Kamran Məmmədli: "Qarşı tərəf bunu ödəməkdən boyun qaçırırsa, əmlak sahibi qiymətləndirmə şirkətlərinə müraciət etməlidir"
Paytaxtda nəzərdə tutulan şəhər planlaması ilə əlaqədar söküntü və restavrasiya işləri son vazxtlar daha da intensivləşib. Bu zaman bəzən söküntüsü nəzərdə tutulan əmlakın yaxınlığında və ya ona bitişik olan obyektə də zərər dəyir. Belə vəziyyətlərdə adətən zərərçəkmiş əmlakın sahibi ilə söküntünü həyata keçirən məsul subyekt arasında anlaşılmazlıq və mübahisə yaranır.
Belə bir hal bu günlərdə paytaxtın Nəsimi rayonunda yaşanıb. Rayonun Cəlil Məmmədquluzadə küçəsində yaşayan sakinlər iddia edir ki, bir müddət əvvəl ''Vialon'' tikinti şirkətinin əməkdaşları sözügedən ünvandakı fərdi evləri alıb, yerində bina inşa etmək üçün bəzi ailələrlə razılığa gəlib. Söküntü zamanı ətrafda olan evlərə, obyektlərə ziyan dəyib. Qeyd edək ki, bu kimi hallar dəfələrlə yaşanır. Söküntü zamanı ətrafda olan yaşayış evlərinə və ya obyektlərə ziyan dəyir. Ancaq ziyan dəyən sakinlərə heç bir kompensasiya ödənilmir.
Maraqlıdır, bu cür sitasiyalarda zərərçəkmiş hansı hüquqlara malikdir?
"Söküntü zamanı ətrakdakı evlərə bilərəkdən ziyan dəyirsə, bu işi görən şəxs cinayət məsuliyyətinə cəlb olunur"
Hüquqşunas Hüseyn Axundov "Bakı-Xəbər"ə şərhində bildirdi ki, bu gün şəhərin istənilən yerində söküntü işi həyata keçirilir. Söküntü zamanı ətrafda olan yaşayış evlərinə, obyektlərə müxtəlif formada ziyan dəyir. Söküntü zamanı ətrakdakı evlərə bilərəkdən ziyan dəyirsə bu işi görən şəxs cinayət məsuliyyətinə cəlb olunur: "Belə ki, söküntü zamanı evin hər hansı bir hissəsinə ziyan dəyirsə Cinayət Məcəlləsinə 186-cı maddəsinə əsasən bunu edən şəxs məsuliyyətə cəlb olunur. Məlumat üçün bildirim ki, əmlakı qəsdən məhv etmək cinayət əməli sayılır. Yaxşı olar ki, söküntü işini aparan şirkət ətrafa vurduğu ziyanı qarşılasın. Belə hallarda vətəndaşlara mütləq şəkildə kompensasiya ödənilməlidir. Qarşı tərəf bunu ödəməkdən boyun qaçırırsa, əmlak sahibi qiymətləndirmə şirkətlərinə müraciət etməlidir. Əmlak əgər icbari olaraq sığortalanıbsa, sığortaçı şirkətə məlumat verilməlidir. Şirkət zərəri ödəməməkdə israr edirsə o zaman şikayətçi məhkəməyə müraciət edə bilər".
Günel CƏLİLOVA
