Aslan Əsədov: "Zabrat yolunu özlərinə daha yaxın hesab etdiklərindən bu yola üstünlük vermirlər"
Məlum olduğu kimi, ötən ilin noyabrında uzunluğu 12,7 kilometr olan Böyükşor-Pirşağı yeni avtomobil yolu istifadəyə verildi. Yeni yol başlanğıcını Balaxanı qəsəbəsinin ərazisindən (Böyükşor gölü) götürməklə Digah və Məhəmmədi qəsəbələrindən keçərək Kürdəxanı və Pirşağı qəsəbələrinə qədər uzanır.
Layihəyə əsasən, yolboyu 6 yol ötürücüsü və bir avtomobil keçidi inşa edilib. Bundan başqa, yolboyu 3 yerdə "U" tipli geri dönüş keçidi yaradılıb.
Yol istifadəyə veriləndə paytaxtda ən sıx tıxacların yaşandığı Zabrat-Sabunçu yolunda vəziyyətin yaxşılaşacağı deyilirdi. Bununla bağlı böyük gözləntilər var idi. Ancaq 3 aydır yol istismara verilsə də, Sabunçu-Zabrat yolunda tıxaclarda azalma müşahidə olunmur. Niyə?
"Böyükşor-Pirşağı avtomobil yolu bir neçə qəsəbədən keçsə də, həmin qəsəbələrdə əhalinin sıx məskunlaşması yoxdur"
Sözügedən məsələyə aydınlıq gətirən nəqliyyat sahəsi üzrə ekspert Aslan Əsədov "Bakı-Xəbər"ə açıqlamasında məsələyə fərqli prizmadan yanaşdı. Onun fikrincə, əslində bu, tıxacın azalmasına nisbətən təsir edib, amma avtomobil çox olduğu üçün bu o qədər də hiss olunmur: "Böyükşor-Pirşağı yeni avtomobil yolunun inşası müəyyən dərəcədə Zabrat yolu istiqamətində yüklənməni azaldıb. Ancaq məsələ ondadır ki, həmin istiqamətdə hərəkət edən nəqliyyat vasitələrinin sayı digər istiqamətdə hərəkət edən nəqliyyat vasitələrindən daha çoxdur. Başqa bir tərəfdən, Böyükşor-Pirşağı avtomobil yolu bir neçə qəsəbədən keçsə də, həmin qəsəbələrdə əhalinin sıx məskunlaşması yoxdur. Çünki Zabratda, Maştağada, Nardaranda əhali daha sıx məskunlaşıb. Onlar da Zabrat yolunu özlərinə daha yaxın hesab etdiklərindən Böyükşor-Pirşağı yoluna üstünlük vermirlər. Tıxacın yaranma səbəblərindən biri də bununla əlaqədardır. Böyükşor-Pirşağı yolundan əsasən Pirşağının, Məhəmmədinin, Digahın və Kürdəxanının bir hissəsi daha çox istifadə edir. O hissələr ki, həmin yola daha çox yaxındılar. Nəzərə almaq lazımdır ki, Böyükşor-Pirşağı yolu həm rahatdır, həm də məsafə baxımından çox qısadır. Ona görə də sürücülərə tövsiyə edərdim ki, tıxaclardan xilas olmaq üçün həmin yola üstünlük versinlər. Başqa bir tərəfdən, yay aylarında bağ mövsümü başlayır. Həmin vaxt bir çoxları şəhərətrafı bağ evlərində qalmağa üstünlük verir. Hesab edirəm ki, bağ evlərindən istifadə edənlər yay mövsümündə Böyükşor-Pirşağı yoluna üstünlük verəcəklər".
Vidadi ORDAHALLI
