Hacı Böyükağa Ələkbərov – 85.
İnsan var ki, yaşayır, yaradır, dünyasını dəyişir və müəyyən vaxt keçdikdən sonra unudulur. İnsan da var ki, yaşayır, yaradır, özü olmayanda da yaratdıqları yaşayır, yaradanını yaşadır.
Belə xeyirxah əməlləri ilə tanınanlardan biri də uzun müddət təhsil sahəsində çalışmış, sonradan Abşeron Rayon İcra Hakimiyyətinin Digah kənd ərazi dairəsi üzrə nümayəndəsi vəzifəsində fəal çalışmış Hacı Böyükağa Ələkbərovdur.
Hacı Böyükağa Xoşbəxt oğlunun adını Bakı ətrafında, eləcə də Abşeron rayonunun bütün kənd və qəsəbələrində tanıyır, xeyirxah əməllərindən bu gün də söz açır, onu xatırlayır, ruhuna dualar oxuyurlar.
Mən Hacı Böyükağanı Abşeron Rayon İcra Hakimiyyətinin keçirdiyi tədbirlərdə görmüş və onunla tanış olmuşam. Sonralar onunla bir çox məclislərdə görüşmüş, səmimi söhbətlər etmişik. Hacı çox səmimi, mehriban, sakit təbiətli bir insan idi. Xatırlayıram, Digahda icra nümayəndəsi işləyəndə onun sayəsində uşaq bağçası yenidən bərpa olundu, kəndin bəzi yerlərinə aslaft örtüyü salındı. Bir sözlə, kənddə quruculuq və abadlıq işləri yüksək səviyyədə aparılırdı.
Hacı Böyükağa Xoşbəxt oğlu Ələkbərov 1940-cı ildə Abşeron rayonunun Digah kəndində anadan olmuşdur. Ələkbərovlar əslən Cənubi Azərbaycandan olsalar da, Digahda məskunlaşmış, böyük nüfuz sahibi olmuş, sayılıb-seçilənlərdən olmuşlar. Digah qəsəbəsində doğulub boya-başa çatan Hacı Böyükağa Ələkbərovun həyatının çox hissəsi öz elinin-obasının inkişafına yönəlmişdir. Uzun müddət Digah qəsəbə sovetinin sədri və son vaxtlar icra başçısının nümayəndəsi vəzifəsini daşıyan el ağsaqqalı olan bu şəxs işlədiyi müddətdə, həm də xeyriyyəçi kimi tanınmışdı.
Onun rəhbərliyi və şəxsi təşəbbüskarlığı ilə qəsəbə ildən-ilə gözəlləşmiş, həllini tapmayan problemlər öz həllini tapmışdır. Həmişə qurub-yaratmaq həvəsi ilə döyünən Hacı Böyükağa Ələkbərov rayonda başlanan hərtərəfli intibah havasını Digaha da gətirirdi.
Son dövrlərdə icra başçısının nümayəndəsi kimi fəaliyyət göstərən Hacı Böyükağa Ələkbərovun təşəbbüsü ilə qəsəbəyə elektrik enerjisinin verilməsini yaxşılaşdırmaq məqsədilə yüksək gərginlikli xətt çəkilmiş, yəni transformatorlar qoyulmuşdur. Həmçinin qaz və su problemlərinin qarşısını almaq üçün xeyli irəliləyişlər olmuşdur.
Hacı Böyükağa 1996-cı ildə Həcc ziyarətində olmuş, imkansız ailələrə köməklik etmişdir. Hacı Digahdakı məscidi – Allah evini təmir etmiş, ibadət edənlərin ixtiyarına vermişdir. Hacı Böyükağa Xoşbəxt oğlu 2007-ci ildə "Zəfərnamə" adlı kitabını yazmış, oxucuların ixtiyarına vermişdir.
Onun qələmə aldığı "Zəfərnamə" kitabı Kərbalada İmam Hüseynin və onun ailəsinin, silahdaşlarının faciəvi talelərindən bəhs edən bir əsərdir. Hacı həm də bu kitabında özünü bir din xadimi kimi, eləcə də ədəbiyyatçı, tənqidçi kimi də göstərmişdir. Hacı deyərdi ki, kitabın adını "Zəfərnamə" qoymaqda bir məqsədim var, o da hər bir müsəlman olan şəxsi başa salmaqdır ki, bu kitabda yazılanları kim oxuyarsa onlara saf ürəklə, şəkk-şübhə etmədən əməl edərlərsə, inşallah, Allah-təala onun zülmətdən çıxıb behiştə daxil olmasına köməklik edər.
Bu dünyada və o dünyada ona "zəfər" qazandırar.
Diqqəti cəlb edən əsas məqamlardan biri də odur ki, müəllif bu kitabında özünü hərtərəfli, geniş bir ədəbi zövqə malik olduğunu göstərmişdir.
Belə insanların həyatı ilə tanış olmaq, onların həyat yolunu araşdırmaq, ömür kitabını vərəqləmək hər bir şəxs üçün xoşbəxtlikdir. Gənclər üçün örnək olan belə qabaqcıl ziyalıları, rəhbərləri yeni yetişən gənc nəslə təqdim etmək onların fəaliyyəti haqqında yazmaq, həm mənəvi borcdur, həm də işıqlı yaradıcılıq yoludur.
Sonda bircə sözü deyib oxuculardan ayrılıram.
‐ 85 yaşın mübarək, Hacı!
Elşad Dağlı, Azərbaycan Yazıçılar Birliyinin üzvü, "Cabir Novruz" Mədəniyyət Fondu mətbuat xidmətinin rəhbəri.
