Nadim Əliyev: "Qəsəbələrdə quraşdırılan "DSL" internetlərin sürəti və keyfiyyəti zəif olur"
Bir müddətdir, ölkədə genişzolaqlı internet tarifləri üzrə sürət və ödəniş məbləğinə dəyişiklik edilib. Tarif üzrə sürət dəyişsə də, vətəndaş etirazları səngimək bilmir. İstifadəçilər qiymət dəyişikliyindən sonra internetin sürətinin azaldığından şikayətlənirlər.
Redaksiyamıza müraciət edən Abşeron rayon, Masazır qəsəbəsinin sakinləri bildirir ki, son 10 gündür adıçəkilən ünvanda telefon və internet işləmir. Şikayətçilər deyir ki, problemin həll olunması üçün "170" çağrı mərkəzinə müraciət edirlər. Müraciət zamanı sakinlərin şikayəti qeydə alınır, ancaq heç bir iş görülmür. Telefonlar internetə bağlı olduğu üçün qeyd edilən əlaqə problemi yaşanır.
"İnternet sürətinin artırılması üçün hər bir provayder öz "Data Center"lərinin miqdarını çoxaltmalıdır"
İKT sahəsi üzrə ekspert Nadim Əliyev "Bakı-Xəbər"ə şərhində bildirdi ki, şikayətlər varsa, bu, ərazidən və ya şəbəkənin necə təmin olunduğundan asılı ola bilər: "Məsələn, qəsəbələrdə quraşdırılan "DSL" internetlərin sürəti və keyfiyyəti zəif olur. Çünki telefon qovşaqlarındakı xətlər və avadanlıqlar köhnədir.
Onu da deyim ki, son zamanlar əhali arasında şikayətlər artıb. Qiymət qaldırılsa da, keyfiyyət yoxdur. Bunların baş verməsi normaldır. Çünki sistem hələ oturuşmayıb. Sistemə yeni keçmişik. İnternet sürətinin artırılması üçün hər bir provayder öz "Data Center"lərinin miqdarını çoxaltmalıdır. Keçiricilik səviyyəsini artırmalıdırlar. Əminəm ki, qısa müddətdə problem aradan qalxacaq".
Həmsöhbətimiz təəssüf hissi ilə bildirdi ki, internet provayderləri istehlakçıları soyur, aldadır, müqavilə şərtlərinə əməl etmirlər: "Hökümət buna ciddi reaksiya verməlidir. Hazırda bölgələrdə, eləcə də Bakıətrafı kənd və rayonlarda, xüsusən də Xırdalanda, Abşeronda keyfiyyətli internetlə bağlı problem var. Regionlardakı internet ADSL internetdir, yəni telefon xəttinin üstündə oturan internet. Hansı ki, dünyanın bir çox ölkəsində bu texnologiyanı arxivə göndəriblər. Təsəvvür edin, abunəçi internetə görə telefondan istifadə etmir, amma telefonun pulunu ödəyir, ona görə ki, onun üstündə internet alır. Bu düzgün deyil".
Leyla QARAXANLI
