Fərid Həşimov: "Dünyada elektrik və hibrid avtomobillərə maraq artdıqca, Azərbaycanda da bu tendensiya müşahidə olunur"
Məlum olduğu kimi, yaşı 10 ildən çox olan minik avtomobillərinin Azərbaycan ərazisinə gətirilməsi qadağandır. Bu qadağanın tətbiq olunmasında məqsəd insanların həyat və sağlamlığının, ətraf mühitin qorunması, avtonəqliyyat vasitələrindən atmosfer havasına atılan zərərli maddələrin miqdarının azaldılması və ekoloji vəziyyətin yaxşılaşdırılmasına dəstək olmaqdır.
Yəni Nazirlər Kabinetinin qərarına əsasən, yaşı 10 ildən çox olan nəqliyyat vasitələri ölkəmizə idxal oluna bilməz. Bu qərardan sonra avtomobil bazarında durğunluq müşahidə olunur.
"İstismar müddəti 10 ildən çox olan avtomobillərin Azərbaycana idxalı məhdudlaşdırılıb və yeni maşınlar da bahadır"
Nəqliyyat eksperti Fərid Həşimov "Bakı-Xəbər"ə şərhində bildirdi ki, əvvəllər istismar müddəti 10 ildən çox olan avtomobillər ölkəyə daha çox idxal edilirdi və bunların da dəyəri çox aşağı idi: "Artıq istismar müddəti 10 ildən çox olan avtomobillərin Azərbaycana idxalı məhdudlaşdırılıb və yeni maşınlar da bahadır. Bu da bazarın durğunlaşmasına səbəb olub. İdxal qiymətin artmasının digər səbəbi dünyada avtomobillərin istehsal qiymətinin yüksəlməsidir. Bundan başqa, yalnız elektrik mühərriklə hərəkətə gətirilən nəqliyyat vasitələrinin ölkəmizə idxalı kəskin artıb ki, bunların da dəyəri bahadır. Onu da deyim ki, dünyada elektrik və hibrid avtomobillərə maraq artdıqca, Azərbaycanda da bu tendensiya müşahidə olunur. Dövlətin ekoloji tələbləri sərtləşdirməsi və daha müasir avtomobillərin dəstəklənməsi siyasəti çərçivəsində hibrid və elektrikli nəqliyyat vasitələrinə tələb artmağa başlayıb. Hazırda elektrik avtomobillərinin idxalı və satışında müəyyən qədər artım olsa da, bazarın ümumi payında bu növ nəqliyyat vasitələri hələ də məhdud sayda təmsil olunur".
Ekspertin sözlərinə görə, Azərbaycan avtomobil bazarının mövcud vəziyyəti bir sıra iqtisadi, sosial və texnoloji amillərin təsiri ilə formalaşır: "Bu bazarın dinamikası həm daxili, həm də xarici amillərlə, o cümlədən avtomobil idxalı, yerli istehsal, ikinci əl avtomobillərin satışı, avtomobil kreditləşməsi, qiymət dəyişiklikləri və digər iqtisadi göstəricilərlə müəyyən olunur. Azərbaycan avtomobil bazarı, əsasən xaricdən idxal olunan avtomobillərlə formalaşır".
Günel CƏLİLOVA
