıb.
Maraqlıdır, bu proses necə icra olunacaq? Sertifikatlaşdırmadan kənar qalan şəxslərin hər biri müvafiq işlə təmin olunacaqmı? Alternativ işlə təmin olunmayacaq şəxslərin sonrakı taleyi necə olacaq?
“Sertifikatlaşdırmadan kənar qalan şəxslərdən tək-tükü hansısa bir işlə təmin oluna bilər, ancaq...”
Təhsil eksperti, dosent İlham Əhmədov “Bakı-Xəbər”ə şərhində bildirdi ki, sertifikatlaşdırmadan kənar qalan şəxslərin müvafiq işlə təmin olunması inandırıcı görünmür: “Təhsil sisteminin elə bir vakansiyası yoxdur ki, həmin şəxslər əlavə işlə təmin olunsun. Məktəblərdə də o qədər vakansiya olmur. Təhsil sistemi bunu özü-özlüyündə həll edə bilməz. Bunu Məşğulluq Agentliyi və nazirlik birlikdə həll etməlidir. Məşğulluq Agentliyinin əlində olan vakansiyalar isə pedaqoji sahəyə uyğun deyil. Sertifikasiya prosesi başlananda deyilmişdi ki, saxta diplomlu müəllimlər çoxdur, onlar müəyyən edilməlidir. Ancaq bu proses fasiləsiz gedir. Indi də deyirlər ki, bunu keyfiyyəti yüksəltmək üçün edirlər. Keyfiyyəti yüksəltmək üçün edirlərsə, niyə indiyə qədər ali məktəblərdə müəllim hazırlığı ilə bağlı normal islahat aparılmayıb, universitetlərin inkişafı haqqında düşünülməyib? Həmin keyfiyyətsiz müəllimləri yetişdirən universitetlərdə proses bu gün də davam edir. Yəni keyfiyyətsiz müəllimlər əmək bazarına daxil olmaqda davam edir. MİQ imtahanlarının nəticələri də bunu sübut edir. Nazirliyə doğrudan da, keyfiyyət lazımdırsa, ali pedaqoji təhsilin inkişafı ilə bağlı strategiyalar, proqramlar, konkret tədbirlər etməlidir. Ancaq aydın olur ki, məqsəd keyfiyyət deyil, ixtisar etmək, təhsil sistemində olan işçiləri azaltmaq, maaş fonduna qənaət etməkdir”.
Ekspert hesab edir ki, sertifikatlaşdırmadan kənar qalan şəxslərdən tək-tükü hansısa bir işlə təmin oluna bilər: “Kəsilən müəllimlərin hamısının işlə təmin olunması mümkün deyil. Narazı kütləni sakitləşdirmək üçün belə bir söhbət ortaya atılıb”.
Günel CƏLİLOVA
