Rizvan Fikrətoğlu: "Hadisəni törədən uşaq cəza olaraq məktəbdən çıxarılıb, məncə bu çıxış yolu deyil"
Son dövrlərdə orta məktəblərdə baş verənlər, şagirdlərin davranışları ilə bağlı neqativ xəbərlər daha intensiv şəkil almağa başlayıb. Xüsusilə məktəblilərin bir-birinə qarşı kobud rəftarının, hətta zorakılıq hallarının yaşandığını müşahidə edirik.
Məktəbli yoldaşını bıçaqlayan, döyən şagirdlərin müəyyən davranış pozuntularının olduğu açıq-aşkar ortadadır. Bu günlərdə isə Şabran şəhəri Tofiq Abbasov adına 1 nömrəli tam orta ümumtəhsil məktəbinin 10-cu sinif şagirdi məktəbdənkənar ərazidə 11-ci sinif şagirdinə qarşı aralarında yaranmış mübahisə zamanı xəsarət yetirib, qarşı tərəfin gözü zədələnib. Məlumata görə, məktəblinin fiziki və psixoloji durumu məktəb rəhbərliyi və idarə tərəfindən izlənilir. Nəticədə 10-cu sinif şagirdinə xəsarət yetirən məktəbli təhsil müəssisəsindən uzaqlaşdırılıb. Bu barədə Quba-Xaçmaz Regional Təhsil İdarəsi məlumat yayıb.
Maraqlıdır, məktəbdən uzaqlaşdırılmış şagirdin sonrakı taleyi necə olacaq, o, hara yönləndiriləcək? Təbii ki, digər məktəblər də həmin uşağı intizamsız məktəblidir deyə qəbul etməyəcək, bu halda həmin şagirdin təhsil hüququ necə təmin olunmalıdır? Ümumiyyətlə, bu kimi hadisələrdə günahkarı təhsil müəssisəsindən uzaqlaşdırmaq əvəzinə, onu başqa cür cəzalandırmaq olarmı?
"Yetkinlik yaşına çatmayanlar qəsdən sağlamlığa az ağır və ya ağır zərər vurmağa görə cinayət törətmiş sayılır və ona cəza təyin edilə bilər"
Təhsil eksperti Rizvan Fikrətoğlu "Bakı-Xəbər"ə açıqlamasında bildirdi ki, 11-ci sinif şagirdi yəqin bugünə qədər həmin təhsil müəssisəsində təhsil alıb: "Maraqlıdır, o uşağın valideynləri, müəllim və məktəb psixoloqu uşağın tərbiyəsinə, davranışına niyə fikir verməyib? Bəzi valideynlər "uşaqdı" deyib, yola verirlər, ancaq cəmiyyət buna yol vermir. Təəssüf ki, məktəblilər arasında zorakılıq halı artıb. İllər öncəki məktəb ab-havası yoxdur, biz müəllimlərdən qorxardıq. Bu qorxu nə psixologiyamızı pozurdu, nə də dərslərimizə təsir edirdi. Ancaq indi vəziyyət dəyişib. Məlum problemin qarşısını almaq üçün kişi müəllimlər yenidən məktəbə qaytarılmalıdır. Hadisəni törədən uşaq cəza olaraq məktəbdən çıxarılıb. Məncə bu çıxış yolu deyil. O uşaq islah olunmalıdır, psixoloji xidmət almalıdır. Bu gün məktəb-şagird-valideyn üçbucağında qırılmalar var. Əlaqələr möhkəmlənməlidir".
Həmsöhbətimiz bildirdi ki, ciddi tərbiyə şəraitinə ehtiyacı olan uşaq və yeniyetmələr üçün xüsusi məktəblər var. Bu məktəblər ailə şəraitində tərbiyəsi mümkün olmayan, təhsil aldıqları məktəblərin nizamnamə tələblərini pozan və təhsildən müntəzəm yayınan, birgəyaşayış qaydalarına uyğunlaşmayan, səfil həyat tərzi keçirməyə meyl göstərən, habelə hüquq pozuntularına yol verib cinayət törədən uşaq və yeniyetmələrin pedaqoji nəzarət altında saxlanması, təhsilini davam etdirməsi və islah olunması üçün lazımi şərait yaradılması məqsədilə təşkil edilir: "Xüsusi məktəblər 200 nəfərdən çox olmamaqla oğlan və qızlar üçün ayrılıqda dövlət hesabına təşkil edilir. Təcrübə göstərir ki, yetkinlik yaşına çatmayan (18 yaşına çatmayan) şəxslərdə cinayətkarlığa meyl əksərən kriminal aləmin və qaydalarının təbliği nəticəsində yaranır və həmin şəxslər bunun nəticəsində və ya digər yaşa dolmuş cinayətkarların təhriki ilə cinayət yoluna qədəm qoyurlar. Yetkinlik yaşına çatmayanlar qəsdən sağlamlığa az ağır və ya ağır zərər vurmağa görə cinayət törətmiş sayılır və ona cəza təyin edilə bilər".
Günel CƏLİLOVA
