İlin 12-ci gününə sözardı
"Şübhəsiz ki, Yaqub onu öyrətdiyimiz üçün bir elm sahibi idi. Lakin insanların əksəriyyəti bunu bilməz!" "Quran", "Yusif" surəsi, 68. Bu gün ilin 12-ci günü olmasını nəzərə alıb, "Quran"ın 12-ci ("Yusif") surəsində olan hikmətlərə nəzər salaq:
Həkim olaraq, surədə diqqətimi çəkən məqamlardan biri Yaqub Peyğəmbərin oğlanlarını bəd nəzərlərdən qorumasıdır. Belə ki, o, on bir oğlunu Misirə ərzaq dalınca göndərərkən, tapşırdı ki, hamınız şəhərin eyni qapısından daxil olmayın – yarınız bir, yarınız da digər qapıdan girin; sizə göz dəyməsin. Bu barədə "Quran"ın "Yusif" surəsində Allah belə buyurur:
"Yəqub dedi: "Oğullarım! Misirə eyni bir qapıdan girməyin, ayrı-ayrı qapılardan daxil olun sizə göz dəyməsin. Bununla belə, mən Allahın qəza-qədərini sizdən heç bir şeylə dəf edə bilmərəm. Hökm yalnız Allahındır. Mən ancaq Ona təvəkkül etdim. Qoy təvəkkül edənlər də ancaq Ona təvəkkül etsinlər!" 12:67
Aydındır ki, "Quran" əslində peyğəmbərlərə yox, öz oxucusuna müraciət edir və sətiraltı (kodlaşdırılmış) mesajlar verir. Bu ayədə Allah-təala Öz oxucusuna Yaqub Peyğəmbərin dili ilə mesaj ötürür ki, özünüzü bəd nəzərlərdən (neqativ enerjidən) qoruyun.
Elmi-lədun araşdırmalarımız göstərir ki, insanlar bu mesajı diqqətə almadıqlarına (əhəmiyyət vermədiklərinə) görə bunun ziyanını çkməkdədirlər. Bu bir faktdır ki, sovet dönəmi ilə müqayisədə bu gün sağalmaz xəstəliklər həddən artıq artmışdır. Müqayisə etdiyimiz dövrdə hər rayonda bir, Bakıda isə, cəmi bir neçə xəstəxana vardı. Buna baxmayaraq, bu az sayda xəstəxanalar insanların sağllamlığını təmin edə bilirdilər.
Bu gün kəndlərin demək olar hamısında tibb məntəqələri fəaliyyət göstərir; rayon mərkəzlərində xəstəxana ilə yanaşı özəl tibb müəssisələri və diaqnostika mərkəzləri fəaliyyətdədir. Bakıda isə, xəstəxanaların demək olar ki, sayı hesabı yoxdur – az qala hər addımda bir xəstəxana var. İlk baxışdan fikirləşmək olar ki, belə az əhalisi olan ölkədə bunca xəstəxana varsa, yəqin oralarda xəstə qıtlığı olar və oranın həkimləri bekar qalarlar. Lakin, həmin tibb müəssisələrinə girdikdə bunun belə olmadığını, əksinə, istənilən həkimin qapısı ağzında uzun-uzadı növbələr olduğunu görmək mümkündür. Nəzərə alsaq ki, insanlarımızın bir qismi müalicə üçün başqa dövlətlərə üz tuturlar, onda gözlərimiz önündə heyrətamiz mənzərə yaranır...
Sual olunur: son illər nə baş verir ki, cəmiyyətimizdə bu qədər xəstəlik yaranır?
Bu istiqamətdə apardığımız araşdırmalar, sorğular göstərdi ki, bir klinikada həkim növbəsi gözləyən adam keçən aylarda başqa-başqa klinikalarda müalicə olunublar. Belə çıxır ki, bu klinikada da müalicə almış adamlar yəqin indi başqa klinikalarda və yaxud xaricdəki klinikalarda növbə gözləyirlər... Beləliklə, eyni xəstələr illər uzunu bir çox klinikalarda həkim növbəsi gözləyirlər...
Bəs bunun səbəbi nədir? Həkimlərimizin savadsızlığımı? Müasir diaqnostika aparatlarının çatışmazlığımı?
Araşdırmalarımız göstərir ki, səbəb bunlardan heç biri deyildir. Yəni, həkimlərimiz onlara tədris edilmiş elmi heç də pis mənimsəməyiblər; diaqnostika aparatları da kifayət qədər müasir və boldur. Elə isə, bəs niyə bu xəstələr sağalmırlar və karusel kimi klinikalar arasında fırlanırlar?
Şübhəsiz ki, bunun sirləri vardır. Yaqub əleyhissəlamın oğlanlarını neqativ təsirlərdən qoruması ayəsini təsadüfən gətirmədim. Nəzərə alaq ki, Allah-təala mənası olmayan bir epizodu "Quran"a salmaz. Elmi-lədun araşdırmalarımız göstərir ki, bu gün cəmiyyətdə tüğyan edən və sağalmayan xəstəliklərin sirri həmin ayədə gizlənir: "Yəqub dedi: "Oğullarım! Misirə eyni bir qapıdan girməyin, ayrı-ayrı qapılardan daxil olun sizə göz dəyməsin...".
Apardığımız tədqiqatlar göstərir ki, neqativ enerji bütün xəstəliklərin özülünü (fundamentini) təşkil edir. Yəni, xəstəliyi binaya bənzətsək, onun fundamenti neqativ enerjidir (pis nəzərlər, magik təsirlər və s.). Xəstə həkimə müraciət edərkən onu diaqnostika aparatlarından keçirib, düzgün diaqnoz qoyurlar və "binanı" sökməyə başlayırlar. "Fundament"ə (neqativ enerjiyə) qədər "sökülmə" çox uğurla gedir; bura çatdıqda isə, müalicə dayandırılır. Çünkü, tibb elmi və diaqnostika aparatları neqativ enerjini təyin etməkdə acizdir. Beləliklə, xəstə özünü sağalmış hiss edir və aparatlar, analizlər də onun sağlamlığını təsdiq edir (bu, çayır bitkisinin gövdəsini kəsib, kökünü saxlamağa bənzəyir).
Beləliklə, xəstə evə buraxılır. Lakin, "fundament" qaldığından az müddət keçəndən sonra xəstəlik təkrar daha kəskin formada dirçəlməyə başlayır. Təbii ki, bu vaxt xəstənin beynindən keçən ilk fikir həkimlərin savadsızlığı, onu aldadaraq küllü miqdarda pulunu mənimsədikləri olur. Ona görə də bir çox hallarda pasiyent təkrar həmin klinikaya yox, başqa klinikaya üz tutur və yenə də eyni halla qarşılaşır... Beləliklə karusel yaranır. Bu gün tibb müəssisələrində növbələrin yaranmasının sirri məhz budur: "Quran"dan kənar düşməyimiz və orada verilən mesajları qulaqardına vurmağımız.
Diqqətinizi çox da uzaq olmayan keçmişə - 50-60 il bundan qabağa yönəltmək istəyirəm. Hansı ki, həmin dövrdə Azərbaycanda (eləcə də dünyada) tibb elmi inkişaf etməmişdi. Sual yaranır: niyə tibb elmi inkişaf etməyən dövrdə bu qədər xəstə, bu qədər xərçəng və digər sağalmaz xəstəlik yox idi? Niyə o vaxt xəstlər adi ara həkimlərinin verdiyi müalicəvi otlarla indikindən daha effektli müalicə olunurdular?
Bunun səbəbi heç də ara həkimlərinin indiki tibb işçilərindən savadlı olmasında deyildir. Əslində səbəb o vaxtkı insanların xəstələnən vaxt öz dövrünün kəramət sahibləri (Allah dostları) ilə təmasda olmasında idi. Bundan qabaqkı yazımda kəramət sahiblərini tester cihazı ilə boşuna müqayisə etməmişdim. Bu cihaz dəyişən cərəyanı sabit cərəyana çevirdiyi kimi, kəramət sahibi də xəstəliyin fundamenti olan neqativ enerjini insandan yox edir və daxili enerjisini sabitləşdirir. Bundan sonra köksüz (fundamentsiz) qalan xəstəlik ya cüzü müalicə, ya da insanın öz daxili enerjisi ilə əriyib yox olurdu.
İstənilən xəstəliyin fundamenti saydığımız neqativ enerjini necə təyin etmək olar?
Qeyd edim ki, bu enerji insanda baş, boyun, onurğa ağrıları, əsəb, yuxusuzluq, qorxu, panikatak, qarabasma, qorxulu yuxular görmə, sağalması problemə çevrilən müxtəlif xəstəliklər, uğursuzluqlarla... özünü biruzə verir.
Dərmanların tərkibində olan keyidici maddələr müalicə vaxtı ağrıların müvəqqəti kəsməsinə səbəb olsa da, müalicə dayandırıldıqdan sonra bu əlamətlər təkrar görünməyə və dirçəlməyə başlayır...
12-ci surədə diqqət çəkən digər məqam, Yaqub Peyğəmbərin oğlu Yusifin köynəyini gözlərinə sürtərkən gözlərinin açılması səhnəsi idi. Quranda buyurur ki, "Rəbbin hər şeyi elmlə ehtiva etmişdir". Yaqubun gözlərinin açılması da şübhəsiz ki, elmə bağlıdır. Həmin olaydan min illər keçəndən sonra (günümüzdə) elm sübut etdi ki, böyük oğlun tərində olan elementlər atanın gözünün dərmanıdır. Əslində Yaqub Peyğəmbərin tutulmuş gözlərini açan oğlunun köynəyindəki tər idi... Buradan belə qənaətə gəlmək olur ki, xalqımızın "Allah övladlarını gözünə çıraq (oxu: işıq) eləsin" deyimi də boşuna yaranmayıb və elmi cəhətdən artıq təsdiq olunub. "Yaqub (!) belə dedi: "Mən dərd-sərimi yalnız Allaha ərz edirəm və Allahdan (gələn elmlə) sizin bilmədiklərinizi də bilirəm!" "Quran", 12:86
Dr. Paşa Yaqub - həkim, bilici
