Məktəbli qızımız ABŞ və Dubayın müsabiqəsində qızıl medal qazandı...
Nəzrin Hüseynli: "Qazandığım ilk qızıl medalın sevincini, məndə yaratdığı təəssüratı sözlə ifadə edə bilmirəm"
Bütün uşaqlar eyni cür olmur, elə uşaqlar olur ki, öz istedadları, bilik və bacarıqları ilə öz yaşıdlarınan seçilir, onlardan bir neçə addım irəlidə olurlar. Belə uşaqların düşüncəsi, fənlərə marağı, qavrayışı daha çevik olur. Azərbaycanda kifayət qədər bu cür şagirdlər var ki, onlar nəinki ölkəmizdə, eləcə də beynəlxalq aləmdə tanınırlar.
Bakı şəhəri 220 saylı məktəb-liseyin XI sinif şagirdi Hüseynli Nəzrin Tərlan qızı riyaziyyat, kimya və digər fənlər üzrə fərqlənən, bu yönlərdə keçirilən yerli və beynəlxalq olimpiadalarda, bilik, intellekt yarışlarında üzümüzü ağ edən balalarımızdandır.
Nəzrinin uğur hekayəsi olduqca maraqlıdır. Oxumaqdan zövq alan, öyrənməkdən yorulub-usanmayan Nəzrin Hüseynli uşaqlıqdan meylini kitablara, oxuyub-öyrənməyə salıb. Qəhrəmanımız deyir ki, öyrəndikcə özünü daha xoşbəxt sayır və ətrafındakı uşaqların, şagirdlərin də bilikli olmasını istəyir.
Nəzrin 13 yanvar 2008-ci ildə Bakıda müəllim ailəsində dünyaya gəlib, 2014-cü ildə birinci sinifə gedib. Nəzrin deyir ki, bütün fənləri yaxşı oxusa da, amma uşaqlıqdan texniki fənlərə xüsusi sevgisi və marağı olub. "Texniki fənləri daha çox sevirəm və uşaqlıqdan ən çox bu fənlərə maraq göstərmişəm. Texniki fənləri sevməyim mənim üzümə çox qapıları açdı, müxtəlif beynəlxalq olimpiadalara qatılmaq həvəsi yaratdı. Beləliklə olimpiadalara getməyə başladım. İndiyə qədər bir neçə dəfə müxtəlif ölkələrdə keçirilən olimpiadalarda iştirak etmişəm".
"...ABŞ tərəfindən təşkil olunan və sertifikatları dünyanın 26 ölkəsində tanınan "Copernicus olympiad"da riyaziyyat fənni üzrə qızıl medal qazandım"
Nəzrin deyir ki, texniki fənlərə marağı, bu sahədə daha çox öyrənmək, öyrəndiyini bölüşmək istəyini gerçəkləşdirmək üçün olimpiadalarda iştirak etmək qərarına gəlib və bunu gerçəkləşdirib. Nəzrinin uğur hekayəsinin ilk cümlələri də belə yazılmağa başlayıb. "Global Olympiad Center"in təşkilatçılığı altında keçirilən beynəlxalq olimpiadaların yerli mərhələlərində (seçim mərhələlərində) iştirak etdim və öz yaşıdlarımdan fərqlənməyi bacardım. İlk təcrübəm kimya fənni üzrə Birləşmiş Ərəb Əmirlikləri və ABŞ-ın təşkil etdiyi "Future intelligent student olympiad"da (FİSO) iştirakım oldu və qızıl medala layiq görüldüm. Bu olimpiadada qızıl medal almağım məni çox ruhlandırdı və növbəti olimpiadalarda iştirak etməyə həvəsləndirdi. Qazandığım ilk qızıl medalın sevincini, məndə yaratdığı təəssüratı sözlə ifadə edə bilmirəm. Yəni mənim üçün çox qeyri-adi bir sevinc idi. Növbəti tədris ilində isə İngiltərənin təşkil etdiyi İnternational math exam center (İMEC) riyaziyyat olimpiadasında iştirak etdim və bürünc medal qazandım. 2 ay sonra ABŞ tərəfindən təşkil olunan və sertifikatları dünyanın 26 ölkəsində tanınan "Copernicus olympiad"da riyaziyyat fənni üzrə qızıl medal qazandım".
Nəzrin bundan başqa e-Twinning-də "Edebiyat ve sanat" layihəsi üzrə müxtəlif təqdimatlar hazırlayıb Avropa keyfiyyət nişanı əldə edib. "Həmçinin UNESCO-nun dilçilik üzrə tanıdığı yeganə olimpiada olan İnternational Linguistics Olympiad-ın seçim və yarımfinal mərhələsində iştirak edib beynəlxalq sertifikat qazanmışam. Düzdür, sizə dedim ki, texniki fənnlərə daha çox marağım var, amma humanitar fənnlər sahəsində də özümü sınamışam və uğur əldə etmişəm. Hər qazandığım uğur məni başqa bir uğura, başqa bir nailiyyətə səsləyir".
Nəzrin bütün bunlara zəhmətlə, gecə-gündüz çalışmaqla, öz üzərində işləməklə nail olub. Əlbəttə, hər uğurun arxasında istedad, bilik, o biliyi, istedadı almaz kimi cilalayan zəhmət, əmək, bir də düzgün yönləndirmə dayanır. Təbii ki, Nəzrinin valideynləri onun bilik və bacarığının, intellektinin üzə çıxarılmasına dəstək olmasaydı, müəllimləri ona düzgün istiqamət verməsəydi, uğura gedən yolun başlanğıcını göstərməsəydi qəhrəmanımız üçün bütün bunlar əlçatmaz olardı. Nəzrinin uğurlarının təkrarlanmasına stimul verən amillərdən biri ailəsinin daim olunla qürur duyması, onu dəstəkləməsi olub: "Ailəmin hədsiz sevinməsi və mənlə qürur duyması məni olduqca həvəsləndirirdi. Odur ki, bu nəticələrimi əldə etdiyimə görə, valideynlərimə, həmçinin bu yolda mənə dəstək olan müəllimlərimə borcluyam. Heç şübhəsiz ki, gələcəkdə də öz uğurlarımla onların ürəklərini sevindirəcəyəm".
Nəzrinin gələcək arzularına gəlincə, o, mühəndislik üzrə təhsil almaq, kimya mühəndisi olmaq istəyir. Bakalavr təhsilini Bakı Ali Neft Məktəbində, magistraturanı isə Amerikada və ya İngiltərədə oxumaq arzusundadır. Nəzrin kimya mühəndisi kimi yüksək səviyyədə yetişmək və dövlətimizə fayda vermək niyyətindədir. Azərbaycanın işıqlı sabahını düşünən və o sabahı qurub-yaradanlardan biri də Nəzrin olacaq. Buna şübhəmiz yoxdur. 220 saylı məktəb-liseyin XI sinif şagirdi Nəzrin Hüseynli bilik sahəsində daha böyük nailiyyətlər qazanacaq və onun uğur hekayəsi günü-gündən zənginləşəcək.
İstedadlı, bilikli şagirdlərimiz sözün həqiqi mənasında bizim sərvətimizdir və onların uğur hekayəsi, qazandıqları nailiyyətlər başqa uşaqlar, şagirdlər üçün də stimulverici, həvəsləndirici bir vasitədir. Bu gün Nəzrin Hüseynli kimi şagirdlər öz məkəblərində neçə-neçə şagirdə örnək olaraq göstərilir. Bunun isə böyük mənəvi-tərbiyəvi əhəmiyyəti var. Nəzrin tam bir özgüvənli yeniyetmələrdəndir və belə şagirdlər gələcəkdə xalqımızın da güvənini qazanan, ona layiq olan bir şəxsiyyət kimi özünü təsdiqləyə biləcək...
Bu il Nəzrinin həyatında əlamətarlıqları ilə yadda qalacaq, o, orta məktəbi bitirib ali məktəbə imtahan verəcək. İnanırıq ki, o bu imtahanı da uğurla verib Ali Neft Məktəbinin tələbəsi olacaq... Uğurlar Nəzrin, yolun açıq olsun!
İradə SARIYEVA
